Ezra 4 - Mukanda Wa Zambi 1970

Akwa kole yaakwika Ayuda kutunga zuwo lia Zambi

¹ Akwa kole ja Ayuda ni Abenjamine yeevwa ngwo, atu waze atuhukile mu undungo kaanatungulula zuwo lia Mwene Zambi, Zambi ya Aisraele.

² No yaaya kuli Zerubabele ni miata ja majimo ni kwamba ngwo: “Tutayizenu kama hanga tulichinge ni yenu tutunge zuwo lia Zambi. Twakuwayila Zambi umuwika, ni twakumulambula milambu chize kuze mwanangana Esarhadone wa Asuria atutumine ni kutwama kuno.”

³ Alioze Zerubabele, ni Yoshua, ni miata ja majimo yaakumbulula ngwo: “Kutwazangile nutukwase kutungulula zuwo lia Mwene Zambi, Zambi yetu. Mutulinga yetwene ngwe chize mwanangana Siruse hanatwambe.”

⁴ Hohene akwa chifuchi yaaheta, yaakumuna moko ja Ayuda nikuvwisa e akwa kutunga woma.

⁵ Yaafweta mbongo kuli akwa kuyula hanga abinjise Ayuda matangwa eswe a mwanangana Siruse ndoo ku kuyula cha Dariuse mu Persia.

Akwa kole yaakanjisa Ayuda kutungulula Yerusaleme

⁶ Ha kabutu ka kuyula cha mwanangana Ahashueru, akwa kole ja Ayuda waze te atwama mu chifuchi cha Yuda ni mu limbo lia Yerusaleme yaasoneka mukanda wa kwasuma mulonga.

⁷ Nawa ha matangwa ja kuyula cha mwanangana Artasherke mu chifuchi cha Persia, Bishlame, ni Mitredate, ni Tabele, ni masepa jo yaasonekena mwanangana mukanda. We mukanda yaausoneka mu liji lia arame, ha kuutanga chatamba kuulumbununa.

⁸ Rehume, mukwa kuyula, ni Shimshai, mukwa kusoneka, yaasoneka mukanda kuli mwanangana Artasherke hakutwala kuli akwa Yerusaleme. Yaabutula mukanda ni maliji wano ngwo:

⁹ “Yetu, Rehume mukwa kuyula, ni Shimshai mukwa kusoneka, ni masepa jetu ngaji ni tuvumbi twenu eswe waze twatuhukile mu membo ja Ereke, ni Babilone, ni Shushane mu chifuchi cha Elame,

¹⁰ hamwe ni atu akwo waze mwanangana munene ni wa tachi Ashurbanipale akatwishile ku mahio ni anehene ku limbo lia Samaria ni membo akwo ku chitokelo cha lwiji Ufrateze!”

¹¹ Yaasoneka ngwo: “Vulie mwanangana Artasherke! Yetu tuvumbi twenu a ku chitokelo cha Ufrateze tunasoneka mukanda uno.

¹² “Vulie mwanangana! Tunanunyingikisa ngwetu, Ayuda waze atuhukile mu yifuchi yenu yikwo haatunga mu Yerusaleme. Kaanatungulula limbo lize libi ni lia uhulia. Haabutula kutunga yipanga, hasala hakepe ayimanunune.

¹³ Mwanangana, limbo lino nyi ngwe alitungulula, ni yipanga yalio yakukoleka, atu hikeechi kulambula nawa milambu, ni mbongo mu mushete wa wanangana mujikeha.

¹⁴ Tuli mu chiyulo chenu, kashika kutwachizangile.

¹⁵ Tunanyongo ngwetu, chibema mwanangana kuhana Shimbi ya kuhengula mu yisoneko ya tushakulu twenu. Nyi nwachilinga munumona ngwenu, akwa limbo lino kuma matangwa eswe te kaakwete uhulia. Chize ku shakulu te kaakuneha Vunda kuli mianangana ni akwa kuyula a mu chifuchi. Atu jamo matangwa eswe kaabwile akalu kuli akwa lutwe. Kashika akwa lutwe yaabuba lie limbo.

¹⁶ Yetu tunaliange kulimwisa mwanangana ngwetu, nyi ngwe limbo lino alitungulula hamwe ni ye yipanga yalio, mwanangana yenu kunuchi kuhasa nawa kuyula chifuchi cha ku chitokelo cha Ufrateze.”

¹⁷ Mba mwanangana yakumbulula ngwenyi: “Kuli Rehume mukwa kuyula, ni Shimshai mukwa kusoneka, ni masepa jo eswe waze atwama mu Samaria ni akwo waze atwama ku chitokelo cha Ufrateze, mwoyo wenu.

¹⁸ “Mukanda uze nunakatuma haangutangila wo ni haangulumbunwina wo.

¹⁹ Ngunakahana Shimbi ya kuhengula ye yisoneko. Haawana ngwo, chize ku miaka yikulu akwa Yerusaleme haanalimika ni chiyulo cha mwanangana; chikwo nawa, tuhulia ni akwa Vunda te kaakubwa mukachi ko.

²⁰ Mianangana a tachi te akuyula chifuchi chize ku chitokelo cha Ufrateze, te kaakutambula milambu ni mwombo.

²¹ Kashika chanutamba kuhana Shimbi ngwenu, atu waze alitwamine kutungulula lie limbo ndoo ni muze hinahana nawa Shimbi yikwo.

²² Chilingenu nikawashi, hanga chibi nichimwe chikwo kuchichi kwiza mu wanangana wami.”

²³ Muze Rehume ni Shimshai ni masepa jo haatanga mukanda uze, yaaya nikawashi ku Yerusaleme, yaakanjisa Ayuda ni tachi kulitwamina kutungulula lie limbo.

Milimo ya kutungulula zuwo lia Zambi yiibutuka nawa

²⁴ Chenacho Ayuda alitwaminyine kutungulula zuwo lia Zambi ndoo ni ku mwaka wa muchaali wa kuyula cha Dariuse mu Persia.