Ezekiel 12 - Mukanda Wa Zambi 1970

Mukwa munanyi Ezekiel mukwa kuchina

¹ Mwene Zambi yangwamba ngwenyi:

² “Mwana mutu, kuwatwama mukachi ka yihulia. Kaali ni meso, alioze keeshi kumona nichimwe; kaali ni matwi, alioze keeshi kwivwa nichimwe, mumu kaali yihulia.

³ “Haliabwila, yena mwana mutu, lulika yikashi ye ngwe chize mukwa kuchina malinga. Mba katuka uye muze te tangwa kanda lichitoka. Atu eswe akumone chize unakatuka ni kuya sali lieka. Hanji yihulia wano muchaalumbunukina.

⁴ Ha mwalwa lulika yikashi ye ya kuya nayo mu undungo, mba ahase kukumona. Ukatuke chingoloshi ku meso jo ngwe kuunayi mu undungo.

⁵ Muze anakutale, lokola chituwa ku mbango ya zuwo lie, utuhwishile mo yikashi ye,

⁶ akumone chize unalitwiki yikashi hi kuya mu milima, nikulifuka ku meso, kanda umona kuze unayi. Chize muulinga muchitoweza Aisraele.”

⁷ Yingulinga chize angwambile Mwene Zambi. Ha tangwa lizeliene yingulitwika yikashi yami ya undungo. Ha chingoloshi muze te hikwatoka yingulokola chituwa ku mbango ya zuwo, yingutuhuka. Muze eswe anachimone, yingulitwika yikashi ha chipaya, yinguya.

⁸ Muze hikwacha Mwene Zambi yangwamba ngwenyi:

⁹ “Mwana mutu, muze Aisraele wano yihulia kaanakuhula chize unalingi,

¹⁰ alweze chize yami Mwene Zambi ngunambe kuli ayo. Maliji wano kaali mumu hali mwanangana yoze wa kuyula mu Yerusaleme ni eswe waze atwama mo.

¹¹ Alweze ngwe chize hiwalinga chili chilayi chize muchaalweza ngwo, maakachina nikuya mu undungo.

¹² Mwe mwanangana yoze wakwayula kumakalitwika yikashi yenyi ha ufuku, makatuhukila mu chituwa chize maakamulokwela mu chipanga ni kuchina. Kumakafuka meso jenyi, kechi kamona kuze anayi.

¹³ Alioze mungukamuzazulwila Wanda wami, neye makafwa mo. Mba mungukamutwala ku limbo lia Babilone. Kwenako makafwila, alioze lie limbo kechi kulimona.

¹⁴ Akwa lutwe a mu wanangana wenyi, ni akwa kuyula, ni tufunga, mungukaamwangina sali ni sali. Atu maakafupa fupa akaashihe.

¹⁵ “Muze mungukaamwangina hakachi ka mavungu akwo ni mu yifuchi ya yilambala, mba maakanyingika ngwo, yami nguli Mwene Zambi.

¹⁶ Hindu mungukahichika amwe a kuli ayo waze keechi kafwa mu jita, ni mu zala, ni mu lamba, hanga mukachi ka mavungu akwo akanyingike ngwo, yuma yize alingile te ya kuzelwokesa ni hanga atayize ngwo, yami nguli Mwene Zambi.”

Chilayi cha kuchikima cha mukwa munanyi

¹⁷ Mwene Zambi yangwamba ngwenyi:

¹⁸ “Mwana mutu, chikima muze unali mbolo, wakama ni woma muze unanu meya.

¹⁹ Lweza akwa chifuchi eswe ngwe, wano e maliji a Mwene Zambi kuli akwa Yerusaleme waze atwama mu chifuchi cho ndoo ni musono ngwenyi: Muze maakalia mbolo maakachikima, ni muze maakanwa meya maakawakama ni woma. Mavu a mu chifuchi maakabiha, mumu eswe waze atwama mo keeshi kufunga Shimbi.

²⁰ Membo waze anazala ni atu maakoonona, minda muyikalumuka puya. Mba maakanyingika ngwo, yami nguli Mwene Zambi.”

Yize Mwene Zambi akwamba kuyakubwa

²¹ Mwene Zambi yangwamba ngwenyi:

²² “Mwana mutu, Aisraele kuchi analumbununa chishima chino ngwo: ‘Tangwa kulinayi, ni longeso lia munanyi kulishi kumanunuka,’ kafwa ngwe kuchi?

²³ Haliabwila alweze chize yami Mwene Zambi hinahanjika hakutwala ku chikuma chize. Mungusa songo lia chishima chize. Keechi kachitata nawa nichimwe mu Israele. Alweze ngwe: ‘Tangwa hiliakundama, ni longeso lia munanyi mulimanunuka!’

²⁴ “Mukachi ka Israele kumuchikabwa nawa Usolwelo wa mahuza hanji longeso lia munanyi wa mahuza.

²⁵ Yami Mwene Zambi munguhanjika kuli ayo, ni yize mungwamba muyikabwa. Muchibwa lume susumuku. Ha matangwa jenu, yenu yihulia, mungukalinga chize nanutowezele, hinachamba.”

²⁶ Mwene Zambi yamgwamba nawa ngwenyi:

²⁷ “Mwana mutu, Aisraele kaanambe ngwo, Usolwelo we ni maliji je a munanyi yili ya ku miaka ya kulutwe.

²⁸ Kashika alweze ngwe, yami Mwene Zambi ngunambe ngwami; kukuchi kubwa nawa shimbu lisuku. Yize hinamba muyibwa. Yami Mwene Zambi nachamba!”