Ezekiel 6 - Mukanda Wa Zambi 1970

Mwene Zambi yahisa atu mumu ha kukombelela mahamba

¹ Mwene Zambi yangwamba ngwenyi:

² “Mwana mutu, talikisa meso je ku milundu ya Israele, uyilongese maliji jami.

³ Ambulwila milundu ya Israele abanjike maliji ja Mwene Zambi, abanjike chize yami Mwene Zambi ngunambila milundu, ni mindundena, ni mambongo, ni yikulo ngwami, mungutuma mukwale ni kusalula muma mweswe akukombelela mahamba.

⁴ Yilumbiko yenu ya milambu muyikabuzukila hashi ni yilumbilo ya yuma ya vumba libema. Atu eswe kumaakaashihila ku mahamba jo.

⁵ Mungukamwangina afu ja Aisraele, mungukajingilika yifwaha yo ku yilumbilo yo.

⁶ Membo eswe ja Aisraele mungukaabuzula. Yilumbilo yo ya milambu ni yilumbilo ya yuma ya vumba libema ni mahamba jo maakayibuzwola tuyihanda tuyihanda. Yuma yeswe yize haalinga muyikatoka.

⁷ Atu kumaakafwila kweka ni kweka. Waze maakasala ni mwono, maakanyingika ngwo, yami nguli Mwene Zambi.

⁸ “Alioze mungutayiza amwe atwame ni mwono ni kumwangashanyina hakachi ka mavungu.

⁹ Kwenako maakabwa mu undungo. Mba maakewuluka ngwo, yami naamwesa lamba ni kwakolesa sonyi, mumu haanangwehuka ni mbunge jo jikalu. Yazanga mahamba kuhiana yami. Maakalivutwokela ha ungulungulu wo ni yibi yo yeswe yize haanalingi.

¹⁰ Maakanyingika ngwo, yami nguli Mwene Zambi, ni kutoweza chami te hi chamokomoko ko.”

¹¹ Mwene Zambi kanambe ngwenyi: “Likwatenu suswa mitwe, lilenu ni chinyengo mumu ha ungulungulu weswe, ni yuma yeswe ya yizelwokeso yize Aisraele haalinga. Kumaakafwa mu jita, ni zala, ni misongo.

¹² Waze ali kusuku maakafwa ni misongo; waze ali hakamwihi maakafwa mu jita; waze maakasala ni mwono maakafwa ni zala. Kumaakamona ndundo jeswe ja ufwatulo wami.

¹³ Afu maakaamwangina mukachi ka mahamba jo ni kujingilika yilumbilo, ni kwamwangina ha mindundena, ni ha milundu yeswe, ni mushi lia mitondo yeswe ya wisu ni mitondo yeswe yinene shene, ni kweswako akulambwila mahamba jo. Mba atu eswe maakanyingika ngwo, yami nguli Mwene Zambi.

¹⁴ Ewa, mungwolola kwoko liami ni kwenyeka chifuchi cho. Munguchipwisa chahululu, chize ku puya ya ku sude ndoo ni ku limbo lia Ribla ku norde, chichi kuhichika homa nihamwe. Mba maanyingika ngwo, yami nguli Mwene Zambi.”