Estere 6 - Mukanda Wa Zambi 1970

Mwanangana yalemesa Mordekai

¹ Ha ufuku uze mwanangana kabombele ko tulo. Mba yeta mukanda wa sango ja wanangana hanga amutangile wo.

² Chihanda cha mukanda uze amutangilile yihasonewa ngwo, Bigtana ni Tereshe, tufunga twa chikolo cha zuwo lia mwanangana, yaatwama punga ya kushiha mwanangana. Alioze Mordekai yaamona, yaya ni kwambulwila mwanangana.

³ Mba mwanangana Ahashueru yahula ngwenyi: “Chibema chika twalinga kama kuli Mordekai ni kumulemesa ni kumukundulula ha chize alingile?” Tuvumbi twenyi yaamukumbulula ngwo: “Nichimwe, mwanangana.”

⁴ Mwanangana yahula ngwenyi: “Iya uli mu yiize?” Ha Shimbi lizeliene te Hamane hanjila mu yiize. Te kaneza alwezele mwanangana asukike Mordekai ha mutondo uze haanamuluiikila.

⁵ Tuvumbi ngwo: “Mwanangana, Hamane uliko, kananushimbwila.” Mwanangana ngwenyi: “Anjile.”

⁶ Hamane yanjila. Henaho mwanangana yamuhula ngwenyi: “Kuli umwe mutu yoze ngunazange kulemesa kuhiana. Kuchi chatamba kumulinga?” Hamane yalinyonga ngwenyi: “Yoze anambe kulemesa mwanangana kuhiana kali iya? Yami, hi mukwo ko.”

^7-8 Hamane yakumbulula ngwenyi: “Vulie mwanangana! Mutu yoze mwanangana anambe kulemesa, amujika mahina ja wanangana waze wakuzala yenwene, ase chipangula ha mutwe wa kavwalu wa yenwene.

⁹ Mba mwe mwanangana ambile umwe mukwa lutwe wenyi mulemu Wahiana, ajike mutu yoze mahina waze, amunyinyise ha kavwalu, amwendese mu jila yinene ya limbo. Mukwa lutwe yoze unamwendesa akololoke ngwenyi: ‘Talenu chize mwanangana akulinga mutu yoze anazange kulemesa.’ ”

¹⁰ Mba mwanangana yambila Hamane ngwenyi: “Tambuka, anda mahina ni kavwalu, linga yuma yino hali Kayuda Mordekai. Muumuwana kanatwama ku chikolo cha zuwo liami. Linga yino yeswe hiwamba, kanda kuhona nichimwe.”

¹¹ Hohene Hamane yanda mahina ni kavwalu, yajika Mordekai mahina, neye yanyina ha kavwalu. Mba Hamane yamwendesa mu jila yinene ya limbo ni kukololoka ngwenyi: “Talenu chize mwanangana akulinga kuli mutu yoze anazange kulemesa!”

¹² Mwabwamuze Mordekai yahiluka kwenyi ku chikolo cha zuwo lia mwanangana. Alioze Hamane yachinyina ku mahienyi ni kulifuka mutwe wenyi mumu ha sonyi.

¹³ Yalweza pwo lienyi Zereshe ni masepa jenyi yuma yize yeswe. Mba pwo lienyi ni masepa jenyi akwa mana yaamwamba ngwo: “Haa puu, kujakangana! Mordekai habutuka kukulimbula. Ni chize ali Kayuda, kuwahashile kumukumba.”

Mwanangana yashiha Hamane

¹⁴ Muze te maachihanjika, tuvumbi twa mwanangana yaaheta ni kwanda Hamane aye nenyi ku chiteleka cha mwazovu Estere.