Ezra 9 - Mukanda Wa Zambi 1970

Ezra yevwa kubiha mumu Aisraele alimbachile ni yilambala

¹ Mwabwamuze amwe miata ja Aisraele yeeza, yaangwambulwila ngwo, e atu, ni mahako ja Zambi, ni Alevi, te keeshi kulihandununa ni akwa yifuchi yakusulangana: Aamone, ni Amoabe, ni akwa Egiptu, ni Akanana, ni Ahite, ni Aperize, ni Ajebuse, ni Aamore. Aisraele yaalingalinga yuma ya kuzelwokesa ngwe yize akulinga atu waze.

² Ayuda haanambata mapwo a yilambala. Kashika atu waze haanajilila ku meso ja Zambi, haalibihisa. Miata ni akwa kuyula e haanavulumuna kuhiana.

³ Muze hinevwa chino, yingutanuna mahina jami ni kubihilila, yingusuta wevu wami ni kambu jami, yingutwama mu fufuta ni kulinyenga.

⁴ Yingutwama mo ni kulinyenga ndoo ha ola ya milambu ya chingoloshi, mba atu yaabutuka kukunguluka kuli yami, eswe waze te akuchikima ni woma ha yize Zambi ya Aisraele ahanjikile hakutwala ku milonga ya atu waze atuhukile mu undungo.

⁵ Muze te ola ya milambu ya chingoloshi hiyaheta, mba yingukatuka ni kuzala mahina jami akusonya, yingufukama ha makungunwa jami ni kulemba ni kwolola moko jami kuli Mwene Zambi, Zambi yami.

⁶ Yingwamba ngwami: “Aa Zambi, ngunevu sonyi kuhiana, chahashile kuhetuka ku meso je. Milonga yetu hiyoka kuhiana mitwe yetu, hiyaheta ndoo mwilu.

⁷ Chize ku matangwa ja tushakulu twetu ndoo ni musono, yetu atu je kutwavulumuna kuhiana. Mumu ha milonga yetu, ni e mianangana jetu, ni e mahako jetu, hitwaholokela mu moko ja yilambala. Haanatulu, haanatushihi, haanatutwala kweka mu undungo. Haanatuhepwisa kuhiana, tuli yihepuke ndoo ni musono.

⁸ Mba haliabwila ha shimbu lino likepe, aa Mwene Zambi, Zambi yetu, hiwatulweza utu, hiwatayiza amwe a kuli yetu kutuhuka mu undungo ni kutwama mu uhwimino muma mwa chijila. Hiwatwaha mwono Waha ha kutusuka mu undungo wetu.

⁹ Twabwile ndungo, alioze yena kuwatayijile yetu kubwa no matangwa eswe. Yiulembejeka mwanangana atuvwile keke hanga tutwame ni mwono ni kutungulula zuwo lie lize abuzwile, ni kubwa mu uhwimino mu Yuda ni mu Yerusaleme.

¹⁰ “Aa Zambi, alioze haliabwila, kuchi mutwamba hakutwala ku yuma yino yeswe? Hitunakolema Shimbi,

¹¹ jize wahele tuvumbi twe akwa munanyi atulongese. Yaatulweza ngwo, chifuchi chize nunayi ni kuzuka chili chifuchi cha luchisa, mumu atu waze atwama mo haanachibihisa chize ku songo limuwika ndoo ku songo likwo ni yuma ya kuzelwokesa.

¹² Yaatulweza ngwo, kuchatambile kulimbata ni atu waze atwama mo, chibwe kwakwasa kubwa ni ubite hanji kutwama kanawa, nyi twazanga kutwama kanawa mu chifuchi, ni kuchihichika ngwe chihinga mu moko ja ana jetu.

¹³ Tunanyingika ngwetu, yena Zambi yetu, chibwe twakuvulumwine kuhiana, hindu kuwatumwesene lamba linji, alioze yiutwecha kutwama ni mwono.

¹⁴ Ngwe kuchi mututangula Shimbi je nawa ni kulimbata ni yingulungulu waze? Nyi twachilinga yena muututenukina ni kutunongesa liakulu, kuuchi kuhichika umwe ni mwono.

¹⁵ Mwene Zambi, Zambi ya Aisraele, yena uli mukwa ululi, hiwatutayiza yetu kutwama ni mwono. Tunashikisa milonga yetu; te kutwalitele kuheta ku meso je.”