Ezekiel 41 - Mukanda Wa Zambi 1970

¹ Hohene mwe lunga yangutwala ku chibatulo cha hakachi, mwe muma mwa chijila. Yeseka unjililo: Usuhwe wawo metro jitatu,

² unene wawo metro jitano, ni ndama ya mambango sali ni sali metro jaali ni Chipinji. Yeseka che chibatulo: Usuhwe wacho metro makumi aali, unene wacho metro kumi.

³ Mba yanjila mu chibatulo cha muchima. Yeseka unjililo: Usuhwe wawo metro yimuwika, unene wawo metro jitatu, ni ndama ya mambango sali ni sali metro jitatu ni Chipinji.

⁴ Yeseka che chibatulo: ha usuku ni ha unene yichibwa metro kumi. Mba yangulweza ngwenyi: “Muno mwe muma mwa chijila kuhiana.”

Yibatulo yakununga ni mambango ja zuwo lia Zambi

⁵ Lunga yoze yeseka ndama ya mbango ya muchima ya zuwo lia Zambi, yiibwa metro jitatu. Yakununga ni mbango yino, yiibwa yibatulo yikepe yikepe yize yinajingilika zuwo lia Zambi, unene wayo te metro jaali.

⁶ Yibatulo yino te yakununga helu, mulongo ni mulongo yiubwa ni yibatulo makumi atatu. Mbango ni mbango ya yibatulo yino yitatu te kuyishi ni ndama yimuwika. Mbango ya kushi ndama yinene, mbango ya muchaali ni ndama yikepe, mbango ya helu ndama yikepe kuhiana. Kashika ha mbango ja zuwo kaasele ho mikambo.

⁷ Hakwatala haze, te kaakumoneka ngwe kaali ni ndama yimuwika chize kushi ndoo helu. Ku mambango ja haze yaatunga ko ndalo jinene jaali, hanga atu ahase kukatuka ku yibatulo ya kushi ni kunyina ku yibatulo ya hakachi ni ya helu.

^8-11 Ndama ya mambango ja yibatulo yino te metro jaali ni Chipinji. Yibatulo ya ku norde yiibwa ni chikolo chimuwika ni yibatulo ya ku sude, neyo yiibwa ni chikolo chimuwika. Yingumona Senge te yinajingilika zuwo lia Zambi: unene wayo metro jaali ni Chipinji, chizundamo chayo metro jitatu, yiibwa ni ngeseko yimuwika ni fundamentu ya yibatulo yize te yajingilika mambango ja zuwo lia Zambi. Mukachi ka ye Senge ni yibatulo ya mahako yimubwa homa hamokomoko ha kapinji ka metro kumi ku sali lia zuwo lia Zambi.

Zuwo lia ku chitokelo

¹² Ku chitokelo cha zuwo lia Zambi yikubwa limwe zuwo lize te liatala homa hamokomoko, Usuhwe walio metro makumi awana ni jitano, unene walio makumi atatu ni jitano, ni ndama ya mambango metro jaali ni Chipinji sali ni sali.

Unene weswe wa zuwo lia Zambi

¹³ Mwe lunga yeseka mbango ya haze ya zuwo lia Zambi, Usuhwe walio metro makumi atano. Chize kunyima lia zuwo lia Zambi, kuhiana homa hamokomoko ndoo kunyima lia zuwo lize ku chitokelo yikubwa metro makumi atano.

¹⁴ Unene wa zuwo lia Zambi kulutwe hamwe ni homa hamokomoko sali ni sali te metro makumi atano nawa.

¹⁵ Yeseka zuwo lia ku chitokelo lia zuwo lia Zambi hamwe ni majila jalio sali ni sali, te metro makumi atano. Senge lia zuwo lia Zambi, ni muma mwa chijila, ni muma mwa chijila kuhiana

Kutoma cha yuma ya mu mambango a mu zuwo lia Zambi

¹⁶ yeswe yiibwa ya mabaya, chize hashi ndoo ku tupenda. Tupenda no yaabwa akufuka.

¹⁷ Mu mambango chize hashi ndoo helu lia yajilo yimubwa yuma yakutoma

¹⁸ ya mingaji ni akwa mwono a mwilu. Ye mingaji ni akwa mwono yiibwa yakusowela, yiijingilika che chibatulo. Mukwa mwono mweswe te kali ni mahuma aali:

¹⁹ huma lia mutu lize te Hatala ku mingaji sali limuwika, ni huma lia tambwe lize te Hatala ku mingaji sali likwo. Chenacho ajingilikile mu mambango eswe,

²⁰ chize hashi ndoo helu lia yikolo.

²¹ Manguji a ku chikolo a muma mwa chijila yaabwa a mbango jiwana a ngeseko yimuwika. Kulutwe lia unjililo wa muma mwa chijila kuhiana yikubwa chimwe Chuma chalifwa

Chilumbilo cha mabaya

²² ni chilumbilo cha mabaya. Yichibwa metro yimuwika ni Chipinji ha chizundamo ni metro yimuwika ha unene. Mbango, ni umanyino, ni malumbu yacho te ya mabaya. Mwe mutu yangwamba ngwenyi: “Yino yili mesa yize yakubwa ku meso ja Mwene Zambi.”

Yajilo ya zuwo lia Zambi

²³ Ku songo lia unjililo wa muma mwa chijila yikubwa chikolo, ni ku songo lia unjililo wa muma mwa chijila kuhiana neko yikubwa chikolo.

²⁴ Mu chikolo ni chikolo yimubwa yajilo yaali yakutakanyina mukachi.

²⁵ Ha yajilo ya muma mwa chijila yihabwa mingaji ni akwa mwono a mwilu akutoma ngwe ha mambango. Yikubwa chifuko cha mabaya haze ku che chikolo.

²⁶ Ku sali ni sali mu mambango ja chibatulo yimubwa tupenda, ni ha mambango mingaji yakwola.