Ezra 10 - Mukanda Wa Zambi 1970

Kulakula mapwo ja yilambala

¹ Muze te Ezra anafulamana hashi nikulemba kulutwe lia zuwo lia Zambi, nikulila, nikushikisa milonga yino, mbunga yinene ya Aisraele, malunga, ni mapwo, ni ana, yaakunguluka kuli iye, yaalila kuhiana.

² Mba Shekania mwana wa Jehiele, wa ku jimo lia Elame, yambila Ezra ngwenyi: “Twavulumuna ku meso ja Zambi ni kumbata mapwo ja yilambala. Chibwe chocho twakusa mbunge kuli Zambi.

³ Haliabwila tukolesenu Usendo ni Zambi yetu, tulakulenu mapwo wano ni e ana jo hamuwika. Mutulinga chize yena Ezra ni akwenu waze akulemesa Shimbi ja Zambi nunambe. Mutulinga nikulita ni Shimbi ja Mwene Zambi.

⁴ Chino chili mu chiyulo che kuchilinga. Yetu tunachitayiza, kashika hamuka uchilinge.”

⁵ Mba Ezra yakatuka, yashingisa miata ja mahako, ni ja Alevi, ni ja Aisraele eswe ngwenyi: “Mutulinga nikulita ni maliji wano.”

⁶ Ezra yakatuka kulutwe lia zuwo lia Zambi, yanjila mu zuwo lia Jehohanane mwana wa Eliashibe, yabomba ko tangwa lize. Kalile ko, chibwe kunwa ka, yanenganyana mumu ha uhulia wa atu waze atuhukile mu undungo.

⁷ Yatwa mutambi ndusu mu Yerusaleme ni mu chifuchi cha Yuda ngwo, eswe waze atuhukile mu undungo akunguluke mu Yerusaleme,

⁸ nikulita ni maliji ja miata ja atu. Nyi ngwe umwe kejile ko ha matangwa atatu, yikumba yenyi yeswe maamutambula yo, ni kechi kubwa nawa mu mbunga ya Aisraele.

⁹ Chenacho ha matangwa atatu, ha tangwa lia makumi aali a kakweji wa muchilivwa, malunga eswe a mu yifuchi ya Yuda ni Benjamine yaakunguluka kulutwe lia zuwo lia Zambi. Vula yanoka munji. Kashika, mumu ha vula ni mumu ha chikuma chize, atu yaachikima nganganga.

¹⁰ Mwe hako Ezra yakatuka, yaamba ngwenyi: “Hinwavulumuna, mumu nunakambata mapwo ja yilambala. Ha chino hinwakokela Aisraele chitela.

¹¹ Kashika haliabwila, shikisenu milonga yenu kuli Mwene Zambi, Zambi ya tushakulu twenu, nulinge yize yinamuwahila. Lihandununenu kuli yilambala waze atwama mu chifuchi chetu, nulakule mapwo jenu a yilambala.”

¹² Akwa Chikungulwila eswe yaakumbulula ni liji linene ngwo: “Mutulinga yeswe yize hiwamba.

¹³ Alioze atu hooka ni vula munji uliko. Kutwahashile kumana hano shimbu linene. Yino hi milimo ya tangwa limuwika hanji matangwa aali ko, mumu twavulumuna kuhiana,

¹⁴ Chinalite miata jetu atwame mu Yerusaleme ni kutala chikuma chino. Mba mweswawo hanambata pwo wa chilambala eze ha shimbu lize linalite, akunguluke hamwe ni miata ni ngaji ja mu limbo lienyi. Chenacho chatamba kulinga mba mutuchiza ufwatulo wa Zambi mumu ha chikuma chino.”

¹⁵ Atu eswe yaatayiza maliji wano, shina Jonatane mwana wa Asahele ni Jazeya mwana wa Tikva eno alitunyine. Meshulame ni umwe Kalevi Shabetai yaakolesa uhulia wo.

¹⁶ Atu waze atuhukile mu undungo yaatayiza manyonga waze, mba hako Ezra yatongola malunga a ku mbunga ya miata ja majimo, yaasoneka majina jo. Ha tangwa litangu lia kakweji wa muchikumi yaabutula kusopa che chikuma.

¹⁷ Mba ha tangwa litangu lia kakweji mutangu yaamanununa kusopesa mulonga uze.

Malunga waze ambachile mapwo yilambala

¹⁸ Wano e majina ja malunga waze ambachile mapwo yilambala: Mahako nikulita ni majimo wano: Jimo lia Yoshua ni anakwo, ana ja Jehozadake: Maseya, ni Eliezere, ni Jaribe, ni Gedaliya.

¹⁹ Yaalakenya kuukula mapwo jo, yaaneha kuji a mapanga mumu ha mulonga wo.

²⁰ Jimo lia Imere: Hanani ni Zebadia.

²¹ Jimo lia Harime: Maseya, ni Eliya, ni Shemaya, ni Jehiele, ni Uzia.

²² Jimo lia Pashure: Elionai, ni Maseya, ni Ishmaele, ni Netanele, ni Jozabade, ni Elasa.

²³ Alevi: Jozabade, ni Shimei, ni Kelaya, (jina likwo te Kelita), ni Petahia, ni Yuda, ni Eliezere.

²⁴ Njimba: Eliashibe. Tufunga twa zuwo lia Zambi: Shalume, ni Teleme, ni Uri.

²⁵ Aisraele akwo: Jimo lia Paroshe: Ramia, ni Izia, ni Malkija, ni Mijamine, ni Eleazare, ni Malkija, ni Benaya.

²⁶ Jimo lia Elame: Matania, ni Zakaria, Jehiele, ni Abdi, ni Jeremote, ni Eliya.

²⁷ Jimo lia Zatu: Elionai, ni Eliashibe, ni Matania, ni Jeremote, ni Zabade, ni Aziza.

²⁸ Jimo lia Bebai: Jehohanane, ni Hanania, ni Zabai, ni Atalai.

²⁹ Jimo lia Bani: Meshulame, ni Maluke, ni Adaya, ni Jashube, ni Sheale, ni Jeremote.

³⁰ Jimo lia Pahate Moabe: Adna, ni Kelala, ni Benaya, ni Maseya, ni Matania, ni Bezalele, ni Binwi, ni Manase.

^31-32 Jimo lia Harime: Eliezere, ni Ishija, ni Malkija, ni Shemaya, ni Shimeone, ni Benjamine, ni Maluke, ni Shemaria.

³³ Jimo lia Hashume: Matenia, ni Matata, ni Zabade, ni Elifelete, ni Jeremai, ni Manase, ni Shimei.

^34-37 Jimo lia Bani: Madai, ni Amrame, ni Wele, ni Benaya, ni Bedeya, ni Keluhi, ni Vania, ni Meremote, ni Eliashibe, ni Matania, ni Matenai, ni Jasu.

^38-42 Jimo lia Binwi: Shimei, ni Shelemia, ni Natane, ni Adaya, ni Maknadebai, ni Shashai, ni Sharai, ni Azarele, ni Shelemia, ni Shemaria, ni Sahlume, ni Amaria, ni Josefe.

⁴³ Jimo lia Nebo: Jehiele, ni Matitia, ni Zabade, ni Zebina, ni Jadai, ni Joele, ni Benaya.

⁴⁴ Malunga wano eswe e ambachile mapwo yilambala. Yaalakula ni yaatwala hamwe ni e ana jo.