Ezra 7 - Mukanda Wa Zambi 1970

Ezra yaheta mu Yerusaleme

^1-5 Miaka te hiyabalika, mba mu kuyula cha Artasherke mu chifuchi cha Persia, yikubwa umwe lunga jina lienyi Ezra. Atu a ku vungu lienyi ndoo kuli Arone mwata wa mahako ja Zambi wano: Seraya, ni Azaria, ni Hilkia, ni Shalume, ni Zadoke, ni Ahitube, ni Amaria, ni Azaria, ni Merayote, ni Zerahia, ni Uzi, ni Buki, ni Abishua, ni Finehase, ni Eleazare, ni Arone.

^6-7 Ezra te kali longeshi wa mana, yanyingika kanawa Shimbi jize Mwene Zambi, Zambi ya Aisraele ahanyine kuli kavumbi kenyi Mose. Mwanangana wa Persia yamwaha yuma yeswe yize echile, mumu Mwene Zambi, Zambi yenyi, wabwile hamwe nenyi. Ha mwaka wa muchishimbiali wa kuyula cha mwanangana Artasherke, Ezra yatuhuka mu chifuchi cha Babilone ni kuya ku limbo lia Yerusaleme hamwe ni mbunga ya Aisraele: mahako, ni Alevi, ni njimba ni tufunga twa zuwo lia Zambi, ni akwa milimo.

^8-9 Yaatuhuka mu Babilonia ha tangwa litangu lia kakweji mutangu. Zambi yamukwasa kuheta mu Yerusaleme ha tangwa litangu lia kakweji wa muchitano

¹⁰ Ezra te hanalikunjika ni kulilongesa Shimbi ja Zambi ni kujilinga ni kujilongesa jeswe kuli Aisraele.

Chisoneko chize mwanangana Artasherke ahanyine kuli Ezra

¹¹ Chino che Chisoneko chize mwanangana Artasherke ahanyine kuli Ezra, hako kanda longeshi, yoze te wanyingika kanawa Shimbi ni yiyulo yize Mwene Zambi ahanyine kuli Aisraele, ngwenyi:

¹² “Artasherke, mwanangana wa mianangana, kuli Ezra, hako kanda longeshi wa mana wa Shimbi ja Zambi ya Mwilu.

¹³ “Ngunahana Shimbi jino ngwami, mu wanangana wami, Aisraele, ni mahako, ni Alevi eswe, waze anazange kuya ku Yerusaleme, aye hamwe ni yena.

¹⁴ Yami, hamwe ni akwa kuyula jami shimbiali, ngunakutumu ni kuhengula kanawa nyi atu mu Yuda ni mu Yerusaleme kaakufunga Shimbi ja Zambi ye, jize jili mu moko je.

¹⁵ Ukambata milambu ya prata, ni oru yize yami ni akwa kuyula jami tunazange kulambula kuli Zambi ya Aisraele, yoze uli ni zuwo lienyi mu Yerusaleme.

¹⁶ Ukambata nawa prata ni oru yeswe yize muutambula mu chifuchi cheswe cha Babilone chinge ni milambu yize mahako ja Aisraele maalambula mumu ha zuwo lia Zambi yo mu Yerusaleme.

¹⁷ “Ukafunga mbongo jize kanawa ni kulanda najo kuji a ngombe ni a mapanga ni ana a mapanga ni milambu ya wunga ni vinyu ni kuyilambula ha chilumbilo cha ku zuwo lia Zambi mu Yerusaleme.

¹⁸ Hakutwala ku prata ni oru yize muyisala, lingenu nayo ngwe chize yenu ni akwenu nunanyongo ngwenu chibema, nikulita ni chize Zambi yenu anazange.

¹⁹ Ukakunjike kuli Zambi mu Yerusaleme yikashi yeswe yize hiwatambula ni kulinga nayo milimo mu zuwo lia Zambi.

²⁰ Mba cheswacho muuhona nawa mu zuwo lia Zambi, muuhasa kuchilanda ni mbongo ja mu mushete wa wanangana.

²¹ “Yami, mwanangana Artasherke, ngunahana Shimbi kuli akwa kufunga ubite waze atwama ku chitokelo cha lwiji Ufrateze ngwami: mwehenu hako Ezra kanda longeshi wa Shimbi ja Zambi wa Mwilu chize cheswe manwita,

²² chibwe ndoo ku kilo 3,400 ja prata, ni kilo 10,000 ja tiriku, ni litro 2,000 ja vinyu, ni litro 2,000 ja maji a olive, ni mungwa weswe uze anahono.

²³ Chanutamba kulinga cheswacho Zambi wa Mwilu anazange mumu ha zuwo lienyi. Nukalinga kanawa, kanda anguvwila ufwatulo chibwe ana jami chibwe chifuchi chami.

²⁴ Tunanwehe nawa Shimbi yikwo ngwetu, kuchatambile kutambula milambu, chibwe lijimu, chibwe mwombo kuli mahako, hanji Alevi, hanji njimba, hanji tufunga a ku yikolo, hanji akwa milimo, hanji mutu mweswe mukwo yoze wakulinga mu zuwo lia Zambi.

²⁵ “Yena Ezra, linga ni mana waze Zambi hanakwehe, utongole ngaji ni akwa kuyula waze maayula atu eswe waze atwama ku chitokelo cha lwiji Ufrateze, waze akufunga Shimbi ja Zambi ye. Ulongese atu eswe waze kaajinyingikine.

²⁶ Mweswawo makolema Shimbi ja Zambi ye hanji Shimbi ja wanangana, amusopese nikawashi, amushihe, hanji kumuhanga mu chifuchi, chibwe kumutambula yikumba yenyi yeswe, hanji kumusa mu zuwo lia lamba.”

Ezra yachichimieka Zambi

²⁷ Ezra yamba ngwenyi: “Mwene Zambi, Zambi ya tushakulu twetu, afumane! Mumu hananyongesa mwanangana alemese zuwo lia Mwene Zambi mu limbo lia Yerusaleme.

²⁸ Ku utu wa Zambi, mwanangana ni akwa kuyula jenyi ni tuvumbi twenyi a tachi eswe haangulweza vumbi. Mwene Zambi, Zambi yami, habwa hamwe ni yami, hangutakamise ni kukoka akwa lutwe ja Aisraele anji aye ni yami.”