Estere 4 - Mukanda Wa Zambi 1970

Mordekai yahula Estere akwase Ayuda

¹ Muze Mordekai hevwa yuma yino, yatanuna mahina jenyi ni kubihilila. Mba yazala mwanji ni kulimwangina uto, yendangana mukachi ka limbo nikulila mbimbi, nikulinyenga,

² ndoo ku chikolo cha mwanangana. Alioze kanjilile ko mu zuwo, mumu te niumwe kahashile kunjila mo nyi hazala mwanji.

³ Mu yifuchi yeswe ya wanangana, muze heevwa Shimbi ya mwanangana, Ayuda yaalila mbimbi ni kulitwamina kulia. Anji yaazala mwanji ni kulilangumuna mu uto.

⁴ Muze ana mapwo waze te akulingila Estere ni malunga waze akutunguna haamulweza chize Mordekai analingi, Estere yevwa chinyengo. Yatumina Mordekai mahina hanga azale, azule mianji, alioze Mordekai kaatambwile ko.

⁵ Mba Estere yatambika Hataka, umwe kavumbi wakutunguna yoze mwanangana atongwele kumulingila, amutume kuli Mordekai hanga anyingike chize kwabwa ni mumu yika.

⁶ Mba Hataka yaya kuli Mordekai, yoze te unatwama mu yiize ku chikolo cha zuwo lia mwanangana.

⁷ Mordekai yamulumbunwina yuma yeswe chize yabwile, ni ubite uze Hamane alakenyene kusa mu mushete wa wanangana hanga akanongese Ayuda eswe.

⁸ Yamwaha nawa mukanda wa Shimbi yize mwanangana ahanyine mu limbo lia Shushane hanga akanongese Ayuda, Mordekai yamwamba autwale kuli Estere ni amulumbunwine je sango, hanga Estere aye alembejeke mwanangana ni kuliumba kuli iye evwile atu jenyi Ayuda keke.

⁹ Mwe Hataka yautwala, yamulumbunwina.

¹⁰ Mba Estere yatuma Hataka alweze Mordekai ngwenyi:

¹¹ “Shimbi yinambe ngwo: mweswe mutu, chibwe lunga hanji pwo, manjila mu yiize ya mwanangana, nyi kamutambikile ko, chamutamba kufwa. Atu eswe chize kuli akwa kuyula ja mwanangana ndoo kuli atu eswe a mu yifuchi kaanachinyingika. Shina mwanangana nyi wamwolwela lukanda wenyi wa oru, mba matwama ni mwono. Alioze yami, kakweji habalika, mwanangana kangutambikile ko.”

¹² Muze Mordekai hevwa liji lia Estere,

¹³ yamukumbulula ngwenyi: “Kanda unyonga ngwe, yena muukasala ni mwono hakachi ka Ayuda mumu uli mu zuwo lia mwanangana.

¹⁴ Tala, ha tangwa ngwe lino, nyi wahola kwe kuluu, kuma kweka mukwiza ulamwino wa Ayuda. Alioze yena kumuufwa, ni vungu lia tatenu kumulinonga. Hindu iya Unanyingika, hanji ha chikuma chinochene, che akupwishilile mwazovu wa mwanangana!”

¹⁵ Estere yakumbulula Mordekai ni maliji wano ngwenyi:

¹⁶ “Yako ukungulule Ayuda eswe a mu Shushane. Alitwamine kulia ni kungulembela kama. Kanda nulia chimwe Chuma hanji kunwa matangwa atatu. Ni yami ni tuvumbi twami a mapwo mutulinga nawa chizechene. Mba munguya kuli mwanangana, chibwe kuchalitele ni Shimbi. Chibwe kufwa, mungufwa.”

¹⁷ Mordekai yaya, yalinga yeswe yize amulwezele kuli Estere.