Ezekiel 1 - Mukanda Wa Zambi 1970

Usolwelo Utangu Wa Zambi Kuli Ezekiel ( 1:1—7:27 ) Chitwamo cha Zambi

¹ Ha mwaka wa makumi atatu ha tangwa lia muchitano lia kakweji wa muchiwana, yami Ezekiel, mwana wa Buzi, nabwile mu undungo hamwe ni Ayuda ku mbumbulu ya lwiji Chebare mu chifuchi cha Babilonia. Lilu yiliazuluka, yingumona uswolwelo wa Zambi. (

² Te mwaka wa muchitano chize kuze atwalile mwanangana Jehoakine mu undungo.)

³ Ku Babilonia ku mbumbulu ya lwiji Chebare, Mwene Zambi, yangusa kwoko.

⁴ Yingumona kangonga kanakatuka ku norde. Njaji kanahenye ku lelwa linene, lilu heswe linatenye. Kweswe kuze te kunahenye njaji yikulejima Chuma ngwe unengu.

⁵ Hakachi ka kangonga yingumona akwa mwono awana alifwa ngwe mutu,

⁶ alioze mweswe wa kuli ayo te kali ni mahuma awana ni mapulwa awana.

⁷ Molu jo te kaanoloka, ni yiliato yo ngwe ya kuji a ngombe. Yahenya ngwe unengu wakucheka.

⁸ Mukwa mwono mweswe te kali ni moko awana, e moko kaalifwa ngwe a mutu. Pulwa ni pulwa yilibwa ni kwoko mushi.

⁹ Mapulwa aali a mukwa mwono mweswe kaanalikwata ni mapulwa a mukwa mwono mukwo. Muze te anende, yaaya lume mu mbunga, mijimba yo kuyatewulukile ko.

¹⁰ Mukwa mwono mweswe yabwa ni mahuma awana: huma lia mutu kulutwe, huma lia tambwe ku chindume, huma lia kuji a ngombe ku chimeso, ni huma lia tela kunyima.

¹¹ Mukwa mwono mweswe yazazulula mapulwa aali yaakwata ku masongo ja mapulwa ja mukwa mwono yoze te anasulangana nenyi. Ni mapulwa jenyi akwo aali yafuka mujimba wenyi.

¹² Mukwa mwono mweswe yatala ku mbango jeswe jiwana; kashika mbunga kaanayi kweswako anazange, mijimba yo kuyishi kutewuluka.

¹³ Mukachi ka akwa mwono yimubwa chimwe Chuma chize chalekwokele ngwe soka lia kahia, te chakujingajinga. Kahia yikalekwoka milengi ya tachi ya mihenyo.

¹⁴ E akwa mwono yaasesumioka kweka ni kweka ngwe njaji.

¹⁵ Muze te ngunatale akwa mwono waze awana, yingumona molu awana ngwe tufumbo a temba; ku sali ni sali lia mukwa mwono mweswe kafumbo umuwika.

¹⁶ Kafumbo ni kafumbo yaalifwa, eswe yaahenya ngwe liwe lia ndando yinji. Kafumbo mweswe yamusepekenya mu kafumbo mukwo.

¹⁷ Chenacho ahashile kuya ku mbango jeswe jiwana.

¹⁸ Tufumbo two te akujingilika ni meso.

¹⁹ Kweswako te akwa mwono maaya, ni tufumbo kaanayi hamwe no. Muze akwa mwono ahumwokene, ni e tufumbo maahumwoka.

²⁰ Akwa mwono yaaya kweswako azangile kuya, ni e tufumbo yaaya hamwe no, mumu te akwa mwono e akwendesa.

²¹ Kashika Heswe tangwa akwa mwono te akwenda hanji kumana, chibwe kuhumuka, e tufumbo yaalinga chizechene.

²² Helu lia mitwe ya akwa mwono yihabwa chimwe Chuma cha kwafuka chabeyimine ngwe kristale, liwe lia ndando yinji.

²³ Mushi lia che chifuko te mwakumana e akwa mwono, mukwa mwono mweswe nikuzazulula mapulwa aali kuli yoze te anasulangana nenyi, nikulifuka mujimba wenyi ni mapulwa jenyi akwo aali.

²⁴ Yingwivwa chinumo cha mapulwa jo muze te anende mu tetela ngwe lundunjila wa meya mu kalunga lwiji, ngwe lushindo wa tujita anji, ngwe liji lia Zambi Mukwa Ndundo Jeswe. Muze maamana, maahombola mapulwa jo.

²⁵ Elindu zungo kulineza ku chifuko helu lia mitwe yo.

²⁶ Ha chifuko chize yihabwa Chuma ngwe chitwamo cha mwanangana chakulinga ni safira. Ha che chitwamo yihatwama umwe walifwa ngwe mutu.

²⁷ Chize ku zalilo ndoo ku mutwe yamoneka ngwe unengu mu lutengo. Chize ku zalilo ndoo ku yiliato yahenya ngwe kahia: pangu yilimujingilika.

²⁸ Uhenya uze te unamujingilika walifwa ngwe kongolo mu malelwa ha tangwa lia vula. Uno we uhenya wa Mwene Zambi.