Galashia 2 - Mukanda Wa Zambi 1970

Paulu ni tunganda akwo a Yesu

¹ Muze miaka kumi ni yiwana hiyabalika, yinguya ku limbo lia Yerusaleme hamwe ni Barnaba, nanjile nawa Titu nikuya nenyi.

² Nayile mumu Zambi yangusolwela cho ngwenyi, Changutamba kuya. Yitulikungulula hamwe ni akwa lutwe ja Chikungulwila, yingwalumbunwina Sango Jibema jize nakulongesa kuli waze hi Ayuda ko. Te Chazangile ngwami, milimo yami yitangu ni ya haliabwila yibwe yamokomoko.

³ Mukwetu Titu, chibwe kali Kagresia, akwa Kristu kaamushinjikile ko akamupwise ngalami.

⁴ Alioze akwetu amwe akwa mahuza, waze alichingile ni yetu, yaazanga kumupwisa ngalami. Atu waze yaalinjilila mukachi ketu ngwe ngendeshi ni kuhunana utuswilo uze tuli nawo mu kuliendela chetu ni Kristu Yesu, yaazanga kutupwisa ndungo.

⁵ Kutwaatayijile ko, chibwe ha shimbu limwe likepe, hanga tukafunge umwenemwene wa Sango Jibema hali yenu.

⁶ Alioze waze amwenekene ngwe akwa lutwe, kaangulwezele Shimbi niyimwe yaha. (Akwa lutwe waze ngunambe, chaanyingikine chize abwa, mumu Zambi keshi kubatula nikulita ni kumona cha atu.)

⁷ Alioze, yaamona chize Zambi angukunjikile milimo ya kwambujola Sango Jibema kuli waze hi Ayuda ko, ngwe chize akunjikile Petulu ku milimo ya kwambujola Sango Jibema kuli Ayuda.

⁸ Mumu Zambi yangupwisa kanganda kuli waze hi Ayuda ko, ngwe chize apwishile Petulu kanganda kuli Ayuda.

⁹ Tiangu (Jake), ni Petulu, ni Yoano, waze abwile ngwe akwa lutwe, yaanyingika ngwo, Zambi hanangutayiza milimo yino. Kashika, yaatwaha, Barnaba ni yami moko a chindume ha kulikunda. Ngwe akwa milimo ni akwo yitulitesa hamuwika ngwetu, yetu mutulinga hakachi ka waze hi Ayuda ko, ni ayo hakachi ka Ayuda.

¹⁰ Yaatulweza shina kwiwuluka yiswale a mu Chikungulwila cho mu limbo lia Yerusaleme. Chuma chino ni yami nasele tachi kuchilinga.

Paulu yakumika Petulu ku limbo lia Antiokia

¹¹ Muze Petulu haheta ku limbo lia Antiokia, nalimikine nenyi ku meso ja atu, mumu te hahengesa.

¹² Muze waze atumine Tiangu (Jake) kanda achiheta, Petulu te kakulia hamwe ni waze hi Ayuda ko. Alioze muze atu waze haaheta, yaseunuka ni kulitwamina kulia hamwe no, mumu yevwila woma waze ambile ngwo, chatamba kupwisa ngalami waze hi Ayuda ko.

¹³ Akwetu akwo, Ayuda, yalinga nawa chizechene ni ulembekese ngwe Petulu. Chibwe Barnaba mwene yahungumuka chizechene ku ulembekese wo.

¹⁴ Muze namwene ngwami, kendele ko kanawa nikulita ni umwenemwene wa Sango Jibema, yingwambila Petulu ku meso ja eswe ngwami: “Yena uli Kayuda, hindu kuushi kwenda ngwe Ayuda, alioze ngwe waze hi Ayuda ko. Kuchi kevwe wakushinjika waze hi Ayuda ko kubwa ngwe Ayuda?”

Zambi kakulamwina Ayuda ni waze hi Ayuda ko ku ufulielo

¹⁵ Yetwene tuli Ayuda ku chisemewa, hi yivulumunyi ko a ku mavungu akwo.

¹⁶ Tunanyingika ngwetu, Zambi kakupwisa mutu mukwa ululi shina ha kufuliela Yesu Kristu, hi ha kumanununa Shimbi ko. Ni yetu nawa, hitunafuliela Kristu Yesu hanga Zambi atupwise akwa ululi mumu twafuliela Kristu, hi mumu twamanununa Shimbi ko. Mumu Zambi keshi kupwisa mutu mukwa ululi ha kumanununa Shimbi.

¹⁷ Muze tunazange atupwise akwa ululi ha kulinunga ni Kristu, hindu tunavulumuna ngwe mavungu akwo, chinalumbunuka ngwo, Kristu kakutayiza atu kulinga yibi, nyi? Ka lume!

¹⁸ Nyi mungutungulula yize nonwene, mungulumbula Shimbi.

¹⁹ Hakutwala ku Shimbi hingunafu. Je Shimbi je jangushihile, hanga ngubwe ni mwono wa kuchichimieka nawo Zambi. Hananguhachila hamwe ni Kristu ha kulusu.

²⁰ Kashika hi yami ko nguli ni mwono, alioze Kristu kali ni mwono muli yami. Mwono uze nguli nawo haliabwila, nguli nawo ha kufuliela. Mwana Zambi, yoze wanguzangile ni wakunjikile mwono wenyi hali yami.

²¹ Chishi kupwisa utu wa Zambi wamokomoko. Nyi Zambi mapwisa mutu mukwa ululi ku Shimbi, kachi muchilumbunuka ngwo, Kristu chamokomoko afwile.