Ezra 6 - Mukanda Wa Zambi 1970

Shimbi ya mwanangana Siruse yiisoloka

¹ Hohene mwanangana Dariuse yahana Shimbi uhengule mikanda ya sango ja mianangana yize te yili mu limbo lia Babilone.

² Alioze yawana umwe mukanda mu limbo lia Ekatana mu chifuchi cha Media, yaatanga mo maliji wano ngwo:

³ “Ha mwaka utangu wa kuyula cha Siruse mwanangana wa Babilonia, mwe mwanangana yahana Shimbi ngwenyi, Ayuda atungulule zuwo lia Zambi mu limbo lia Yerusaleme hanga abwe ni homa ha kulambwila milambu. Chizundamo cha lie zuwo chibwa metro makumi aali ni shimbiali, kutohwa chalio metro makumi aali ni shimbiali.

⁴ Alitunge ni milongo yitatu yitatu ya mawe anene ni mulongo umuwika umuwika wa mitondo. Milimo yeswe ayifwete ku mushete wa milambu ya wanangana.

⁵ Chikwo nawa, yikashi ya oru ni prata yize mwanangana Nebukanezore achijile mu zuwo lia Zambi mu Yerusaleme ni kuyitwala ku Babilone, ayihilwise muma liayo mu zuwo lia Zambi mu Yerusaleme.”

Mwanangana Dariuse yatayiza atunge zuwo lia Zambi

⁶ Hohene mwanangana Dariuse yakumbulula ngwenyi: “Kuli Tatenai, mukwa kuyula wa ku chifuchi cha ku chitokelo cha lwiji Ufrateze, ni Shetare Bozenai, ni akwa lutwe ni akwenu waze nwatwama no. “Katukenu ko,

⁷ kanda nukwika milimo yino ya kutunga zuwo lia Zambi. Echenu mukwa kuyula wa Yuda ni makulwana jo kutunga zuwo lia Zambi homa lialio.

⁸ Ngunanwehe Shimbi hanga nwakwase kulitungulula. Fweto yo muyikatuka ku mushete wa milambu ya wanangana ya mu chifuchi ku chitokelo cha Ufrateze hanga milimo kuyichi kavumewa.

⁹ Tangwa ha tangwa, kuhonga ka, chatamba kuhana kuli mahako mu Yerusaleme yeswe yize maahona: yimbembe a kuji a ngombe, ni mapanga, ni ana a mapanga, akochele Zambi wa mwilu milambu, ni tiriku, ni mungwa, ni vinyu, ni maji a olive.

¹⁰ Yino ye chatamba kulinga mba hanga ahase kulambula milambu yize Zambi wa Mwilu mahasa kutambula ni kulemba hanga anguwahise kama yami ni ana jami.

¹¹ Ngunanwehe nawa Shimbi yikwo ngwami, mweswawo makolema Shimbi yino, chatamba kuchiza mukambo wa ha zuwo lienyi, kuusonga, ni kumutuwa nawo, ni zuwo lienyi alipwise mbozo.

¹² Zambi yoze watongwele Yerusaleme abwe homa ha kumuwayila, akakumbe mweswe mwanangana hanji heswe vungu maakolema Shimbi yino hanji meeseka kwonona zuwo lize. Yami, Dariuse, ngunanwehe Shimbi yino. Chatamba kuyononokena.”

Ayuda yaakunjika zuwo lia Zambi

¹³ Mba Tatenai mwe mukwa kuyula, ni Shetare Bozenai, ni akwa lutwe ni akwo yaalinga lume nikulita ni Shimbi ya mwanangana.

¹⁴ Miata ja Ayuda yaalikoleleza kutunga zuwo lia Zambi, ni akwa munanyi Hagai ni Zakaria yaatakamisa. Yaamanununa zuwo nikulita ni Shimbi yize ahele Zambi ya Aisraele ni ya Siruse ni Dariuse, ni Artasherke, mianangana ja Persia.

¹⁵ Yaalimanununa ha tangwa lia muchitatu lia kakweji wa Adare ha mwaka wa muchisambano wa kuyula cha mwanangana Dariuse.

¹⁶ Mba Aisraele, ni mahako, ni Alevi, ni eswe waze atuhukile mu undungo yaakunjika zuwo lia Zambi ni uwahililo.

¹⁷ Ha kukunjika lie zuwo yaatambula kuji a ngombe 100, ni mapanga 200, ni ana a mapanga 400. Ha mulambu wa shili yaalambula kuji a pembe kumi ni aali, nikulita ni mavungu ja Aisraele.

¹⁸ Yaasela nawa mahako mu ngango jo ni Alevi ni mikana yo milimo ya zuwo lia Zambi mu Yerusaleme, nikulita ni Shimbi ja mu mukanda wa Mose.

Chiwanyino cha Kubalika

¹⁹ Atu eswe waze atuhukile mu undungo yaafunga chiwanyino cha Kubalika ha tangwa kumi ni lia muchiwana lia kakweji mutangu wa mwaka uze wasulile ho.

²⁰ Mahako ni Alevi eswe te haalibemesa. Alevi yaashiha yimuna ya milambu ya chiwanyino cha Kubalika mumu hali atu eswe waze atuhukile mu undungo, ni hali mahako, ni hali ayo ene.

²¹ Ye milambu Aisraele eswe yaayilia, waze atuhukile mu undungo, ni waze te haalihandununa ku luchisa wa mavungu waze te atwama hamwe no mu chifuchi, waze ejile ni kuwayila Mwene Zambi, Zambi ya Aisraele.

²² Matangwa shimbiali yaawahilila nikulinga chiwanyino cha Mbolo Yize Kuyishi Yitumbo. Yaawahilila kuhiana mumu te Mwene Zambi halumuna mbunge ya mwanangana wa Asuria hakutwala kuli ayo. Neye yaakwasa kutungulula zuwo lia Zambi, Zambi ya Aisraele.