Ezra 5 - Mukanda Wa Zambi 1970

¹ Ha matangwa waze akwa munanyi aali, Hagai ni Zakaria, mwana wa Ido, yaabutuka kuhanjika munanyi mu jina lia Zambi ya Aisraele kuli Ayuda waze te atwama mu chifuchi cha Yuda ni mu limbo lia Yerusaleme.

² Muze Zerubabele mwana wa Shaltiele ni Yoshua mwana wa Jozadake heevwa maliji jo, yaabutuka kutungulula zuwo lia Zambi mu Yerusaleme, ni e akwa munanyi aali yaakwasa.

³ Susumuku Tatenai, mukwa kuyula wa chifuchi cha ku chitokelo cha lwiji Ufrateze, ni Shetare Bozenai ni masepa jo yeeza ku Yerusaleme, yaahula ngwo: “Iya wanuhele jila ya kutunga zuwo lino ni che chipanga chalio?”

⁴ Yaahula nawa majina ja malunga waze eswe akwashile kutungulula lie zuwo.

⁵ Alioze Zambi yabwa hamwe ni miata ja Ayuda, ni akwa kuyula ja Persia yaabatula ngwo, keechi kalinga nichimwe ndoo haasoneka mukanda kuli mwanangana Dariuse ni kutambula kumbululo.

⁶ Uno we mukanda uze asonekenene mwanangana ngwo:

⁷ “Vulie mwanangana Dariuse, tunanumeneka.

⁸ “Mwanangana, tunanunyingikisa ngwetu, yetu tunakaya ku chifuchi cha Yuda, yituwana, kuma zuwo lia Zambi munene kaanalitungulula ni mawe anene ni mitondo ya kukolesa nayo mambango. Milimo kaanayilingi ni utotombo Wahiana, yinayi kulutwe nikawashi.

⁹ “Yituhula akwa lutwe jo ngwetu, atulweze kama iya wanutayijile kutungulula lie zuwo ni che chipanga chalio.

¹⁰ Yitwahula nawa majina jo mba hanga tuhase kunulweza ngwetu akwa lutwe ja milimo yize aya.

¹¹ “Yaakumbulula ngwo: ‘Yetu tuli tuvumbi twa Zambi ya mwilu ni hashi. Tunatungulula zuwo lize umwe mwanangana wa tachi wa Israele atungile ha miaka ya kunyima.

¹² Alioze muze tushakulu twetu heevwisa Zambi ya Mwilu ufwatulo, mwe Zambi yaakunjika mu moko ja Nebukanezore, mwanangana wa Babilonia, umwe mwanangana wa ku Chikota cha Kaldea. Yabuzula lie zuwo lia Zambi, yatwala e atu mu undungo ku chifuchi cha Babilonia.

¹³ Mba ha mwaka utangu wa kuyula cha mwanangana Siruse wa Babilonia, mwe mwanangana yahana Shimbi atungulule zuwo lia Zambi.

¹⁴ Yahilwisa yikashi yeswe ya prata ni oru yize mwanangana Nebukanezore achijile mu zuwo lia Zambi mu Yerusaleme ni kuyitwala mu zuwo lia zambi mu Babilone. Mwanangana Siruse yakunjika yikashi yino mu moko ja umwe lunga Sheshbazare, yoze atongwele iye mwene abwe mukwa kuyula mu Yuda.

¹⁵ Mwanangana yamwamba hanga ayihilwise ku Yerusaleme, ni kutungulula zuwo lia Zambi homa haze liabwile hatangu.

¹⁶ Kashika Sheshbazare yeza, yeseka fundamentu yalio. Chize ku tangwa lize te kaakutunga zuwo lize, alioze lie zuwo te kanda lichihwa.’

¹⁷ “Haliabwila mwanangana, ni chinalite, ni yenu hengulenu mu mikanda ya sango ja mianangana a Babilone hanga numone nyi chamwenemwene mwanangana Siruse hanahane Shimbi ya kutungulula zuwo lino mu Yerusaleme, hanga nutulweze chize chili upale wenu ha chikuma chino.”