Ezekiel 44 - Mukanda Wa Zambi 1970

Chikolo cha ku chivumbuko chakukasa

¹ Mwe mutu yangutwala ku chikolo cha ku chivumbuko lia chipanga cha zuwo lia Zambi. Che chikolo chili chakukasa.

² Mwene Zambi yangwamba ngwenyi: “Chikolo chino muchikasala chakwajila, mutu niumwe kechi kazulula ko. Mutu niumwe mahasa kunjila mo nichimwe, mumu yami, Mwene Zambi ya Aisraele, hinanjilamo. Muchisala chakwajila.

³ Alioze mwe mukwa kuyula mahasa kuya ko ni kulia yakulia ya chijila ku meso jami. Akanjile ni kutuhuka mu unjililo wa chibatulo chinene cha muchima lia unjililo.”

Shimbi ja kunjila mu zuwo lia Zambi

⁴ Mba mwe lunga yangutwala ku chikolo cha ku norde kulutwe lia zuwo lia Zambi, yitunjila mo. Yingumona zuwo lia Zambi hiliazala ni uhenya wenyi, yingufulamana hashi.

⁵ Mba Mwene Zambi yangwamba ngwenyi: “Mwana mutu, kanyama ku yuma yeswe yize muumona ni yeswe yize muwivwa. Mungukwambulwila Shimbi jeswe ni yiyulo yeswe ya zuwo liami. Ushishika kanawa atu waze maahasa kunjila ni kutuhuka ni waze kaahashile.

⁶ “Ukalweza Aisraele, yihulia, ngwami, chichi kulihumikiza nawa ni yuma ya kuzelwokesa yize akulinga.

⁷ Haanajilula zuwo liami muze te akutayiza yilambala yilima, atu waze keeshi kungwononokena, kunjila mo muze te mahako akungulambwila milambu ya maji ni manyinga. Chenacho atu jami haashiha Usendo wami mumu ha yuma yo ya kuzelwokesa yize haanalingi.

⁸ Kaayulile ko yuma ya chijila mu zuwo liami, alioze yaahana chiyulo chize kuli yilambala.

⁹ “Yami Mwene Zambi ngunambe ngwami, niumwe chilambala chilima, niumwe yoze keshi kungwononokena, makanjila mu zuwo liami, chibwe chilambala yoze watwama mukachi ka Aisraele!”

Alevi kaahashile kubwa mahako

¹⁰ Mwene Zambi yangwamba ngwenyi: “Ngunamwesa Alevi lamba, waze angwehukile hamwe ni Aisraele akwo ni kukombelela mahamba.

¹¹ Maahasa kungulingila mu zuwo liami ni kufunga yikolo ni kulinga milimo ya ku zuwo liami. Maahasa kushiha yimuna waze atu maalambula milambu ya kwocha, chaatamba kulingila e atu.

¹² E ayo te e akukombelela mahamba mumu hali Aisraele, Chenacho ashinjikile Aisraele avulumune. Kashika yami Mwene Zambi ngunalishingi ngwami, mungukaamwesa lamba.

¹³ Keechi kangulingila nawa ngwe mahako, hanji kukundama ku chimwe Chuma cha chijila, hanji kunjila muma mwa chijila kuhiana. Lino lie lamba lio mumu ha yuma ya kuzelwokesa yize haanalingi.

¹⁴ Ngunahe shina milimo yimwe ya uvumbiko mu zuwo liami.”

Mahako

¹⁵ Mwene Zambi ngwenyi: “Alioze mahako a ku vungu lia Levi a ku jiko lia Zadoke yaanyongonona kungulingila ni mbunge yimuwika mu zuwo liami muze Aisraele akwo haangwehuka kulu. Kashika, haliabwila ayo chaatamba kungulingila ni kukundama ku meso jami mu kungulambula maji ni manyinga a milambu.

¹⁶ Ayo wika maakanjila mu zuwo liami ni kungulingila ku chilumbilo chami ni kubwa akwa lutwe a kuwayila mu zuwo liami.

¹⁷ Muze maakanjila mu unjililo wa yiize ya muchima ya zuwo liami, chaatamba kuzala mahina atoma alefuna. Kuchaatambile kuzala mahina akutunga ni ngona ja mapanga muze maakalinga mu yiize ya muchima hanji mu zuwo liami.

¹⁸ Kuchatambile kuhwimashana, kashika chaatamba kuzala tupusa ni mahina atoma alefuna, alioze muya ka.

¹⁹ Shimbu kanda te achituhuka mu yiize ya muchima ni kuya kuli atu, chaatamba kuzula mahina jo a uhako ni kwahichika mu mazuwo a chijila. Chaatamba kuzala mahina eka, mumu nyi maazala mahina a chijila atu waze lamba maamona.

²⁰ “Mahako kuchatambile kutewula tuwewe, hanji kubwa ni kambu jisuku jisuku. Chaatamba kujikamba.

²¹ Mahako kuchaatambile kunwa vinyu muze anambe kunjila mu yiize ya muchima.

²² Mahako kanda akambata pwo yoze haalakula. Chamutamba lume kumbata pwo Kaisraele yoze kanda achilimona ni lunga, hanji yoze hanafwisa hako mukwo.

²³ “Mahako akalongese atu jami kuhandununa yuma ya chijila ni yuma yikwo, yuma yibema ni yuma ya luchisa.

²⁴ Muze kubinda muchikabwa ko, mahako chaatamba kubatula mulonga nikulita ni Shimbi jami. Chaatamba kufunga yiwanyino nikulita ni Shimbi jami ni yiyulo yami; akafunge tangwa lia kuhwima.

²⁵ “Hako kanda alichisa ni kukwata mufu, shina chisemi chenyi, ni mwanenyi, ni mwanakwo, ni ndumbwenyi yoze kanda achiya ku ulo.

²⁶ Muze halibemesa, chamutamba kushimbwila matangwa shimbiali,

²⁷ mba himanjila mu yiize ya muchima lia zuwo liami ni kulambula mulambu wa kulibemesa chenyi, hanga alinge nawa mu zuwo liami. Yami Mwene Zambi nachamba.

²⁸ “Mahako maakabwa ni chiyulo cha kungulingila mu uhako. Keechi kabwa ni chihinga mu Israele ndoo ku yisemuko yeswe; yami mungukabwa chihinga cho.

²⁹ Milambu ya mbuto, ni milambu ya shili, ni milambu ya kuhilwisa ni kuwezela muyikabwa yakulia yo; akatambule yuma yeswe mu Israele yize maasela yami.

³⁰ Mahako akatambule mihuko yibema yahiana yize atu akubatula hanji kuhela, ni yuma yibema yahiana yize atu akungulambula. Yisuho yeswe atu maakalinga mbolo, akalambule mbolo yitangu kuli mahako, mba mungukawahisa majiko jo.

³¹ Mahako kuchaatambile kulia kajila hanji kashitu yoze wakulifwila, hanji yoze anakakwata kuli kashitu mukwo.”