Filemu 1 - Mukanda Wa Zambi 1970

Kumeneka

¹ Yami Paulu, funge mu zuwo lia lamba mumu hali Kristu Yesu, ni mukwetu Timoteu, tunanusonekena yena Filemu, sepa lietu ni mukwa milimo ni mukwetu,

² ni Chikungulwila chize chinalikungulula mu zuwo lie, ni ndumbwetu Apia, ni kajita ni mukwetu Arkipu.

³ Zambi Tata ni Mwene Yesu Kristu anulweze utu, anwehe uhwimino.

Paulu yachichimieka mwata Filemu

⁴ Mukwetu Filemu, yisuho yeswe nakulemba, nakukunyongena ni kusakwila Zambi yami.

⁵ Mumu nakwivwa chize wakuzanga akwa Kristu eswe ni chize unafuliela Mwene Yesu.

⁶ Ngunalembe ngwami, kuliendela chize tuli nacho yetu akwa kufuliela, chikanehe chinyingi cha yiwape yeswe yize tuli nayo mu kulinunga ni Kristu.

⁷ Mukwetu, zango lie hilinanguwahisa ni kungulembejeka, mumu hiunahuzulula mbunge ja akwa Kristu.

Paulu yahakwila Onesimu

⁸ Kashika, ngwe mukwetu mu kuliendela ni Kristu, ngunahase kuhamuka ni kukwamba chize Chakutamba kulinga.

⁹ Alioze ngunaliumbu kuli yena ni zango, chibwe nguli Paulu, kanganda ka Kristu Yesu, chibwe nguli funge mu zuwo lia lamba mumu hali iye.

¹⁰ Ngunaliumbu kuli yena hakutwala kuli mwanami mu ufulielo, Onesimu. Habwa mwanami ku tachi ja Mwiku wa Linanga muno mu zuwo lia lamba.

¹¹ Ha miaka ya kunyima te mutu wamokomoko kuli yena, alioze haliabwila mahasa kutufumbula yena ni yami.

¹² Ngunakutumina ye haliabwila. Kali ngwe yami mwene.

¹³ Ngunazange kachi asale hamwe ni yami shimbu lize nguli muno mu zuwo lia lamba, hanga akusalakane ni kungukwasa.

¹⁴ Alioze Chazangile kulinga nichimwe nyi yena kuwatayile. Chazangile kukukwachisa ni tachi. Ngunazange uchilinge ni zango lia yena mwene.

¹⁵ Kota Onesimu hanalihandununa ni yena ha shimbu likepe, hanga ahase kubwa hamwe ni yena ndoo ku miaka yeswe.

¹⁶ Keshi nawa ngwe ndungo wika, alioze kanahiana ndungo. Kali mukwetu mu kuliendela ni Kristu, chibichibi kuli yami. Alioze kuli yena mahiana chikolo, ku chisemewa, kanda yikwo ngwe mukwenu mu kuliendela ni Mwene Yesu!

¹⁷ Chenacho, nyi unangumono ngwe nguli mukwa milimo ni mukwenu, mutambule ngwe chize wakungutambula yami.

¹⁸ Nyi hanakulingi chibi, chibwe kongo akukwete, lisoneke ngwe kongo liami.

¹⁹ Ni kwoko lia yami mwene ngunasoneka maliji wano ngwami: “Yami, Paulu, mungukakufweta lio.” (Hi Chuma ko ha kukwiwulula ngwami, unguli ni kongo lia mwono we.)

²⁰ Ewa, mukwetu, ungutayize vumbi lino ngwe mukwenu mu kulinunga ni Kristu, mumu ha zango lia Kristu.

²¹ Ngunafuliela, muze ngunakusonekena, muulinga chize ngunambe—ni mwene ngunanyingika ngwami, muulinga kuhiana chize ngunahula.

²² Chikwo nawa, ungululikila zuwo, mumu ngunase ko mbunge ngwami, Zambi makevwa yilemba yenu ni kunguhilwisa ku mahienu.

Kumeneka

²³ Epafra funge ni mukwetu mu zuwo lia lamba mumu hali Kristu Yesu, kananumeneka,

²⁴ ni Marku nawa, ni Aristarku, ni Dema, ni Luka akwa milimo ni akwetu.

²⁵ Mwene Yesu Kristu anulweze utu wenyi.