Ezekiel 16 - Mukanda Wa Zambi 1970

Akwa Yerusaleme yaavulumuna

¹ Mwene Zambi yangwamba ngwenyi:

² “Mwana mutu, lumbunwina Yerusaleme yuma yenyi ya kuzelwokesa yize alingile.

³ Lweza Yerusaleme chize Mwene Zambi anambe, ngwenyi, Wasemukinyine mu chifuchi cha Kanana; tatenu te Kaamore, noko te Kahite.

⁴ Muze wasemukine, mutu niumwe wabatwile muchimbi we, hanji kukusanyisa, chibwe kukukwita mungwa, hanji kukuvunga mu mahina.

⁵ Niumwe wakuvwilile keke ni kulinga yuma yino. Muze wasemukine, niumwe kakuzangile ko. Kaakumbilile mu yambu.

⁶ “Muze nabalikile ko, nakumwene muutunya mu manyinga je. Mujimba weswe te hiwabiha ni manyinga, alioze chakutayijile ko kufwa.

⁷ Yingukutatwisa ngwe chibuta. Yiutatuka, yiusuhwa, yiubwa pwo. Yiubwa ni mele ni kambu jisuku, alioze te uli uselesele.

⁸ “Muze nabalikile ko nawa, yingumona ngwami, tangwa hiliaheta, yena hiwakola ni kuya ku ulo. Yingukujika kazaku kami, yingukulakenya kukuzanga. Ewa, yingulivwa ni yena, yiubwa niwami.” Chenacho Mwene Zambi anambe.

⁹ “Mba yingwanda meya, yingukusanyisa ni kukuchiza manyinga. Yingukuwayisa maji a olive.

^10-11 Yingukujika ni mahina eka ni eka a uhenya, yingukujika sapato ja lambu libema, ni chitambala chitoma cha lefuna ni kazaku ka swa. Yingukujika yuma ya uhenya, kaliki mu kota, ni mikosa ku moko,

¹² ni kazeya mu mazulu je, ni yingeliengelie ku matwi, ni chipangula chibema.

¹³ Yiulibemesa ni oru ni prata, matangwa eswe yiuzala mahina abema atoma ni a swa. Te wakulia mbolo yibema ya wunga wa fufunuka, ni wuchi ni maji a olive. Yiubwa mukwa uhenya, yiwalumuka mwazovu wa mwanangana.

¹⁴ Wafumanyine hakachi ka mavungu mumu ha uhenya we, mumu yami nakuhenyesene.” Chenacho anambe Mwene Zambi.

¹⁵ “Alioze wajikijilile ha uhenya we ni kulinga utanji ni mweswawo unabalika.

¹⁶ Yiwanda amwe mahina je ni kululika homa lie ha kuwayila, yiulikunjika ni kulinga utanji.

¹⁷ Yiwanda prata ni oru ya uhenya yize nakuhele ni kulinga mazambi a malunga, mba yiulinga no utanji.

¹⁸ Yiwanda mahina a uhenya waze nakuhele, yiwajika tuponya, yiwalambula maji a olive ni yuma ya vumba libema yize nakuhele.

¹⁹ Nakuhele yakulia ya wunga wa fufunuka, ni maji a olive, ni wuchi, alioze yiuyilambula ni kuvumbika mahamba.” Chenacho anambe Mwene Zambi.

²⁰ “Alioze yiulinga nawa chibi chahiana. Yiwanda ana je a malunga ni a mapwo waze wasemene ni yami, yiwalambwola milambu kuli mahamba.

²¹ Chinalite kwanda ana jami ni kwalambula ku mahamba, nyi?

²² Ha utanji we nilimwe tangwa kuwewulukile ko muze wabwile uselesele, muze watunyine mu manyinga ja yena mwene.”

Yitanga ya Yerusaleme ngwe ya chitanji

²³ Mwene Zambi yamba ngwenyi: “Lamba lie! Lamba lie! Walingile ungulungulu Wahiana, mba

²⁴ ku sali lia jila yeswe yiululika ko yihela ya kukombelela mahamba ni kulikunjika ku utanji.

²⁵ Yiulibihisa ni malowa. Yiulikunjika kuli mweswawo wejile ko, ni kwokesa utanji we.

²⁶ Yiulinga utanji ni enyembo je a usolo, akwa Egiptu, yiulimona no ni kungwiha.

²⁷ “Haliabwila hinolola kwoko liami ha kukumwesa lamba ni kuchiza chitundo cha yiwape yize nakwehele. Yingukukunjika kuli Afilistia, waze te akukuvutwokela ni kukwivwa kubiha mumu ha yibi yize wakulinga.

²⁸ “Yiukaula Aasuria mumu te kuusolo kuyuka ni atu akwo, yiubwa chitanji wo, hindu kujakuhwile ko.

²⁹ Yiubwa nawa chitanji wa Ababilonia, hindu kujakuhwile ko.”

³⁰ Mwene Zambi kanambe ngwenyi: “Hiunalingi yino yeswe ngwe chitanji yoze keshi sonyi.

³¹ Ku majila eswe hiunatungu ko mazuwo akukombelela mahamba ni kulinga utanji. Alioze kuwalingile utanji mumu ha lwahu wa mbongo ngwe yitanji akwo.

³² Uli ngwe pwo yoze wakulimona ni tundaka hi ni lunga lienyi ko.

³³ Chitanji kaakumufweta, alioze yena yiuhana yawana kuli eswe waze te wakuzanga kukoka ku sali lieswe ni kulimona ni yena.

³⁴ Yena hi uli chitanji ko ngwe akwo. Wakuhi yoze wakushinjikile ukabwe chitanji. Kuwatambwile ko fweto kuli malunga, alioze yena te wakwafweta! Ewa, uli pwo wa mulali weka.”

Mwene Zambi makamwesa Yerusaleme lamba

³⁵ Kashika Yerusaleme, yena chitanji, banjika chize anambe Mwene Zambi.

³⁶ Mwene Zambi kanambe ngwenyi: “Wafukwile mahina je ngwe chitanji, yiulikunjika yena mwene kuli akwa zango lie ni ku mahamba je a yizelwokeso, yiushiha ana je ni kwalambula ku mahamba.

³⁷ Kashika mungukakungulula akwa zango lie eswe waze te wakuzanga ni waze te wakuvutwokela. Mungukaakujingilikoo, mba mungukakuzula mahina hanga amone uselesele we.

³⁸ Mungukakuhisa mumu washihile atu ni mumu ha utanji we, mba mu utenu ni ufwatulo wami mungukakushiha.

³⁹ Mungukakukunjika mu chiyulo cha akwa zango lie. No maakabuzula mazuwo je muze te wakulingila utanji ni kukombelela mahamba. Kumaakakuzula mahina je ni yuma ye ya uhenya ni kukwecha uselesele.

⁴⁰ “Kumaakavundula mbunga ni kukwasa mawe, maakakubatwola yipinji yipinji ni mikwale yo.

⁴¹ Kumaakocha mazuwo je, maakakungulula mapwo anji akamone lamba lie. Mungukakukanjisa kuhana yawana kuli akwa zango lie, mungukasa songo lia utanji we.

⁴² Hohene chichi kakuvwila nawa ufwatulo, alioze mungukalihumikiza. Chichi kakuvwila nawa wuli chibwe ukwa.

⁴³ Hiunavulama yize nakulingile muze wabwile mukweze. Hiunanguvwisa ufwatulo ku yeswe yize hiunalingi. Kashika mungukakumwesa lamba. Mumu yika hiunawezela ku utanji we yuma ya kuzelwokesa yeswe yize hiunalingi?” Mwene Zambi wachamba.

Cheswe abwa naye, ni mwanenyi wa pwo chizechene

⁴⁴ Mwene Zambi yamba ngwenyi: “Yerusaleme, atu kumaakutela chishima chino ngwo: ‘Cheswe abwa naye, ni mwanenyi wa pwo chizechene.’

⁴⁵ Yena uli ngwe noko. Mwe noko yavutwokela lunga lienyi ni ana jenyi. Yena uli ngwe anakwenu waze avutwokelele malunga jo ni ana jo. Yerusaleme, yena ni anakwenu, membo akwo, noko yenu kali Kahite ni tatenu Kaamore.

⁴⁶ “Yayenu kali Samaria wa ku norde, ni ye yihunda yenyi. Mwanakwenu, ni ye yihunda yenyi, kali Sodome ku sude.

⁴⁷ Yena wevwile kuwaha ni kukaula mu ngano jo ni kwimbulula yitanga yo ya kuzelwokesa. Ha shimbu likepe wika hiwalinga yuma yize te ayo akulinga.”

⁴⁸ Mwene Zambi kanambe ngwenyi: “Ni mwe yami mwene, ngwami, ndumbwe Sodome ni ye yihunda yenyi kaalingile ko yibi yize unalingi yena ni ye yihunda ye.

⁴⁹ Iye ni ana jenyi a mapwo te kaakulengumuka mumu abwile ni yakulia yinazuku, yaatwama mu uhwimino, alioze kanyongene ko yiswale ni akwa lamba.

⁵⁰ Te kaakulengumuka ni kulinga yuma ya kuzelwokesa yize te nakuvutwokela, mba yingwoonona, ngwe chize unachinyingika kanawa.

⁵¹ “Samaria kavulumwine ko ngwe yena, walingile yuma ya kuzelwokesa yahiana iye. Nyi tunatale yibi yize yena walingile ni yize anakwenu alingile yili ngwe ayo kaalingile ko chibi nichimwe.

⁵² Haliabwila chatamba kunyongonona ni sonyi je. Milonga ye yinahiana yize ya anakwenu. Kaanasoloka ngwe akwa ululi. Nyi tunatale yibi ye haliabwila ivwa sonyi, mumu yibi ye yinahiana yize ya anakwenu.”

Zambi makawahisa nawa membo ja Sodome ni Samaria

⁵³ Mwene Zambi kanambila Yerusaleme ngwenyi: “Mungukawahisa nawa Sodome ni yihunda yenyi, ni Samaria ni yihunda yenyi. Ewa, ni yena nawa mungukakuwahisa.

⁵⁴ Hiunalikolesa sonyi yena mwene. Sonyi je mujikalweza anakwenu ngwo, kaanawaha hakepe.

⁵⁵ No kumaakawaha nawa, ni yena ni ye yihunda ye kumunukawaha.

⁵⁶ Kuwalelesele ko Sodome ha matangwa waze te wakulengumuka,

⁵⁷ shimbu te yibi ye kanda yichisoloka, nyi? Haliabwila uli ngwe iye. Aedome, ni Afilistia, ni enyembo je akwo kaakukulelesa, kaakukuvutwokela.

⁵⁸ Unatambula fweto ya usolo wa yitanga ye ya kuzelwokesa.” Mwene Zambi wachamba.

Usendo wa miaka yeswe

⁵⁹ Mwene Zambi kanambe ngwenyi: “Mungukulinga nikulita ni chize walingile yena, mumu walelesele yilakenyo ye, washihile Usendo wetu.

⁶⁰ Alioze mungukalemesa Usendo uze nakolesele ni yena muze te uchili mwana pwo. Mungukakolesa Usendo ni yena uze muukalinduluka ndoo ku miaka yeswe.

⁶¹ Muukewuluka chize walingile, ni kwivwa sonyi muze yayenu ni mwanakwenu maakahiluka kuli yena. Mungukaapwisa ngwe ana je a mapwo, chibwe kukwabwile ko yimwe Shimbi ya Usendo wami ni yena.

⁶² Mungukakolesa nawa Usendo wami ni yena, mba muukanyingika ngwe, yami nguli Mwene Zambi.

⁶³ Mungukakukonekena yibi yeswe yize walingile, alioze yena muukayiwuluka ni kuyivwila sonyi. Muukahola lume kuluu.” Mwene Zambi wachamba.