Ezekiel 43 - Mukanda Wa Zambi 1970

Mwene Zambi kanahiluka ku zuwo lienyi

¹ Mwe lunga yangutwala ku chikolo chize chatala ku chivumbuko,

² mba yingumona uhenya wa Zambi ya Aisraele unakatuka ku chivumbuko. Liji lia Mwene Zambi yililifwa ni lundunjila wa meya anji, hashi yihabeyima ni uhenya wenyi.

³ Usolwelo uno te unalifu ni uze namwene muze Zambi ejile ni kwenyeka Yerusaleme, ni uze namwene ku mbumbulu ya lwiji Chebare. Mba yingufulamana hashi.

⁴ Uhenya wa Zambi yiubalika mu chikolo cha ku chivumbuko, yiunjila mu zuwo lia Zambi.

⁵ Mwiku wa Mwene Zambi yiunguzundula, yiungutwala mu yiize ya muchima ya zuwo lia Zambi, mwenamo namwene chize uhenya wa Zambi unazalisa lie zuwo.

⁶ Mwe lunga yamana ku sali liami, mba yingwivwa Mwene Zambi mu zuwo lienyi kananguhanjikisa ngwenyi:

⁷ “Mwana mutu, chino che chitwamo chami. Mungukatwama muno mukachi ka Aisraele ni kwayula ndoo ku miaka yeswe. Chibwe Aisraele chibwe mianangana jo keechi kakolesa nawa jina liami lia linanga sonyi mu kuwayila mazambi akwo ni kufunda mianangana jo muma muno.

⁸ Mianangana haanatungu yikolo ya mazuwo jo yiisulangana ni yikolo ya zuwo liami, kashika hikwasala lume mbango yimuwika mukachi ketu. Yaakolesa sonyi jina liami lia linanga ku yitanga yo yeswe ya kuzelwokesa, kashika yingwoonona mu ufwatulo wami.

⁹ Haliabwila chaatamba kulitwamina kuwayila mazambi akwo ni kuchiza afu, enoo mianangana jo. Nyi maachilinga, mungukabwa mukachi ko ndoo ku miaka yeswe.”

¹⁰ Mwene Zambi yaweza ho ngwenyi: “Mwana mutu, lumbunwina Aisraele hakutwala ku zuwo liami, alilongese chize libwa. Eevwise sonyi mumu ha yitanga yo yibi.

¹¹ Mba nyi meevwa sonyi ha yize haanalingi, hialweze chizulie cha zuwo liami, alumbunwine yiize, ni mazuwo, ni yibatulo, ni unjililo, ni utuhukilo, ni chize alulikile yuma yeswe, ni Shimbi jalio jeswe. Soneka yuma yino yeswe hanga anyingike chize alulikile yuma yeswe ni hanga afunge Shimbi jeswe.

¹² Yino ye Shimbi ya zuwo liami: Chihela cheswe chize chakujingilika zuwo liami ha mulundu chili chijila kuhiana.”

Chilumbilo

¹³ Yino ye ngeseko ya chilumbilo nikulita ni kweseka cha metro yize te heseka nayo zuwo lia Zambi. Kapila te kanajingilika chilumbilo, Usuhwe wenyi sentimetro makumi atano, ni unene wenyi sentimetro makumi atano, ku sali lia haze yikubwa mukomo wa sentimetro makumi aali ni jitano ha Usuhwe.

¹⁴ Chilumbilo yichibwa ngwe unyinyino wa ngango jitatu. Chizundamo cha Chipinji chitangu yichibwa metro yimuwika. Chizundamo cha Chipinji cha muchaali yichibwa metro jaali. Ngango yitangu yize te yajingilika chilumbilo yiibwa sentimetro makumi atano, ni ngango ya muchaali chizechene.

¹⁵ Chizundamo cha Chipinji cha muchitatu, haze te akwochela milambu, yichibwa metro jaali. Ha Chipinji cha muchitatu ha mbango ni mbango yihabwa mbinga jiwana.

¹⁶ Helu lia chilumbilo mbango jaho yijilita ndwa, sali ni sali metro jisambano.

¹⁷ Chipinji cha hakachi mbango jacho yijilita nawa, sali ni sali metro shimbiali. Ku sali ni sali yikubwa mukomo wa sentimetro makumi aali ni jitano ha Usuhwe. (Kapila yabwa ni sentimetro makumi atano ha unene.) Unyinyino yiubwa ku sali lia chivumbuko.

Kukunjika chilumbilo kuli Zambi

¹⁸ Mwene Zambi yangwamba ngwenyi: “Mwana mutu, banjika chize ngunakwambe. Muze hatunga che chilumbilo uchikunjika kuli yami Mwene Zambi ni kwochela ho milambu ni kusapwila ho manyinga ja yimuna waze munulambula.

¹⁹ Mahako a ku vungu lia Levi a ku jimo lia Zadoke, shina ayo chaatamba kuheta ku meso jami akangulingile. Yami Mwene Zambi ngunahana Shimbi yino. Ukaaha chimbembe wa kuji akalambule mulambu wa shili.

²⁰ Ukanda amwe manyinga jenyi ni kwakwita ha mbinga ja ha mambango ni mu mambango a chilumbilo, ni ha mikomo yize yinachijingilika. Chenacho muukabemesa chilumbilo ni kuchikunjika kuli yami Mwene Zambi.

²¹ Ukanda mwe chimbembe wa kuji yoze maakalambula mulambu wa shili ni kumwochela homa ha kutongola haze lia Chihela cha chijila.

²² Ha tangwa lia muchaali Ukanda kuji a pembe yoze keshi kapalia ukamulambula mulambu wa shili. Ukabemesa chilumbilo ni manyinga jenyi ngwe chize walingile ni chimbembe.

²³ Muze hiwalinga Chenacho, Ukanda umwe chimbembe wa kuji ni umwe kuji a panga, eswe aali keeshi kapalia,

²⁴ ukanguneheno. Mba mahako akalakumwine ho mungwa ni kwoocha akangulambule.

²⁵ Ha matangwa shimbiali, tangwa ni tangwa ukalambula pembe umuwika, ni kuji a ngombe umuwika, ni kuji a panga umuwika, ni mulambu wa shili, yimuna eswe atatu keeshi kapalia.

²⁶ Ha matangwa shimbiali mahako akabemese che chilumbilo akachilulike a kalambwile ho milambu.

²⁷ Muze matangwa shimbiali haabalika, mahako akabutuke kulambwila ho milambu ya atu, ya kwocha ni ya kulivwa ni yami. Mba mungukawahilila nenu. Yami Mwene Zambi nachamba.”