Ezekiel 11 - Mukanda Wa Zambi 1970

Zambi yahisa akwa Yerusaleme

¹ Mwiku wa Mwene Zambi yiunguzundula, yiungutwala ku chikolo cha zuwo lia Zambi ku chivumbuko. Hehi ni che chikolo yingumona ko malunga makumi aali ni atano. Jazania mwana wa Azure ni Pelatia mwana wa Benaya, miata aali a lie vungu, yaabwa mukachi ko.

² Zambi yangwamba ngwenyi: “Mwana mutu, atu wano kaakutaka uhenge ni kuhana yiyulo yibi mu limbo lino.

³ Kaakwamba ngwo: ‘Hasala hakepe mba mututunga nawa mazuwo. Limbo lili ngwe lundeho (luyimbia) lwa kutelekela, ni yetu tuli ngwe yifwo mukachi, alioze lunatufungu ku kahia.’

⁴ Kashika haliabwila, yena mwana mutu, ahise.”

⁵ Hohene Mwiku wa Mwene Zambi yiunguhulumukina, mba Mwene Zambi yangwamba ngulweze atu maliji wano ngwenyi: “Atu ja Israele, ngunanyingika yize nunambe ni yize nunanyongo.

⁶ Hinwashiha atu anji muno mu limbo, mu majila himwazala ni afu.

⁷ “Kashika yami Mwene Zambi ngunanwambe ngwami, chamwenemwene limbo lino lili lundeho (luyimbia) alioze yifwo yili yika? Yili mijimba ya waze hinwashiha! Yenu kunuchi kutwama muno, mungunutuhwisa mu limbo!

⁸ Nwakwivwila mukwale woma, nyi? Munguvundula atu ni mikwale alimike nenu.

⁹ Mungunutuhwisa mu limbo ni kunukunjika kuli yilambala. Hinabatula ngwami, munufwa.

¹⁰ Maanushihila mu jita mu chifuchi cha yenwene. Mba atu eswe maanyingika ngwo, yami nguli Mwene Zambi.

¹¹ Limbo lino kulichi kunufunga ngwe chize lundeho (luyimbia) lwakufunga yifwo. Mungunumwesa lamba kweswako munubwa mu chifuchi cha Israele.

¹² Mba mununyingika ngwenu, yami nguli Mwene Zambi, nawa ngwenu, muze te nwakufunga Shimbi ja enyembo jenu mavungu akwo, te nwakukolema Shimbi jami ni yiyulo yami.”

¹³ Muze te ngunahanjika munanyi, kuma Pelatia hafwa kwenyi. Yingufulamana hashi, yingukololoka ngwami: “Ka, hi chocho ko Mwene Zambi! Kuma muushiha atu eswe mu Israele waze haasalasala ni mwono, nyi?”

Chilakenyo cha Zambi kuli Aisraele mu undungo

¹⁴ Mwene Zambi yangwamba ngwenyi:

¹⁵ “Mwana mutu, Aisraele waze atwama mu Yerusaleme kaanahanjika hakutwala kuli yena ni usoko we waze nuli mu undungo. Kaakwamba ngwo: ‘Atu waze atwama mu undungo kaali kusuku, kaahashile kuwayila Mwene Zambi. Hanatwehe chihinga cha chifuchi.’

¹⁶ “Haliabwila ambulwila usoko we waze atwama mu undungo yize nguna mbe. Yami nguli yoze hanaatumu kutwama kusuku mukachi ka mavungu akwo ni kwamwangina mu yifuchi yeka ni yeka. Alioze haliabwila mungubwa hamwe no mu yifuchi kuze ayile.

¹⁷ “Kashika alweze chize yami Mwene Zambi ngunambe. Mungukaachiza ku yifuchi kuze naamwanginyine, ni kwahilwisa nawa mu chifuchi cha Israele.

¹⁸ Muze maakahiluka, chaatamba kuchiza mo yuma yeswe ya luchisa, ni mahamba eswe a kuzelwokesa waze maakawana mo.

¹⁹ Mungukaaha mbunge jaha ni manyonga aha. Mungukachiza mbunge jo jikalu ja mawe ni kwaaha mbunge jize jakwononoka.

²⁰ Mba maakafunga Shimbi jami nikujononokena jeswe. Maakabwa atu jami, ni yami mungukabwa Zambi yo.

²¹ Alioze mungukamwesa lamba atu waze akuzanga kuwayila mahamba a luchisa ni a kuzelwokesa. Mungukaamwesa lamba mumu ha yuma yize haanalingi.” Mwene Zambi wachamba.

Uhenya wa Zambi yiukatuka mu Yerusaleme

²² Akwa mwono a mwilu yaabutuka kuhumwoka, ni e tufumbo yaahumwoka hamwe no. Uhenya wa Zambi ya Israele yiubwa helu lio.

²³ Mba uhenya yiukatuka ha limbo, yiuheta ha mulundu ku chivumbuko cha lie limbo.

²⁴ Mu Usolwelo, Mwiku wa Zambi yiunguzundula, yiunguhilwisa mu chifuchi cha undungo mu Babilonia. Mba we Usolwelo yiujimuka,

²⁵ yingwambulwila waze atwama mu undungo yize yeswe Mwene Zambi hangulweza.