Filipu 2 - Mukanda Wa Zambi 1970

Kulikehesa cha Kristu ni unene wenyi

¹ Kuliendela chize nuli nacho ni Kristu, chakunutakamisa, nyi? Zango lienyi, liakunulembejeka, nyi? Nwakuliendela ni Mwiku wa Linanga, nyi? Nunalweze akwenu utu ni keke, nyi?

² Ngunaliumbu kuli yenu ngwami, nunguwahise ha kubwa ni nyonga limuwika, ni zango limuwika, ni kulikunda chimuwika ni mbunge yimuwika.

³ Kanda nulinga nichimwe ni kulitachika, chibwe kulisuta, chibwe kulichichimieka. Alioze likehesenu ku meso ja akwenu; mutu mweswe anyonge ngwenyi, mukwetu kananguhiana.

⁴ Mutu mweswe kanda atala ku yuma yenyi wika, alioze ku yuma ya atu akwo nawa.

⁵ Bwenu ni kunyonga chize abwile nacho Kristu Yesu:

⁶ Uzambi wenyi te wa matangwa eswe, hindu kanyongene ko ngwenyi, chamutamba kulieseka kulita ni Zambi ku tachi.

⁷ Alioze, ku zango lienyi mwene yehuka yize yeswe, yalumuka ndungo, yalifwa ni atu, yalipwisa mutu.

⁸ Yalikehesa, yononoka ndoo ku kufwa—kufwa cha ha kulusu.

⁹ Kashika Zambi hanamunangamisa kuhiana, hanamwehe jina lize liahiana majina eswe,

¹⁰ hanga, mu kulemesa jina lia Yesu, akwa mwono eswe waze ali mwilu, ni hano hashi, ni kushi lia hashi, akafulamane ha makungunwa,

¹¹ ni eswe akatayize ngwo, Yesu Kristu mwe Mwene, ha kuhalisa Zambi Tata.

Temukenu ngwe matongonoshi

¹² Akwetu matangwa eswe nwangwononokenene muze nabwile hamwe nenu. Chibema nawa nungwononokene haliabwila muze yami chishiko. Senu tachi ni kumanununa ulamwino wenu ni woma ni kuchikima.

¹³ Mumu, tangwa ha tangwa Zambi kakulinga muli yenu, nikunwaha zango ni tachi ha kumanununa chize anapale.

¹⁴ Lingenu yuma yeswe, hi ni kunenganyana ko chibwe kulihamika,

¹⁵ hanga nukabwe abema kunushi chitela, ana ja Zambi kunushi kapalia mukachi ka yivulumunyi ni atu abi a hano hashi. Temukenu mukachi ko ngwe matongonoshi a mwilu

¹⁶ muze nunalongesa maliji a mwono. Nyi munulinga chino, mungukahasa kulisamba ni yenu ha Tangwa lia kwiza cha Kristu. Muchilweza ngwo, milimo yami yeswe ni kukilikita chami cheswe hi chamokomoko ko.

¹⁷ Tangwa likwo manyinga jami, kafwa ngwe mwono wami, maakabwa kutehuna ngwe mulambu wa ufulielo wenu kuli Zambi. Nyi Chenacho, mungu Wahilila ni kulianyina uwahililo uze hamwe ni yenu eswe.

¹⁸ Ni yenu nawa chanutamba kuwahilila hamwe ni yami.

Timoteu ni Epafroditu

¹⁹ Ngunase mbunge kuli Mwene Yesu ngwami, munguhasa kunutumina Timoteu nikawashi, hanga ngukalitakamise yami mwene ku sango jize mungukevwa hakutwala kuli yenu.

²⁰ Shina iye wika uli ni manyonga ngwe yami, kanalinyenge chamwenemwene hali yenu.

²¹ Eswe akwo kaakufupa lume yuma yo ene, hi yuma ya Yesu Kristu ko.

²² Nunanyingika yenwene chize Timoteu alingile. Ngwe tato ni mwana twalingile hamuwika milimo ya kulongesa Sango Jibema.

²³ Ngunase ko mbunge ha kunutumina ye muze hinamona chize maakabatula milonga yami.

²⁴ Ngunafuliela Mwene ngwami, yami mwene mungukeza ni kunutala ha shimbu likepe.

²⁵ Nanyongene ngwami, chinalite kunutumina mukwetu Epafroditu kavumbi ni mukwetu kanda kajita ni mukwetu, yoze nwangutuminyine mu kungunehena yize nahonene.

²⁶ Usona anevu ha kunumona yenu eswe. Yevwa chikolo kulema mu mbunge muze nwevwile ngwo, kanayiji.

²⁷ Chamwenemwene yikola abwile nayo—te himafwa. Alioze Zambi yamuvwila keke. Hi iye wika ko, alioze ni yami nawa, hanga chichi kwivwa chinyengo kuhiana.

²⁸ Kashika ngunalipupwisa kunutumina ye, hanga nukawahilile nawa muze munukamumona, ni hanga chinyengo chami chikahwe.

²⁹ Chenacho mutambulenu ni uwahililo, mukwenu mu kuliendela ni Mwene Yesu. Atu ngwe wano asenu vumbi,

³⁰ mumu wabwile hakamwihi ni kufwa, mumu ha milimo ya Kristu. Yakunjika mwono wenyi ku utoji, ha kungukwasa chize yenwene kunwahashile kungukwasa.