Ezekiel 4 - Mukanda Wa Zambi 1970

Ezekiel yalinga yilayi ya jita ya ku Yerusaleme

¹ Mwene Zambi yamba ngwenyi: “Mwana mutu, anda tujolo (briki) waze ali kulutwe lie, funjika ho limbo lia Yerusaleme.

² Mba ha kulumbununa jita shima mena, lumbika milumba ya mavu, sako misumba ya tujita, ni kujingilika mitondo ya kubuzula nayo chipanga cha limbo.

³ Anda ndeho (yimbia) ya utale uyisa ngwe chipanga mukachi ka yena ni lie limbo. Talikisa ko meso je. Mwe yena uli yoze unase no jita. Chino muchibwa chinyingi ku vungu lia Israele.

^4-5 “Kashika hibomba hashi ku sali lia umama hanga ngukushachike milonga ya vungu lia Israele. Muukabwa ko matangwa 390 nikumona lamba mumu ha milonga yo. Chenacho muukambata lamba lia Aisraele, tangwa limuwika ha mwaka ni mwaka.

⁶ Muze hiwamanununa Chenacho, hitewulukila ku sali lia utata hanga umone lamba mumu ha milonga ya Ayuda ha matangwa makumi awana, tangwa limuwika ha mwaka ni mwaka.

⁷ “Talikisa meso je ku jita ku Yerusaleme. Mba vunga kome, mika kwoko ku Yerusaleme ni kuhanjika munanyi ulimike nalio.

⁸ Mungukukasa hanga uchine kutewuluka ku sali likwo ndoo kumanunuka cha jita.

⁹ “Haliabwila anda tiriku, ni masa, ni makunde a chibuyu, ni landa, ni masangu, uyichinge ni kuyilinga mbolo. Yenayo muulia ha matangwa waze 390 unabombela ku sali lia umama.

¹⁰ Muuhasa kubwa ni grame 230 ja mbolo tangwa ha tangwa, kanda uwezela ho.

¹¹ Meya muuhasa kunwa lume misenge yaali tangwa ha tangwa.

¹² Ukawika kahia ha tuji twa atu ku meso jo, Ukocha ho ye mbolo, ukayilia ku meso jo.”

¹³ Mwene Zambi yamba ngwenyi: “Chino chinalumbununa chize Aisraele maakalia yakulia ya luchisa, muze mungukaahumina ku yifuchi ya yilambala.”

¹⁴ Alioze yami yingukumbulula ngwami: “Kaa, Mwene Zambi! Kanda ngulipwisa kama mutu wa luchisa. Chize ku kusemuka chami kanda ngulia kama yifwo ya kashitu wa kulifwila, hanji yoze akwatanga kuli kashitu mukwo. Chibwe yakulia ya luchisa kanda nguyilia kama.”

¹⁵ Mba Zambi yamba ngwenyi: “Chibema. Nakutayiza. Anda pinga ja ngombe, hanga wocheho mbolo ye.”

¹⁶ Yaweza ho ngwenyi: “Mwana mutu, akwa Yerusaleme chichi kwaha nawa mbolo. Atu jamo maakalibikala, maakamona lamba ni kweseka yakulia yize maakalia ni meya aze maakanwa.

¹⁷ Maakafupa mbolo ni meya; maakalekumuka. Maakawangama mumu ha milonga yo.”