Ezekiel 5 - Mukanda Wa Zambi 1970

Ezekiel yatewula kambu jenyi

¹ Mwene Zambi yamba ngwenyi: “Mwana mutu, anda mukwale uze unambuka, utewule wevu we ni kambu je jeswe. Mba anda je kambu, ujipezale mu yihanda yitatu.

² Ocha chimwe Chihanda mukachi ka limbo muze akwa kole haakumba lie limbo. Anda Chihanda chikwo uchilambelambe mukwale, ujingilike lie limbo. Chihanda cha muchitatu uchimwangina mu tetela hanga chihehuke ni fuji, yami munguchikaula ni mukwale wami.

³ Kasa jimwe kambu ku mahina je.

⁴ Chiza nawa jimwe jikwo, ujimbile ha kahia, jeche jiweme. Kahia mukakatuka ku kambu jize ni kukamwangina ha vungu lieswe lia Israele.”

⁵ Mwene Zambi yamba ngwenyi: “Tala Yerusaleme. Namusele mukachi ka hashi, yifuchi yikwo yamujingilika.

⁶ Alioze akwa Yerusaleme haakolema Shimbi jami, haalisolola yingulungulu kuhiana mavungu akwo. Haabwa yihulia kuhiana akwa yifuchi waze aajingilika. Akwa Yerusaleme kaatayijile kufunga yiyulo yami, haalituna kwononokena Shimbi jami.

⁷ Banjikenu yenu akwa Yerusaleme, chize yami Mwene Zambi ngunambe. Ha kukolema Shimbi jami ni kulituna yiyulo yami, hinwalikokela lamba kuhiana waze ananujingilika. Hinwembulula ndako ja mavungu akwo.

⁸ Kashika yami, Mwene Zambi, ngunanwambe ngwami, nguli mukwa kole yenu. Mungunubatwila, mavungu akwo eswe maachimona.

⁹ Mumu hinwalinga yuma yeswe yize nakuvutwokela, mungunumwesa lamba yenu akwa Yerusaleme, lize kanda ngumwesa kama nilimwe tangwa, lize chichi kalimwesa nawa atu.

¹⁰ Yisemi makalia ana jo, ni ana maakalia yisemi jo. Yenu waze munukasala, mungukanumwesa lamba ni kunumwangina sali ni sali.

¹¹ “Kashika, ni mwe yami Mwene Zambi, mumu hinwabihisa zuwo liami ni ungulungulu wenu ni yuma ya kuzelwokesa yize hinunalingi, mungunumwangina hashi heswe, chichi kunuvwila keke.

¹² Chihanda chimuwika cha yihanda yitatu ya atu jenu maakafwa ni misongo ni zala mu limbo; Chihanda cha muchaali muchikafwa ku mikwale haze lia limbo; Chihanda chakusula mungukaamwangina mu fuji ni kwahanga ni mukwale.

¹³ “Yenu kumunumona tachi ja ufwatulo ni utenu wami ndoo muukahwa. Muze yize yeswe hiyabwa munukanyingika ngwenu, yami Mwene Zambi hinahanjika kuli yenu mumu hinevwa ufwatulo mumu ha uhulia wenu.

¹⁴ Akwa mavungu eswe waze akunujingika, muze maakabalieka maakanuchoka.

¹⁵ “Muze mungukanuvwila wuli ni kunumwesa lamba, mavungu eswe waze akunujingilika maakalishimwoka. Maakanuvwila kuzelwoka, maakanuseha.

¹⁶ Chichi kunwaha nawa yakulia, munukafwa ni zala. Munukabwa ni lamba lia zala ngwe kunwasa mivwi.

¹⁷ Mungukanutumina zala, tushitu asasu, no maakashiha ana jenu. Mungukanutumina misongo, ni lamba, ni jita ya kunushiha. Yami Mwene Zambi nachamba.”