Ezekiel 13 - Mukanda Wa Zambi 1970

Zambi yahisa malunga akwa munanyi a mahuza

¹ Mwene Zambi yangwamba ngwenyi:

² “Mwana mutu, hisa akwa munanyi ja Aisraele waze akuhanjika munanyi wa ayo ene. Alweze abanjike ku maliji a Mwene Zambi.”

³ Mwene Zambi kanambe ngwenyi: “Lamba lio akwa munanyi, yihepuke, waze akulongesa nikulita ni manyonga jo ene, waze akutomba Usolwelo wa ayo ene.

⁴ Yenu Aisraele, akwa munanyi jenu kaali amokomoko ngwe mikuza waze atwama mukachi ka mazuwo akubuzula.

⁵ Keeshi kufunga homa haze chipanga hichabuzuka, chibwe keeshi kutungulula chipanga. Kashika Aisraele keechi kahasa kulilamwina muze jita muyikeza ha tangwa lia Mwene Zambi.

⁶ Usolwelo wo uli wa mahuza ni munanyi wo uli wa kwonga. Kaakwamba ngwo, kaakulongesa maliji jami. Alioze chaatumine kwami. Hindu kaakufuliela ngwo, maliji jo maakamanunuka.

⁷ Ngunaalweze ngwami: Usolwelo uze nunamono uli wa mahuza, ni munanyi uze nwakuhanjika uli wa kwonga. Nunambe ngwenu, kaali maliji jami. Alioze chahanjikile kuli yenu.”

⁸ Kashika Mwene Zambi kanaambe ngwenyi: “Maliji jenu ni Usolwelo wenu yili ya mahuza. Ngunalimika ni yenu.

⁹ Yenu akwa munanyi waze nwakuhanjika Usolwelo wa mahuza ni kulongesa longeso lia kubinjisa, mungunumwesa lamba. Kunuchi kabwa ko muze atu jami maakalikungulula ni kubatula milonga. Majina jenu keechi kaasoneka mu mukanda wa enyaho mu Israele; kunuchi kahiluka nichimwe mu chifuchi chenu. Mba munukanyingika ngwenu, yami nguli Mwene Zambi.

¹⁰ “Akwa munanyi haanapiangula atu jami nikwamba ngwo: ‘Uhwimino uli ko.’ Alioze kuma uhwimino kuushiko! Atu jami haanalumbuka chipanga cha mawe, mba akwa munanyi haanachikwichi pemba.

¹¹ Lweza akwa munanyi ngwe, chipanga cho muchibuzukila hashi. Mungukatuma muhuji ni vula ya chiwe ya kangonga ha chipanga, ni fuji ya tachi.

¹² Muze chipanga muchikabuzuka atu maakanuhula ngwo, pemba yibema yize nwakwichile yilihi mba?”

¹³ Kashika Mwene Zambi kanambe ngwenyi: “Mu ufwatulo wami mungutuma fuji ya tachi, ni muhuji, ni vula ya chiwe ya kwonona chipanga.

¹⁴ Mungukabuzula chipanga nwakwichile pemba, mungukachifwenya, ndoo fundamentu yacho muyikasoloka. Che chipanga muchikanubuzukila ni kunushiha yenu eswe. Mba atu eswe maakanyingika ngwo, yami nguli Mwene Zambi.

¹⁵ “Chipanga ni waze achikwichile pemba kumaakamona tachi ja ufwatulo wami. Mba mungukanwamba ngwami, chipanga kuchishiko nawa, chibwe waze achikwichile pemba,

¹⁶ akwa munanyi waze akwamba ngwo: ‘Uhwimino uli ko’, alioze uhwimino kuushiko.” Mwene Zambi wachamba.

Zambi yahisa mapwo akwa munanyi a mahuza

¹⁷ Mwene Zambi yamba ngwenyi: “Mwana mutu, haliabwila achitala mapwo a hakachi ka atu je waze akulongesa munanyi wa yuma yize muyiza ho, ahise.

¹⁸ Ambulwile yize Mwene Zambi anaambe ngwenyi: “Lamba lienu yenu mapwo! Nwakumika masaku a kando nikwajika ku moko ja atu, ni manda nikwajika ku mitwe yo, hanga ahase kubwa ni tachi ja kukumba atu akwo. Nwakuzanga kubwa ni tachi ja kushiha atu jami ni kuliyukisa yenwene.

¹⁹ Nwakungulelesa ku meso ja atu jami hanga nuzomone mukamo wa masa ni yimwe mbolo. Nwakushiha atu waze kaatelele kufwa, ni kufunga ni mwono waze atela kufwa. Nwakuhanjika mahuza kuli atu jami, no kaakunufuliela.”

²⁰ Mwene Zambi kanambe ngwenyi: “Nakubihilila kando jize nwakuhana kuli atu afunge mwono wo ku kufwa. Mungukajichiza ku moko jenu ni kujitula atu waze nwakwonga.

²¹ Mungukatanuna manda a kando jenu, mungukachangumuna liakulu atu jami ku tachi jenu. Mba munukanyingika ngwenu, yami nguli Mwene Zambi.

²² “Ni mahuza jenu nwakulekumuna akwa ululi, waze Chazangile kwivwisa chinyengo. Nwakukwika yingulungulu kwecha ungulungulu wo hanga alilamwine.

²³ Kashika haliabwila Usolwelo wenu wa mahuza ni munanyi wenu wa kwonga hiyasula. Ngunachiza atu jami ku moko jenu. Mba mununyingika ngwenu, yami nguli Mwene Zambi.”