Galashia 3 - Mukanda Wa Zambi 1970

Shimbi hanji ufulielo

¹ Akwa Galashia, yihepuke! Iya wanulowele? Ku meso jenu nwamwene pundu ulumbunwiso wa kufwa cha Yesu Kristu ha kulusu.

² Ngunazange nukumbulule ku chihula chino wika, ngwami, nwatambwile Mwiku wa Zambi ha kufunga Shimbi, nyi hanji ha kwivwa ni ha kufuliela je Sango Jibema?

³ Kuchi nunahepuka chocho? Nwabutwile ni Mwiku wa Zambi. Alioze haliabwila nunazange kufunga Shimbi ku tachi ja yenwene, nyi?

⁴ Lamba heswe lize nwamwene liabwile liamokomoko, nyi? Ka lume! Kuliahashile kubwa liamokomoko.

⁵ Muze Zambi akunwaha Mwiku wenyi ni akulinga yilayi hakachi kenu, kuma kakuchilinga mumu nwakufunga Shimbi, hanji mumu nwakwivwa ni nwakufuliela je Sango Jibema?

⁶ Chenacho Mukanda wa Zambi unambe hakutwala kuli Abrahama ngwo: “Yafuliela Zambi, neye yamupwisa mukwa ululi mumu ha ufulielo wenyi.”

⁷ Kashika nyingikenu ngwenu, waze akufuliela, e ana amwenemwene ja Abrahama.

⁸ Mukanda wa Zambi yiulianga kumona kulutwe ngwo, Zambi makapwisa waze hi Ayuda ko akwa ululi, mumu ha ufulielo wo. Kashika yiwambujola shimbu kanda sango jino kuli Abrahama ngwo: “Zambi makawahisa akwa hashi eswe mumu hali yena.”

⁹ Abrahama yafuliela, mba Zambi yamuwahisa. Chenacho eswe waze akufuliela, Zambi kakwawahisa ngwe chize awahishile Abrahama.

¹⁰ Waze akushachila ha yitanga ya Shimbi, Zambi hanaashingi. Mumu hichinasonewa mu Mukanda wa Zambi ngwo: “Zambi hanashingi mutu mweswe yoze keshi kunyongonona matangwa eswe mu yuma yeswe yize hiyinasonewa mu mukanda wa Shimbi!”

¹¹ Chinasoloka pundu ngwo, Zambi keshi kupwisa mutu niumwe mukwa ululi ku Shimbi. Mumu Mukanda wa Zambi unambe ngwo: “Mukwa ululi mabwa ni mwono ku ufulielo wenyi.”

¹² Alioze Shimbi hi ya ku ufulielo ko. Mumu Mukanda wa Zambi unambe ngwo: “Mutu yoze wakufunga Shimbi jeswe, mabwa ni mwono ku jiyo.”

¹³ Kristu hanatukula ku Shingo lize Shimbi jakukoka, muze atayijile Shingo lietu. Ngwe Mukanda wa Zambi unambe: “Zambi hanashingi mutu mweswe yoze wazezala ha kulusu.”

¹⁴ Kristu yashingiwa hanga uwahiso uze Zambi alakenyene kuli Abrahama ukabwe hali waze hi Ayuda ko, ku kukwasa cha Yesu Kristu, hanga yetu, ku ufulielo, tutambule Mwiku uze alakenyene Zambi.

Shimbi ni chilakenyo

¹⁵ Akwetu, ngunahanjika ni chilweza cha yuma yize yakumoneka tangwa ha tangwa, ngwami, nyi amwe atu haalitesa Usendo uze unalite, mutu niumwe mahasa kuushiha hanji kuweza ho Chuma chikwo.

¹⁶ Chenacho nawa, Zambi yalakenya Abrahama ni mutu umuwika wa ku vungu lienyi yoze makasemuka kulutwe. Mukanda wa Zambi kuushi kwamba ngwo: “Atu ja ku vungu lie,” ngwe atu anji. Alioze kuwakwamba ngwo: “Mutu wa ku vungu lie.” Kafwa ngwe mutu yoze mwe Kristu.

¹⁷ Ngunambe chino ngwami, Zambi yakwachisa Usendo, yalakenya kuukolesa. Shimbi jize jejile muze kulakaji jiwana ni makumi atatu a miaka hiyabalika, kujahashile kushiha Usendo uze ni kupwisa chilakenyo cha Zambi chamokomoko.

¹⁸ Mumu, nyi chihinga chize Zambi akuhana muchibwa cha kufunga Shimbi, kachi kuchahashile kubwa cha ku chilakenyo. Alioze ku chilakenyo Zambi yamwaha cho Abrahama.

¹⁹ Mba je Shimbi, Zambi yajihana ha chikuma chika? Yajihana ha kunyingikisa chize chibwa utanguko. Te chatamba kujikaula ndoo ku kwiza cha umwe wa ku vungu lia Abrahama, yoze Zambi alakenyene. Shimbi jino Zambi yajaha tunganda a mwilu ajikunjike ku moko ja chitakanyishi.

²⁰ Alioze Usendo kuushi kufupa chitakanyishi, nyi kukuli shina umuwika yoze unakolesa Usendo; ni Zambi kali lume umuwika.

Chikuma cha Shimbi

²¹ Chinalumbunuka ngwo, Shimbi jinalimika ni yilakenyo ya Zambi, nyi? Ka lume! Mumu, nyi te Zambi hanahana Shimbi jize mujihasa kupwisa mutu ni mwono, kachi mutu mahasa kubwa mukwa ululi ku jiyo.

²² Alioze Mukanda wa Zambi unambe ngwo: “Akwa hashi eswe kaali mu chiyulo cha shili, hanga chawana chize alakenyene Zambi chikabwe cha waze akufuliela Yesu Kristu.”

²³ Shimbu ufulielo kanda uchiza, Shimbi yijitufunga ngwe funge ndoo kusoloka cha ufulielo.

²⁴ Chenacho Shimbi jabwile ngwe ndeji yetu ndoo ku kwiza cha Kristu, hanga Zambi akatupwise akwa ululi ku ufulielo.

²⁵ Haliabwila, mumu mwaka wa ufulielo hiweza, ndeji keshi nawa ni chiyulo hali yetu.

²⁶ Eswe nuli ana ja Zambi, mumu, ku ufulielo, hinunalinungu ni Kristu.

²⁷ Haananupapachisa mu kulinunga ni Kristu. Hinunazala ndako ja Kristu ngwe mahina.

²⁸ Kulisa chakuhi mukachi ka Ayuda ni waze hi Ayuda ko, mukachi ka ndungo ni enyaho, mukachi ka malunga ni mapwo. Yenu eswe nuli umuwika mu kulinunga ni Kristu.

²⁹ Nyi nuli a Kristu, nuli ana ja Abrahama, nuli maswana nikulita ni chilakenyo cha Zambi.