Ezekiel 21 - Mukanda Wa Zambi 1970

Mukwale wa Mwene Zambi

¹ Mwene Zambi yangwamba ngwenyi:

² “Mwana mutu, bajila akwa Yerusaleme, bajila atu waze akuwayila mazambi eka homa ha kuwayila, toweza akwa chifuchi cha Israele ngwe,

³ yami Mwene Zambi ngunambe ngwami, nguli mukwa kole yenu. Mungutomona mukwale wami ni kunushiha yenu eswe, ni abi ni abema.

⁴ Mungwanda mukwale wami ni kulimika ni atu eswe chize ku norde ndoo ku sude.

⁵ Atu eswe maakanyingika ngwo, yami Mwene Zambi hinatomona mukwale wami, chichi kautomeka nawa.

⁶ “Mwana mutu, twako mikuma ngwe unalekumuka. Twako mikuma ni chinyengo homa haze atu eswe maahasa kukwivwa.

⁷ Muze maakuhula ngwo, mumu yika unatwila mikuma, alweze ngwe, mumu ha yuma yize muyizaho. Muze yuma yize hiyeza, atu meevwa woma unji, ni mwe mu moko kekee. Tachi jo mujikahwa, ni mwe mu makungunwa lekeleke. Tangwa kulineza; hiliakundama.” Mwene Zambi wachamba.

⁸ Mwene Zambi yangwamba ngwenyi:

⁹ “Mwana mutu, hanjika munanyi. Lweza atu chize yami Mwene Zambi ngunambe, ngwami: Mukwale, mukwale, haukalula, haucheka.

¹⁰ Haukalula ha kushiha nawo, haucheka hanga ulejime ngwe njaji. Uwahililo wakuhi, mumu atu jami haalelesa kutoweza cheswe ni ubatwilo weswe.

¹¹ Mukwale kaanaucheke hanga ahase kulinga nawo. Haukalula, haucheka, hanga ause mu moko ja mukwa kushiha.

¹² Mwana mutu yeka mbimbi, mukwale uno muulimika ni atu jami ni miata eswe ja Israele. Kumaashiha ni e masalila ja atu jami. Lilambenu ha tulo ni chinyengo!

¹³ Nguneseka atu jami. Nyi kaalikonyekene, yuma yino yeswe muyiza hali ayo.

¹⁴ “Mwana mutu, haliabwila hanjika munanyi. Lamba koshi hanga mukwale utape kaali kaali. Kuuli mukwale wakuhana woma, wakushiha nawo atu, wakwajingilika sali ni sali,

¹⁵ wakulekumuna atu jami ni kwatalingisa. Hinaseleka limbo lio ni mukwale uze unalejima ngwe njaji, uze unalulika kushiha.

¹⁶ Semba ku chindume ni ku chimeso likoleleze! Sembela kweswe kuze unatewulukila.

¹⁷ Yami mungulamba koshi, mba ufwatulo wami kumuuhwa. Yami, Mwene Zambi, nachamba.”

Mukwale wa mwanangana wa Babilonia

¹⁸ Mwene Zambi yangwamba ngwenyi:

¹⁹ “Mwana mutu, funjika majila aali muze mwanangana wa ku Babilonia mahasa kwiza ni mukwale wenyi. Eswe aali kaanabutukila ku chifuchi chimuwika. Usa yinyingi kuze ha makano ja majila.

²⁰ Funjikila mwanangana jila yimuwika yize yinatalikisa ku limbo lia Raba mu chifuchi cha Amone, jila yikwo yakuya ku limbo liakukoleka lia Yerusaleme mu chifuchi cha Yuda.

²¹ Mwanangana wa Babilonia kanamanyina ku mutondo wa yinyingi ha makano. Ha kunyingika jila yize chamutamba kuya, kananyikisa mivwi yenyi, kanatahe; kanatale ku liayi lia kashitu yoze halambula mulambu.

²² Mu kwoko lienyi lia chindume kanakwate mivwi yize yili ni yinyingi ngwo: ‘Yerusaleme’! Kafwa ngwe te ngombo yinamulweze aye kwekuze ni kululika mikambo yenyi akabuzule nayo yajilo ya chipanga, ni kulumbika ko mavu, ni kufula mena, ni kutwa milolo ya jita.

²³ Akwa Yerusaleme keechi kuchifuliela mumu haalikunda nenyi. Alioze maliji hakutwala ku yize muyizaho meewulula milonga yo ni kwatoweza ngwo:

²⁴ Yami Mwene Zambi ngunambe chino ngwami, milonga yenu hiyasoloka. Atu eswe haanyingika ngwo, nunahi. Yitanga yenu yeswe yakusolola yibi yenu. Nunahi! Mungunukunjika mu moko ja akwa kole jenu.

²⁵ “Yena chingulungulu, mukwa kuyula wa Aisraele wakulijilula, tangwa lie, tangwa lia ubatwilo we wakusula kulineza.

²⁶ Yami Mwene Zambi nachamba. Zula chipangula che ni kapusa ke. Nichimwe muchikabwa nawa ngwe hatangu. Pwisenu yiswale akwa kuyula; chizenu waze akuyula.

²⁷ Mu ngukafwita limbo fwichi fwichi! Alioze chino kuchichi kabwa ndoo yoze natongwele makeza ni kumwesa akwa limbo lamba. Mba mungukamwaha lio.

Mukwale ni Aamone

²⁸ “Mwana mutu, hanjika munanyi. Ambujola chize yami Mwene Zambi ngunambila Aamone, waze akushililika Aisraele. Alweze ngwe: ‘Mukwale hautomona kulu hanga onone; haucheka ushihe, ubeyime ngwe njaji.

²⁹ Usolwelo uze nwakumona uli wa mahuza, ni che kwambujola chenu chili cha saki. Nuli yingulungulu, nuli atu abi; tangwa lienu kulineza, tangwa lia ubatwilo wenu wakusula. Mukwale muukatapa kota jenu.

³⁰ “ ‘Uhilwise mu chindalo chawo! Mungukanubatwila homa haze nanutangilile mu chifuchi chize nwasemukinyine.

³¹ Munukamona ndundo ja ufwatulo wami, mungukanwalumukina ngwe milengi ya kahia. Mungukanukunjika kuli atu akalu waze maakanwonona.

³² Maakanwonona mu kahia. Manyinga jenu maakaamwanganyina mu chifuchi cha yenwene, niumwe kechi kaanwiwuluka nawa.’ ” Mwene Zambi wachamba.