Estere 7 - Mukanda Wa Zambi 1970

^1-2 Chenacho mwanangana ni Hamane ayile ni kulia maha mwazovu chisuho cha muchaali. Muze te ananu vinyu, mwanangana yahula nawa mwazovu ngwenyi: “Mwazovu Estere, chika unazange? Ngulweze hanga ngukwehe cho, chibwe Chihanda cha hamuchima cha wanangana wami.”

³ Neye yakumbulula ngwenyi: “Vulie mwanangana wami! Nyi hinwanguvwila kama vumbi ku meso jenu, ngunazange kubwa kama ni mwono, ngunazange nawa atu jami kubwa ni mwono.

⁴ Yami ni atu jami haanatulanjisa akatushihe. Nyi te chili kutulanjisa tubwe tubinji, kachi mungulihumikiza kama, kachi te chahashile kunuketeka hakutwala ku Chuma chino. Alioze kaanambe kutushiha hanga atunongese!”

⁵ Hazehene mwanangana Ahashueru yahula mwazovu Estere ngwenyi: “Iya kevwe mahasa kuhamuka kulinga Chuma chino? Kulihi atwama mwe mutu yoze?”

⁶ Estere ngwenyi: “Yomwene mukwa kole yetu, chingulungulu Hamane yoze twalimika nenyi!” Hamane yevwa mwongo ku meso ja mwanangana ni mwazovu ni che kwamba nawa ka.

⁷ Mwanangana yavundumuka ni ufwatulo, yakatuka mu chibatulo chize te anatwama, yatuhuka haze, yaya mu munda hehi ni zuwo lia mwanangana. Hamane yamona ngwenyi, mwanangana mamulinga chibi, kashika yaliondela kuli mwazovu Estere hanga amulamwine,

⁸ Hamane te machilimbukila ha muu (mukango) wa mwazovu Estere ni kuliondela ngwenyi, amuvwile kama keke. Hohene mwanangana yanjila nawa mu chibatulo, yachimona, yatenuka ngwenyi: “Mutu yono kanalingi chibi kuli mwazovu kwe ku meso jami, ni mwe mu zuwo liami, nyi?” Shimbu lize te mwanangana machihanjika, tuvumbi twenyi yaafuka Hamane hina ku mutwe.

⁹ Umuwika mukachi ko, Harabona, yamba ngwenyi: “Hamane halulika kulu mutondo ku zuwo lienyi asukike ho Mordekai, yoze walamwinyine mwanangana. We mutondo uli wa metro makumi aali ni jaali!” Mwanangana ngwenyi: “Musukikenu ho!”

¹⁰ Chenacho asukikile Hamane ha mutondo uze alulikile mwene hanga asukike ho Mordekai. Mba ufwatulo wa mwanangana yiuhwa.