Ezekiel 7 - Mukanda Wa Zambi 1970

Mwene Zambi makabatwila Aisraele ha shimbu likepe

¹ Mwene Zambi yangwamba ngwenyi:

² “Mwana mutu, yami Mwene Zambi ngunambila chifuchi cha Israele ngwami lino lili tangwa liakusula lia chifuchi chenu cheswe!

³ “Aisraele, songo hilieza. Munumona ufwatulo wami, mumu ngunanubatwila ha yize nwalingile. Mungunufweta ha yuma yeswe yakuzelwokesa yize nwalingile.

⁴ Chichi kwecha kunumwesa lamba, chichi kunuvwila keke. Mungunumwesa lamba mumu ha yuma ya kuzelwokesa yize nwalingile. Mba mununyingika ngwenu, yami nguli Mwene Zambi.”

⁵ Mwene Zambi kanambe ngwenyi: “Lamba muliza nawa ni nawa.

⁶ Hikwahwa, songo hiliaheta. Hikwahwa.

⁷ Kuji ni tomo lienu hilianuheta waze nwatwama mu chifuchi chino. Tangwa hiliakundama lize yiwanyino kuyichi kubwa nawa homa ha kukombelela ha milundu, shina chimbangwinya.

⁸ “Ha shimbu likepe yenu eswe munumona ndundo ja ufwatulo wami. Ngunanubatwila mumu ha yize nwalingile, mungunufwetesa mumu ha yuma yenu yeswe ya kuzelwokesa.

⁹ Chichi kwecha kunumwesa lamba, chichi kunuvwila keke. Mungunumwesa lamba mumu ha yuma ya kuzelwokesa yize nwalingile. Mba mununyingika ngwenu, yami nguli Mwene Zambi, yoze wakunumwesa lamba.”

¹⁰ Tangwa lia lamba lia Aisraele hilieza. Upupilo hiweza. Kaakulisuta kuhiana.

¹¹ Upupilo wakukoka ungulungulu Wahiana. Chuma cho nichimwe muchisala ho, hanji ubite, chibwe ulamba, hanji uhenya.

¹² Tangwa hilieza, hiliabwa hakamwihi lize kulanda ni kulanjisa kuyichi kubwa nawa Chuma chilemu, mumu Zambi mamwesa atu eswe lamba.

¹³ Mukwa kulanjisa niumwe kechi kubwa ni mwono wa matangwa anji, amone nawa yuma yize hanatokesa, mumu Zambi kanevwila atu eswe ufwatulo. Yingulungulu keechi katwama ni mwono.

¹⁴ Chitavwi kanachihumuna, atu eswe kaanalikulika, alioze niumwe unayi ku jita, mumu Zambi mamwesa atu eswe lamba mu ufwatulo wenyi.

Zambi yamwesa Aisraele lamba mumu ha milonga yo

¹⁵ Mu majila muli tujita, mu mazuwo muli misongo ni zala. Yoze uli haze ku minda mafwa ni jita, ni yoze uli mu limbo mafwa ni misongo ni zala.

¹⁶ Amwe maachinyina ku milundu ngwe membe waze anevu woma a mu yikulo. Eswe maatwa mikuma mumu ha milonga yo.

¹⁷ Moko eswe maahonga, makungunwa eswe maalekumuka.

¹⁸ Atu maazala mianji, maachikima ni mwongo. Mitwe yo maayitewula tuwewe, eswe meevwa sonyi.

¹⁹ Maambila mbila oru ni prata yo mu majila ngwe Chuma cha luchisa. Kuyahashile kwalamwina ku ufwatulo wa Mwene Zambi. Kuyahashile kwakwasa ha kuhwisa zala yo hanji kukuchisa majimo jo. Oru ni prata hiyakokela milonga.

²⁰ Te hatangu kaakulengumuka nayo, alioze yaafula nayo mahamba a kuzelwokesa. Kashika Mwene Zambi yayipwisa ngwe yuma ya luchisa kuli ayo.

²¹ Mwene Zambi kanambe ngwenyi: “Mungutayiza yilambala kububa yuma yo ni yitanguke kwiya ubite wo ni kuubihisa.

²² Muze atu maabihisa zuwo liami lilemu lia chijila, muze eji maanjila mo ni kulijilula, chichi kwakinda.

²³ “Yuma yeswe yinabinji. Mu chifuchi cheswe kaakushiha atu; mu membo muli upupilo.

²⁴ Munguneha mavungu abi kuhiana hanga azuke mazuwo jenu. Atu jenu a tachi kuhiana maalekumuka muze mungutayiza mavungu kuchisa homa lio lia kuwayila.

²⁵ Kulifwita chineza. Munufupa uhwimino alioze kunuchi kubwa nawo.

²⁶ Lamba muliza nawa ni nawa, matangwa eswe munwivwa sango jibi. Munufupa akwa munanyi a Zambi anulumbunwine Usolwelo. Mahako keechi kubwa ni chimwe Chuma cha kulongesa atu, ni makulwana keechi kubwa ni yiyulo ya kwaha.

²⁷ Mwe mwanangana manenganyana, mwana wa mwanangana machiza ko mbunge; atu maachikima ni woma. Mungunumwesa lamba mumu ha yeswe yize nwalingile, mungunubatwila ngwe chize hinunabatwila akwo. Chino muchinulweza ngwo, yami nguli Mwene Zambi.”