Ezra 8 - Mukanda Wa Zambi 1970

Atu waze atuhukile mu undongo

¹ Wano e miata ja majimo waze abwile mu undungo mu chifuchi cha Babilonia, ni ahilukile hamwe ni Ezra ku limbo lia Yerusaleme ha matangwa ja kuyula cha mwanangana Artasherke:

^2-14 Gershome wa ku jimo lia Finehase, Daniel wa ku jimo lia Itamare, Hatushe, mwana wa Shekania, wa ku jimo lia David, Zakaria wa ku jimo lia Paroshe, hamwe ni malunga 150 (te kaali ni mukanda wa majina wa tushakulu two), Elionai mwana wa Zerahia, wa ku jimo lia Pahate Moabe hamwe ni malunga 200, Shekania mwana wa Jahaziele, wa ku jimo lia Zatu, hamwe ni malunga 300, Ebede mwana wa Jonatane, wa ku jimo lia Adine, hamwe ni malunga 50, Jeshaya mwana wa Atalia, wa ku jimo lia Elame, hamwe ni malunga 70, Zebadia mwana wa Mikele, wa ku jimo lia Shefatia, hamwe ni malunga 80, Obadia mwana wa Jehiele, wa ku jimo lia Joabe, hamwe ni malunga 218, Shelomite mwana wa Josefia, wa ku jimo lia Bani, hamwe ni malunga 160, Zakaria mwana wa Bebai, wa ku jimo lia Bebai, hamwe ni malunga 28, Johanane mwana wa Hakatane, wa ku jimo lia Azgade, hamwe ni malunga 110, Elifelete, ni Jewele, ni Shemaya, a ku jimo lia Adonikame hamwe ni malunga 60 (enoo akawile muze te yimwe miaka hiyabalika), Utai ni Zakure, a ku jimo lia Bigvai, hamwe ni malunga 70.

Ezra yafupa Alevi alinge milimo ya mu zuwo lia Zambi

¹⁵ Naakungulwile ku lwiji yoze unayi ku limbo lia Ahava, yitutwama ko matangwa atatu. Muze hinashishika kutala mbunga, yingumona mahako ja Zambi, alioze Chamwene ko Alevi.

¹⁶ Mba yingutambika miata wano: Eliezare, ni Ariele, ni Shemaya ni Elnatane, ni Jaribe, ni Elnatane, ni Natane, ni Zakaria, ni Meshulame, ni alongeshi Joyaribe, ni Elnatane.

¹⁷ Yingwatuma kuli Ido, mwata wa chihunda cha Kasifia, ahule Ido ni atu jenyi, te tuvumbi a mu zuwo lia Zambi, atutumine atu a kulinga milimo mu zuwo lia Zambi yetu.

¹⁸ Mba nikulita ni utu wa Zambi, yaatutumina umwe mukwa mana, Sherebia, Kalevi wa ku jimo lia Mali, hamwe ni ana jenyi ni usoko wenyi kumi ni nake.

¹⁹ Yaatutumina nawa Hashabia ni Jeshaya a ku jimo lia Merari, hamwe ni usoko wo makumi aali.

²⁰ Yikubwa nawa akwa milimo ya mu zuwo lia Zambi 220 waze akwete tushakulu two abemesene kuli mwanangana David ni akwa kuyula jenyi akwase Alevi. Yaasoneka majina jo eswe.

Ezra ni Aisraele yaalitwamina kulia, yaalemba

²¹ Kwenako ku lwiji Ahava, nahanyine Shimbi hanga yetu eswe tulitwamine kulia, tulikehese ku meso ja Zambi yetu, tuliumbe hanga atusongwele mu wenyi wetu ni kutufunga ni ana jetu ni ubite wetu weswe.

²² Nevwile sonyi ni kwita kuli mwanangana atwehe mbunga ya tujita waze akwenda ha tuvwalu atufunge kuli akwa kole jetu mu wenyi wetu, hingunamulweze ngwami, Zambi yetu kaakuwahisa yoze wakushachila hali iye, alioze kakuvwila kubiha yoze wakumulituna, kakumumwesa lamba.

²³ Kashika twalitwaminyine kulia, yitulemba, hanga Zambi atufunge. Neye yevwa kulemba chetu.

Yawana mumu ha zuwo lia Zambi

²⁴ Mukachi ka mahako natongwele Sherebia, ni Hashabia, ni akwo kumi.

²⁵ Mba yingupezalisa prata ni oru, ni yikashi yize mwanangana, ni akwa kuyula jenyi ni akwa lutwe jenyi, ni Aisraele ahanyine hanga alinge nayo mu zuwo lia Zambi. Yinguyihana kuli mahako.

^26-27 Yuma yize naahele yino: mbongo ja prata kilo 22,000, yikashi ya prata kilo 70, mbongo ja oru kilo 3,400, yenga ya oru 20, ya kilo 8 ni grame 400, yenga ya unengu Ubema 2, ya ndando ngwe yize ya oru.

²⁸ Yingwalweza ngwami: “Nuli akujilika ku meso ja Mwene Zambi, Zambi ya tushakulu twenu. Yawana yeswe ya yikashi ya prata ni oru neyo haanayikunjika.

²⁹ Nuyifunga kanawa ndoo munuyihetesa ku zuwo lia Zambi. Nukayesekela mu chibatulo cha mahako ni kuyikunjika kuli miata ja mahako ni Alevi, ni kuli miata ja Aisraele mu Yerusaleme.”

³⁰ Chenacho mahako ni Alevi atambwile prata, ni oru, ni yikashi yize ayitwale ku zuwo lia Zambi mu Yerusaleme.

Aisraele yaahiluka ku Yerusaleme

³¹ Mba yitukatuka ku lwiji Ahava ha tangwa kumi ni lia muchaali lia kakweji mutangu ni kuya ku Yerusaleme. Mwene Zambi yabwa hamwe ni yetu, yatufunga kuli akwa kole jetu ni kuli waze te anatujikinyina mu jila.

³² Muze twahetele mu Yerusaleme, yitunama matangwa atatu.

³³ Mba ha tangwa lia muchiwana yituya ku zuwo lia Zambi, yitupezalisa prata, ni oru, ni yikashi, yituyikunjika mu moko ja hako Meremote, mwana wa Uria. Neye yabwa hamwe ni Eleazare mwana wa Finehase ni Alevi aali, Jozabade mwana wa Yeshua, ni Noadia mwana wa Binwi.

³⁴ Yaalula ni kupezalisa yuma yeswe. Shimbu lizeliene yaayisoneka yeswe.

³⁵ Eswe waze atuhukile mu undungo yaatwala milambu ya kwocha kuli Zambi ya Aisraele. Yaalambwila Aisraele eswe makuji a ngombe 12, ni makuji a mapanga 96, ni ana a mapanga 77. Yaalambula nawa pembe 12 hanga alibemese ku yibi yo. Yoocha yimuna wano eswe milambu kuli Mwene Zambi.

³⁶ Mba yaanda nawa mukanda uze ahele kuli mwanangana, yaauhana kuli akwa lutwe a mu chifuchi cha ku chitokelo cha lwiji Ufrateze. No yaakwasa Aisraele, yaakolesa kuwayila cho mu zuwo lia Zambi.