Ezekiel 10 - Mukanda Wa Zambi 1970

Uhenya wa Mwene Zambi yiukatuka mu zuwo lienyi

¹ Yingutala ku chifuko helu lia mitwe ya akwa mwono a mwilu. Kuma helu lio yihabwa chimwe Chuma chalifwa ni chitwamo cha wanangana cha kulinga ni liwe lilemu Safire

² Zambi yambila mutu yoze te unazala mahina atoma alefuna ngwenyi: “Yako mukachi ka yijingo mushi lia e akwa mwono, uzalise moko je ni makala a kahia. Mba mwangina e makala a kahia mu limbo.” Yingumutala chize te anayi.

³ E akwa mwono a mwilu te kaanamana ku sude ya zuwo lia Zambi muze te anayi muchima, lelwa yilifuka yiize ya muchima ya zuwo.

⁴ Uhenya wa Mwene Zambi yiukatuka kuli e akwa mwono a mwilu, yiuheta ku chikolo cha zuwo. Mba lelwa yilizalisa lie zuwo lia Zambi, ye yiize yiizala ni uhenya wa Zambi.

⁵ Chinumo cha mapulwa ja akwa mwono a mwilu yaachivwa chibwe ndoo mu yiize ya haze. Liji lize yilibwa ngwe lia Zambi Mukwa Ndundo Jeswe.

⁶ Muze Mwene Zambi ambilile lunga yoze te unazala mahina atoma alefuna ande kahia mukachi ka tufumbo mushi lia akwa mwono a mwilu, lunga yaya, yamana hehi ni umwe kafumbo.

⁷ Umwe wa kuli akwa mwono yakwata ha kahia kaze kabwile mukachi ko, yazomona makala, yamwaha wo lunga yoze te unazala mahina atoma alefuna. Mwe lunga yatambula e makala, yakatuka.

⁸ Yingumona ngwami, mukwa mwono wa mwilu mweswe te kali ni Chuma chize chinalifu ngwe kwoko lia mutu mushi lia pulwa ni pulwa.

^9-10 Yingumona tufumbo awana, eswe yaalifwa. Ku sali ni sali lia mukwa mwono mweswe kafumbo umuwika. Kafumbo ni kafumbo yaahenya ngwe liwe lia ndando yinji. Kafumbo mweswe yamusepekenya mu kafumbo mukwo.

¹¹ Muze e akwa mwono anende, te maahasa kuya ku mbango jeswe jiwana. Maatalikisa lume kulutwe, ayo eswe yeendangana hamuwika kuze te azangile kuya nikutalikisa kulutwe.

¹² Mijimba yo, ni nyima jo, ni moko jo, ni mapulwa jo, ni e tufumbo te akujingilika ni meso.

¹³ Tufumbo wano yaabwa ngwe waze namwene mu Usolwelo wami utangu.

¹⁴ Mukwa mwono mweswe yabwa ni mahuma awana: mutangu lia kuji a ngombe, lia muchaali lia mutu, lia muchitatu lia tambwe, lia muchiwana lia tela.

^15-16 (Te kaali akwa mwono a mwilu waze namwene ku mbumbulu ya lwiji Chebare.) Muze e akwa mwono te akuhumuka ni kwenda, tufumbo yaaya hamwe no. Muze te anazazulula mapulwa jo ni kuhumuka, e tufumbo yaaya hamwe no.

¹⁷ Muze akwa mwono te anamana, e tufumbo yaamana nawa. Muze maahumuka, ni e tufumbo yaaya hamwe no, mumu akwa mwono e aakwendesa.

¹⁸ Hohene uhenya wa Mwene Zambi yiukatuka ku chikolo cha zuwo lia Zambi, yiubwa hali e akwa mwono.

¹⁹ Yaazazulula mapulwa jo, yaahumuka muze te yami ngunatale, ni e tufumbo yaaya hamwe no. Yaamana ku chikolo cha zuwo lia Zambi ku chivumbuko, we uhenya yiubwa hali ayo.

²⁰ Yingunyingika ngwami, kaali akwa mwono a mwilu waze namwene kushi lia Zambi ya Israele ku mbumbulu ya lwiji Chebare.

²¹ Mweswe wa kuli ayo yabwa ni mahuma awana, ni mapulwa awana, ni Chuma chize chalifwa ni kwoko lia mutu mushi lia pulwa ni pulwa.

²² Mahuma jo yaalifwa ni mahuma waze namwene ku mbumbulu ya lwiji Chebare. Eswe yaatalikisa lume kulutwe.