Filipu 3 - Mukanda Wa Zambi 1970

Ululi uze unalite

¹ Ni haliabwila, akwetu, wahililenu mu kuliendela ni Mwene. Chishi kwivwa yikatalo mu kunusonekena nawa yuma yize hingunanusonekena kulu. Kuli yenu yili shindakenyo.

² Keyelenu atu waze ali ngwe tuwa, waze akulinga yibi. Waze akulilemeka ku mijimba.

³ Mumu yetu, tuli ngalami amwenemwene, hi ngwe ayo ko, mumu twakuwayila Zambi ku tachi ja Mwiku wenyi, twakulisamba mu kulinunga chetu ni Kristu Yesu. Kutushi kufuliela ndako ya uutu.

⁴ Alioze, nyi umwe manyonga kulisamba ni ndako ya uutu, shinoho

⁵ Yangupwisa ngalami muze nabwile ni matangwa nake. Ku Chisemuko, nguli Kaisraele wa ku Chikota cha Benjamine, Kahebreu wamwenemwene. Ha kukaula Shimbi ja Ayuda, te nguli Kafariseu.

⁶ Hakutwala ku kuzangumioka, nahungumionene Chikungulwila. Hakutwala ku ululi uze wakwiza ha kufunga Shimbi, chabwile kwami ni chitela.

⁷ Alioze yuma yize nanyongene ngwe kuyuka, haliabwila ngunayinyongo ngwe yuma yamokomoko mumu hali Kristu.

⁸ Alioze hi yino wika ko; nakunyonga nawa ngwami, yuma yeswe yili yamokomoko, mumu ha Chuma chize chinahiana, chinyingi cha Yesu Kristu Mwene wami. Mumu hali iye hingunambila yuma yeswe. Nakuyinyonga ngwe yiswaswa hanga nguzuke Kristu,

⁹ ni kulinunga nenyi liakulu. Chishi nawa ni ululi wa yami mwene, uze wakwiza ha kufunga Shimbi. Alioze haliabwila nguli ni ululi uze wakwiza ha kusa mbunge kuli Kristu. Ululi uno wakukatuka kuli Zambi mumu ha ufulielo.

¹⁰ Yuma yize ngunazange yili yino: kunyingika Kristu, ni tachi ja uhindukilo wenyi mu mwono wami, ni kumona lamba hamwe nenyi, ni kulikunda hamwe nenyi mu kufwa chenyi,

¹¹ ni kusa ko mbunge ngwami, Zambi makanguhindwisa ku kufwa.

Kuzomboka ndoo ku songo ha kutambula chawana

¹² Chichi kulisamba ngwami, hinakumba kulu, hanji ngwami, hinabwa kulu mungunu. Alioze nakulikoleleza ha kutambula chawana cha kuzomboka, mumu Yesu Kristu hananguzuku kulu.

¹³ Akwetu, Chishi kunyonga ngwami, hinazuka kulu chawana. Alioze Chuma chimuwika nakulinga, ngwami, nakuvulama yuma yize yili kunyima liami, ni kusa tachi ha kutambula chize chili kulutwe liami.

¹⁴ Kashika ngunazomboka ndoo ku songo, hanga ngutambule chawana. Chawana chize chili mwono wa mwilu, ku mwono uze Zambi angutambikile mumu hali Yesu Kristu.

¹⁵ Yetu eswe angunu mu ufulielo, tubwenu ni nyonga lizeliene. Hindu, nyi amwe hakachi kenu munubwa ni nyonga lieka, Zambi makachisolola kuli yenu.

¹⁶ Chuma chimuwika, yetu chatutamba kulinga nikulita ni mwono uze hitwazuka kulu.

¹⁷ Akwetu eswe, ngwimbululenu. Hitunanwehe chilweza chibema. Talenu kanawa atu waze akuchikaula.

¹⁸ Hingunanwambulwila cho kanji, ni haliabwila ngunanwambulwila cho nawa ni masoji ngwami, anji, ku yitanga yo, kaali akwa kole ku kufwa cha Kristu ha kulusu.

¹⁹ Songo lio kwononona, mumu zambi yo jimo lio. Kaakulisuta ni yuma yo ya sonyi, kaakunyonga lume ku yuma ya hano hashi.

²⁰ Alioze yetu, tuli akwa mwilu. Ni usona tunashimbwila kwiza cha Chilamwina chetu Mwene Yesu Kristu mwilu.

²¹ Mwenawo makalumuna mijimba yetu yilelu ha kuyipwisa ngwe mujimba wenyi wa uhenya. Makachilinga ni ndundo jize mahasa kuzeyesa najo yuma yeswe.