Ezekiel 8 - Mukanda Wa Zambi 1970

Usolwelo Wa Muchaali Wa Zambi Kuli Ezekiel ( 8:1—10:22 ) Kukombelela mahamba mu Yerusaleme

¹ Ha mwaka wa muchisambano ha tangwa lia muchitano lia kakweji wa muchisambano wa undungo wetu, miata ja Ayuda waze abwile mu undungo te nguli no mu zuwo liami. Susumuku Mwene Zambi yangusa kwoko.

² Munatala, yingumona Usolwelo unalifu ngwe mutu. Chize ku zalilo ndoo ku yiliato yahenya ngwe kahia. Chize ku zalilo ndoo ku mutwe yatemuka ngwe unengu wakucheka.

³ Yazoza Chuma chalifwa ngwe kwoko, yangukwata ku kambu. Mu Usolwelo uze Mwiku wa Zambi yiunguzundula mu tetela, yiungutwala ku limbo lia Yerusaleme. Yiungutwala ku chikolo cha ku norde cha yiize ya muchima ya zuwo lia Zambi. Mwenamo mwabwile umwe hamba yoze te wakuvwisa Zambi ufwatulo.

⁴ Yingumona uhenya wa Zambi ya Aisraele, ngwe chize naumwene muze nabwile ku mbumbulu ya lwiji Chebare.

⁵ Zambi yangwamba ngwenyi: “Mwana mutu, tala ku norde.” Munatala, yingumona hehi ni chilumbilo ku unjililo mwe hamba yoze wakuvwisa Zambi ufwatulo.

⁶ Mwene Zambi yangwamba ngwenyi: “Mwana mutu, unamono chize analingi, nyi? Tala yuma ya Aisraele ya kuzelwokesa yize analingi muno, nikunguhanga kusuku ni zuwo liami lia chijila. Muumona yuma yinji ya sonyi yahiana yino.”

⁷ Yangutwala ku chikolo cha yiize ya haze, yangulweza chituwa mu chipanga.

⁸ Yamba ngwenyi: “Mwana mutu, lokola chituwa mu chipanga hano.” Munalokola, yingumona chikolo.

⁹ Yangwamba ngwenyi: “Njila umone yuma yibi, yuma ya kuzelwokesa yize analingi mo.”

¹⁰ Yingunjila, yingumona yipanga yakujingilika ni yizulie ya tushitu waze akukalala, ni tushitu akwo a luchisa, ni mahamba waze te akukombelela Aisraele.

¹¹ Yikubwa miata ja Aisraele makumi shimbiali, Jazania mwana wa Shafane neye te kali hamwe no. Mutu mweswe yabwa ni chiyo cha ndeho (yimbia) cha kwochela yuma ya vumba libema; we mwishi yiufwindangana.

¹² Zambi yanguhula ngwenyi: “Mwana mutu, unamono chize miata ja Aisraele analingi ku tenga, nyi? Ayo eswe kaanakombelela mu chibatulo chize chinazala ni tuponya. Kaanambe ngwo: ‘Mwene Zambi katumwene! Hehuka chifuchi.’ ”

¹³ Mwene Zambi yangwamba ngwenyi: “Muumona yuma yikwo yize analingi ya kuzelwokesa yahiana yino.”

¹⁴ Mba yangutwala ku chikolo cha ku norde cha zuwo lia Zambi, yangulweza mapwo waze te analili zambi Tamuze.

¹⁵ Yahula ngwenyi: “Mwana mutu, unamono, nyi? Muumona yuma yikwo ya kuzelwokesa yahiana yino.”

¹⁶ Mba yangutwala ku yiize ya muchima ya zuwo lia Zambi. Hehi ni lie zuwo lia kuwayila, mukachi ka chilumbilo ni jila kwabwile malunga makumi aali ni atano. Kaanombu manyima jo kwe ku zuwo lia kuwayila, kaanafukama ni kutalikisa ku chivumbuko, kaanawayila tangwa.

¹⁷ Mwene Zambi yanguhula ngwenyi: “Mwana mutu, unamono, nyi? Ayuda wano kaahutukile ko kulitwamina kulinga yuma yeswe ya kuzelwokesa yize unamono hano ni kushiha atu mu chifuchi cheswe. Ayo kaakwiza kunokwene ku zuwo liami ni kunguvwisa ufwatulo kuhiana. Tala chize anangushililika kuhiana ni kungusosomba!

¹⁸ Kumaakamona ndundo jeswe ja ufwatulo wami. Chichi kwecha kwamwesa lamba, chichi kweevwila keke. Maakololoka kuli yami ni tachi jeswe, alioze chichi kubanjika.”