Filipu 1 - Mukanda Wa Zambi 1970

Kumeneka

¹ Yami Paulu ni Timoteu, tuvumbi twa Kristu Yesu, tunanusonekena yenu akwa Kristu eswe waze nwatwama mu limbo lia Filipu, waze nwafuliela Kristu Yesu hamwe ni tulayi twa Chikungulwila ni tuvumbi.

² Zambi Tata yetu ni Mwene Yesu Kristu anulweze utu ni anwehe uhwimino.

Paulu yalembela akwa Filipu

³ Nakusakwilila Zambi yami hakutwala kuli yenu yisuho yeswe muze nakunwiwuluka.

⁴ Yisuho yeswe yize nakunulembela, nakulemba ni uwahililo,

⁵ mumu ha chize nwangukwashile ha kumwanga Sango Jibema, chize ku tangwa litangu ndoo musono.

⁶ Ngunanyingika pundu ngwami, Zambi yoze wabutwile milimo yibema muli yenu, makanyongonona kuyilinga ndoo muze makayimanununa ha Tangwa lia Kristu Yesu.

⁷ Chinalite ngubwe ni manyonga wano hakutwala kuli yenu eswe, mumu nakununyonga mu mbunge yami matangwa eswe. Mumu eswe hinunatambula Chihanda cha utu uze angulwezele Zambi, chibwe haliabwila muze nguli mu zuwo lia lamba, ni muze nabwile mukwa kutusuka. Nwakufunga ni kukolesa Sango Jibema hamwe ni yami.

⁸ Zambi kali chela chami, ngwamie, nakunuvwila usona yenu eswe ni zango liahiana lia Yesu Kristu.

⁹ Nakunulembela Zambi hanga zango lienu likalumbame hamwe ni chinyingi chamwenemwene ni mana.

¹⁰ Ha chino munuhasa kutongola chize chinalite. Mba munukabwa kunushi kapalia, kechi kanuhisa ha Tangwa lia Kristu.

¹¹ Munukabwa ni mihuko yinji ya ululi ku tachi ja Yesu Kristu, ya kuhalisa ni kuchichimieka nayo Zambi.

Paulu mu zuwo lia lamba

¹² Akwetu, ngunazange nunyingike ngwami, lamba lize lianguwanyine liasenyesene Sango Jibema kulutwe.

¹³ Mba tujita eswe twa mwanangana wa Aroma ni akwo eswe kuno kaananyingika ngwo, nguli mu zuwo lia lamba mumu nguli kavumbi ka Kristu.

¹⁴ Akwetu anji anafuliela Mwene Yesu kuhiana ha kumona chize nguli mu zuwo lia lamba. Ha chino kaanahamuka kuhanjika maliji a Zambi, keeshi woma.

¹⁵ Chamwenemwene amwe hakachi ko kaakwambujola Kristu ni ukwa ni Vunda, alioze akwo kaakumwambujola ni mbunge jibema.

¹⁶ Wano kaakuchilinga ha zango, mumu kaananyingika ngwo, Zambi hanangukunjika milimo yino ya kulongesa Sango Jibema.

¹⁷ Akwo keeshi kwambujola Kristu ni mbunge yimuwika, alioze ni mbunge ya kulimanangana. Kaananyongo kuweza lamba ha lamba liami muze nguli mu zuwo lia lamba.

¹⁸ Kuheshi Chuma! Chibwe manyonga jo kaali abi hanji amwenemwene, nyi kaanambujola Kristu, ngunawahilila, ni mungunyongonona ni kuwahilila.

¹⁹ Mumu ngunanyingika ngwami, yuma yize yeswe muyikwasa ha kungutusula, mumu ha yilemba yenu ni kukwasa cha Mwiku wa Yesu Kristu.

²⁰ Mumu ngunazange kuhiana, ni ngunase ko mbunge ngwami, chichi kevwa sonyi nichimwe. Alioze, haliabwila ngwe matangwa eswe, munguhamuka kuhiana hanga yami mwene mungulemesa Kristu, chibwe mu mwono, chibwe mu kufwa.

²¹ Mu manyonga jami ngwami, mwono uli Kristu; kufwa chili kuyuka.

²² Alioze, nyi ha kutwama ni mwono ngunahase kulinga milimo yibema, mba Chanyingikine chize mungutongola.

²³ Nguli wakutachika sali ni sali: ngunazange kukatuka mu mwono uno hanga ngubwe ni Kristu, chize muchibwa chibema kuhiana.

²⁴ Alioze kubwa ni mwono chili kanawa kuhiana mumu hali yenu.

²⁵ Ngunanyingika pundu ngwami, mungunyongonona ni mwono. Mungubwa hamwe ni yenu eswe mu kunutakamisa ni kunuwahisa mu ufulielo.

²⁶ Mba muze mungukabwa hamwe ni yenu nawa, munuhasa kulisamba mumu hali yami, mu mwono wenu wa kulinunga ni Kristu Yesu.

Mwono mu kulinunga ni Kristu

²⁷ Chuma chimuwika, talenu kanawa hanga ndako jenu jilite ni sango ja Kristu, hanga, chibwe mungunuheta ni kunumona hanji chishiko, ngukevwe ngwo, nunamana nguu ni kunyonga chi muwika ni kulitachika hamuwika ni mbunge yimuwika hakutwala ku ufulielo wa Sango Jibema.

²⁸ Kanda nuvwila akwa kole jenu woma. Kuli ayo muchibwa chinyingi chakutwala kukwonona cho ni kukumba chenu—mumu Zambi makanukwasa mu kukumba.

²⁹ Mumu hananulweze utu ha kulingila Kristu, hi kumufuliela wika ko, alioze nawa kumona lamba mumu hali iye.

³⁰ Haliabwila nunahase kulitachika hamwe ni yami mu jita. Jita yino yili yizeyene nwangumwene nayo miaka ya kunyima ni musono nawa ngwe chize nunevu.