Estere 9 - Mukanda Wa Zambi 1970

Ayuda yaanongesa akwa kole jo

¹ Tangwa kumi ni lia muchitatu lia kakweji Adare yiliheta, lize asele mwanangana Shimbi, ni lize akwa kole ja Ayuda anyongene ngwo, mutwanongesa. Alioze Ayuda yaakumba akwa kole jo.

² Ayuda yaalikungulula mu membo jo mu yifuchi yeswe ya wanangana alimike ni waze azangile kwashiha. Kumwasolokele mutu niumwe yoze wamanyine ku meso jo ni kulimika no, mumu atu eswe yeevwila Ayuda woma.

³ Atu alemu eswe a ku yifuchi yeswe, akwa kuyula, ni akwa lutwe, ni miata yaakwasa Ayuda, mumu evwilile Mordekai woma.

⁴ Mu wanangana weswe atu yaanyingika ngwo, Mordekai habwa mutu mulemu mu wanangana, ni ulemu wenyi yiuya lume ni kuliwezela.

⁵ Chenacho Ayuda alingile kuli akwa kole jo chize cheswe chaabemenene. Yaashiha ni mikwale, yaanongesa.

⁶ Mu Shushane, lie limbo lia wanangana. Ayuda yaashiha mo atu 500.

^7-10 Mukachi ka waze afwile yimubwa ana kumi a malunga a Hamane, mwana wa Hamedata mukwa kole wa Ayuda: Parshandata, ni Dalfone, ni Aspata, ni Porata, ni Adalia, ni Aridata, ni Parmasta, ni Arisai, ni Aridai, ni Vaizata. Alioze yuma kaayibubile ko.

¹¹ Ha tangwa lizeliene yaalweza mwanangana kwoka cha waze afwile mu limbo lia Shushane.

¹² Mba mwanangana yambila mwazovu Estere ngwenyi: “Tala, mu Shushane wika Ayuda haashiha mo atu 500, kuchinga ni ana ja Hamane kumi a malunga. Kuchi Unanyongo, mu yifuchi yeswe ya wanangana kuchi alinga mo? Haliabwila mba kuchi unazange? Amba, ngukwehe cho. Ngulweze chize unechi, mungukulingila cho.”

¹³ Estere ngwenyi: “Vulie mwanangana wami! Nyi ngwe nunazange, tayizenu Ayuda a mu Shushane hamene alinge nawa ngwe musono. Akasukike nawa ha mutondo ana ja Hamane kumi waze haashiha.”

¹⁴ Mwanangana yatayiza, yahana Shimbi akachilinge. Shimbi yiimwangana mu Shushane, mba yaasukika ana ja Hamane kumi waze haashiha kulu.

¹⁵ Ha tangwa kumi ni lia muchiwana lia kakweji Adare, Ayuda yaalikungulula nawa mu Shushane, yaashiha atu akwo 300. Hindu yuma kaayibubile ko.

¹⁶ Ayuda a mu yifuchi yaalikungulula haze atwama hanga alilamwine ni kubwa mu uhwimino. Yaashiha akwa kole jo 75,000 waze te akwavutwokela. Alioze yuma kaayibubile ko.

¹⁷ Chino chabwile ha tangwa kumi ni lia muchitatu lia kakweji Adare. Tangwa lize liasulile ko, tangwa kumi ni lia muchiwana, kaashihile ko nawa atu, yaalipwisa tangwa lia kulia ni kuwahilila.

¹⁸ Alioze Ayuda a mu Shushane, tangwa kumi ni lia muchitano yaalipwisa tangwa lia kulia ni kuwahilila, mumu ashihile akwa kole jo ha tangwa kumi ni lia muchitatu ni lia muchiwana, mba ha tangwa kumi ni lia muchitano yaalitwamina.

¹⁹ Kashika Ayuda waze te atwama mu yihunda akufunga tangwa kumi ni lia muchiwana lia kakweji Adare libwe tangwa lia kulia ni kuwahilila ni kuhana yawana kuli masepa jo.

Chiwanyino cha Purime

²⁰ Mordekai yasoneka yuma yino yeswe, yatuma mikanda kuli Ayuda eswe, a hakamwihi ni a kusuku, a mu wanangana weswe wa Persia.

²¹ Yaalweza afunge tangwa kumi ni lia muchiwana ni kumi ni lia muchitano lia kakweji wa Adare ni kwaapwisa matangwa a kuhwima mwaka ha mwaka.

²² Wano yaabwa matangwa ja Ayuda muze alilamwinyine kuli akwa kole jo. Mwe kakweji wa chinyengo walumukine wa chiseke, ni kulila chalumukine uwahililo. Mordekai yasoneka ngwenyi, chatamba kufunga matangwa wano, akabwe matangwa a kulia ni a kuwahilila, ni a kuliaha yawana ya yakulia, ni a kukwasa yiswale.

²³ Ayuda yaatayiza Shimbi ya Mordekai, yaalinga chiwanyino mwaka ha mwaka.

²⁴ Hamane mwana wa Hamedata, wa ku vungu lia Agage mukwa kole wa Ayuda, yalulika kuta chela (mu liji lio ngwo: “Purime”) hanga anyingike tangwa lize maakashiha Ayuda. Yaalulika akaanongese eswe.

²⁵ Alioze Estere yaya kuli mwanangana. Mba mwanangana yasoneka Shimbi ya kulinga Hamane chibi chize ambile kulinga Ayuda, yaamusukika ha mutondo hamwe ni ana jenyi a malunga.

²⁶ Kashika akuluka matangwa waze ngwo: “Purime.” Mumu ha mukanda wa Mordekai ni yuma yeswe yize yaawanyine,

²⁷ Ayuda yaasa Shimbi hali ayo ene, ni ha vungu lio, ni hali mweswe yoze makalipwisa Kayuda, akafunge matangwa waze mwaka ha mwaka nikulita ni Shimbi ya Mordekai.

²⁸ Yaamba ngwo, mu yisemuko yeswe, ni majiko eswe a mu yifuchi yeswe, ni a mu membo eswe, chaatamba kwiwuluka ni kufunga matangwa waze a Purime ndoo ku miaka yeswe.

²⁹ Mba mwazovu Estere, mwana wa Abihaile, yasoneka nawa mukanda hamwe ni Mordekai, ashindakenye mukanda utangu hakutwala ku chiwanyino cha Purime uze asonekene Mordekai.

³⁰ Ye mikanda yaayimwangina kuli Ayuda eswe mu yifuchi yeswe 127 ya wanangana wa Persia. Maliji a mu mikanda abwile a sambukila, ni a uhwimino.

³¹ Yaakolesa atu ni mavungu jo akafunge matangwa ja Purime mwaka ha mwaka ngwe chize te akufunga Shimbi ja kulitwamina kulia ni ja yinyengo. Mordekai ni mwazovu Estere eswe aali yaakolesa Shimbi jize.

³² Shimbi ja Estere kushindakenya chiwanyino cha Purime yijisonewa mu chivungo cha mukanda.