Ezekiel 9 - Mukanda Wa Zambi 1970

Lamba lia akwa Yerusaleme

¹ Mba yingwivwa Mwene Zambi kanakololoka ngwenyi: “Tweyenu kuno, yenu malunga waze munumwesa akwa limbo lamba. Tweyenu ni mikwale yenu.”

² Susumuku malunga asambano yaakatuka ku chikolo cha ku tunda ku norde ya zuwo lia Zambi, kaanambata mikwale yo. Yihabwa umwe lunga hamwe no, te unazala mahina atoma alefuna, kanambata sonekeso. Eswe yeeza, yaamana ku chilumbilo cha unengu.

³ Hohene uhenya wa Zambi ya Aisraele yiukatuka kuli akwa mwono a mwilu kuze wakubwa, yiuheta ku chikolo cha zuwo lia Zambi. Mwene Zambi yatambika lunga yoze te unazala mahina atoma ngwenyi:

⁴ “Yako mu limbo lieswe lia Yerusaleme, ufunjike ha mahina ja eswe waze akunenganyana ni kulibikala mumu ha yuma yeswe ya kuzelwokesa yize atu akulinga mu limbo.”

⁵ Yingwivwa Zambi kanambila malunga akwo ngwenyi: “Mukaulenu mu limbo; shihenu. Kanda nuhichika niumwe; kanda nwivwila niumwe keke.

⁶ Shihenu makulwana, ni akweze, ni ana mapwo, ni amama, ni ana. Alioze kanda nukwata niumwe yoze uli ni mufunda ha huma. Butulenu kuno ku zuwo lia Zambi.” Mba yaabutuka ni miata waze te anamana ku zuwo lia Zambi.

⁷ Zambi yaamba ngwenyi: “Chisenu zuwo lia Zambi. Zalisenu yiize ni afu. Butulenu milimo!” Chenacho abutukile kushiha atu mu limbo.

⁸ Shimbu te maachishiha shiha atu, yingusala ko ukawami. Yingufulamana hashi, nikukololoka ngwami: “Mwene Zambi, kuma unevwila Yerusaleme ufwatulo ni kushiha atu eswe waze haasala mu Israele, nyi?”

⁹ Zambi ngwenyi: “Aisraele ni Ayuda haanalingi ungulungulu Wahiana. Haanashihi atu mu chifuchi cheswe ni haanalingi ni uhenge Wahiana mu Yerusaleme. Kaanambe ngwo, yami Mwene Zambi hinehuka chifuchi cho, chisolo kwamona.

¹⁰ Alioze chichi kweevwila keke. Mungwalinga ngwe chize haanalingi akwo.”

¹¹ Mutu yoze te unazala mahina atoma alefuna yahiluka, yalweza Mwene Zambi ngwenyi: “Hinalinga chize wangwambanga.”