Estere 5 - Mukanda Wa Zambi 1970

Estere yatambika mwanangana ni Hamane ku chiteleka

¹ Muze tangwa lia muchitatu hiliaheta, Estere yazala mahina jenyi a wanangana, yaya ni kumana mu yiize ya zuwo, hatalanganyi ni chitwamo cha mwanangana. Mwanangana te kanatwama ha chitwamo chenyi hatalanganyi ni chikolo.

² Muze hamona mwazovu Estere kanamana haze, yamuvwila vumbi, yamuzozela lukanda wa oru. Estere yakundama, yakwata ku lukanda.

³ Mwanangana yamuhula ngwenyi: “Mwazovu Estere yika unazange? Chika unechi? Mungukwahacho, chibwe Chihanda cha ha muchima cha wanangana wami.”

⁴ Estere ngwenyi: “Vulie mwanangana wami! Nyi chinanuwahila, ngunazange yenu ni Hamane nwize ku chiteleka chami chize hinanululikila musono.”

⁵ Mwanangana yatuma liji kuli Hamane eze nikawashi, hanga aye ku chiteleka cha Estere. Chenacho mwanangana ni Hamane ayile ku chiteleka chize.

⁶ Muze te ananu vinyu mwanangana yahula mwazovu ngwenyi: “Ngulweze chize unazange, hanga ngukwehe cho. Mungukwaha cho, chibwe Chihanda cha ha muchima cha wanangana wami.”

⁷ Estere ngwenyi:

⁸ “Vulie mwanangana wami, nyi nunapale, ngunazange yenu ni Hamane hamene nukabwa nawa ku chiteleka chami chikwo chize mungukanutelekela. Ha ola yize mba mungunulweza chize ngunazange.”

Hamane yatwama punga ashihe Mordekai

⁹ Muze Hamane hakatuka ku chiteleka, yawahilila ni chiseke chinji. Alioze ha kumona Mordekai ku chikolo cha mwanangana kasolo kukatuka ni kumuvumbika, Hamane yevwila Mordekai ufwatulo unji.

¹⁰ Hindu Hamane yalihumikiza, yaya ku mahienyi. Mba yatambika masepa jenyi, yatambika nawa pwo lienyi Zereshe.

¹¹ Hamane yalichichimieka kuli ayo chize habwa pichi, ni chize habwa ni ana a malunga anji, ni chize mwanangana hamutongola ni kumusa ha muhela ulemu wa kulutwe, ni chize habwa mulemu kuhiana akwa lutwe akwo.

¹² Yamba nawa ngwenyi: “Ayeenwe, musono nawa mwazovu katambikile mutu mukwo shina yami ni mwanangana ku chiteleka chenyi, cho kuwaha, ni hatulakenya nawa hamene.

¹³ Alioze yino yeswe kuli yami yili yamokomoko, muze ngunamono Kayuda Mordekai kanatwama ku chikolo cha mwanangana.”

¹⁴ Pwo lienyi ni masepa jenyi yaamwamba ngwo: “Kuheshi Chuma, lulika umwe mutondo wa metro makumi aali ni jaali. Hamene ukalweze mwanangana hanga akasukike ho Mordekai, mba ukahase kuya ku chiwanyino ni uwahililo.” Hamane yamona ngwenyi, nyonga libema, mba yalulika mutondo usuku.