Ezra 3 - Mukanda Wa Zambi 1970

Aisraele yabutula nawa kuwayila Zambi

¹ Ha kakweji wa muchishimbiali Aisraele eswe yaatwama mu membo jo. Mba ayo eswe yaalikungulula mu limbo lia Yerusaleme.

² Yoshua mwana wa Jozadake, ni usoko wenyi mahako, ni Zerubabele mwana wa Shaltiele, hamwe ni usoko wo, yaatungulula chilumbilo cha Zambi ya Aisraele, hanga ahase kulambwila ko milambu ya kwocha nikulita ni Shimbi ja Mose, kavumbi ka Zambi.

³ Atu waze atuhukile mu undungo yeevwila akwa chifuchi woma. Alioze chibwe chocho yaatungulula chilumbilo homa haze chabwile hatangu. Mba yaabutuka nawa kwochela ho milambu chichamene ni chingoloshi.

⁴ Yaalinga chiwanyino cha Yikulika nikulita ni Shimbi; tangwa ha tangwa yaalambula milambu yize yinalite.

⁵ Chikwo nawa, yaalambula milambu ya kwocha uupu tangwa ha tangwa, ni milambu ya chiwanyino cha Kakweji Mwaha, ni milambu ya yiwanyino yeswe yikwo, ni milambu ya kuzanga cho ene.

⁶ Chibwe te atu kanda achibutuka kutungulula zuwo lia Zambi, yaabutuka kwocha milambu ya Mwene Zambi ha tangwa litangu lia kakweji wa muchishimbiali.

Aisraele yaabutuka kutungulula zuwo lia Zambi

⁷ Atu yaahana mbongo ja kufweta tungi ni akwa kusonga mabaya. Yaahana nawa yakulia, ni yakunwa, ni maji a olive ya kutuma mu membo ja Tiru ni Sidone ya kusumbakenya nayo mitondo sedru ya ku chifuchi cha Libano, yize atu anehene nehene ha kalunga lwiji ndoo ku limbo lia Jope. Siruse, mwanangana wa chifuchi cha Persia, yaaha Shimbi yino.

⁸ Chenacho ha kakweji wa muchaali wa mwaka wa muchaali chize kuze ahilukile ku Yerusaleme, atu yaabutuka milimo. Zerubabele, ni Yoshua, ni enyembo jo akwo a mu chifuchi, ni mahako, ni Alevi, ni eswe waze atuhukile mu undungo ni kwiza ku Yerusaleme, yaalichinga ku milimo. Alevi eswe waze te haabwa ni miaka makumi aali ni helu yaapwisa akwa lutwe ni kutungulula zuwo lia Zambi.

⁹ Kalevi Yeshua ni ana jenyi a malunga ni usoko wenyi, ni Kadmiele ni ana jenyi a malunga (te jimo lia Hodavia) yaalichinga hanga abwe akwa lutwe a milimo ya kutungulula zuwo lia Zambi. (Alevi a ku jimo lia Henadade te kaakwakwasa.)

¹⁰ Muze atu haabutuka kusa fundamentu ya zuwo lia Zambi, mahako yaazala mahina jo a mahako, yaamana ko ni yitavwi mu moko jo, ni Alevi a ku jimo lia Asafe no yaamana ko ni yifwolo ya kwimba. Yaachichimieka Mwene Zambi nikulita ni Shimbi yize ahanyine mwanangana David.

¹¹ Yeemba miaso ya kuchichimieka nayo Mwene Zambi, ngwo: “Mwene Zambi kali mubema, kakuzanga Aisraele ndoo ku miaka yeswe.” Atu eswe yaakololoka ni liji linene, yaachichimieka Mwene Zambi, mumu te haabutuka fundamentu ya zuwo lia Zambi.

¹² Anji a kuli makulwana ja mahako, ni Alevi, ni miata ja majiko waze amwene zuwo lia Zambi litangu, muze haamona chize akwa milimo haabutuka kutunga fundamentu ya zuwo lia Zambi haha, yaalila chikolo. Alioze akwo waze abwile ko yaakololoka ni uwahililo.

¹³ Kukwabwile ko niumwe yoze wahashile kusa chinyingi mukachi ka kukololoka ni kulila mumu zungo lize liabwile ko liokele naye. Atu yaalivwa kusuku.