Estere 3 - Mukanda Wa Zambi 1970

Hamane yatwama Ayuda punga aashihe

¹ Mwabwamuze mwanangana Ahashueru yapwisa umwe mutu, jina lienyi Hamane, mulopo wa mwanangana. Hamane te mwana wa Hamedate wa ku vungu lia Agage.

² Mwanangana yahana Shimbi kuli akwa lutwe jenyi eswe alemese Hamane ni kumufukamina, ni kumuwayila. Eswe yaachilinga, shina lume Mordekai yalituna kwenyi.

³ Mba tufunga waze te akufunga chikolo cha mwanangana yaahula Mordekai ngwo: “Kuchi kevwe yena kuushi kwononoka ku Shimbi ya mwanangana?”

⁴ Yaamwamba cho tangwa ha tangwa, alioze Mordekai kaabanjikile ko. Yaakumbulula ngwenyi: “Nguli Kayuda, chahashile kuwayila Hamane.” No yaalweza Hamane Chuma chize, ni kulihula kachi malihumikiza ni Mordekai, nyi ka.

⁵ Hamane yalikasa wuli unji muze hamona ngwenyi, Mordekai kasolo kumufukamina ni kumuwayila,

⁶ nyi muze hevwa nawa ngwo, Mordekai kali Kayuda, yanyonga ngwenyi, hichibema ko kushiha Mordekai wika. Yalulika kushiha Ayuda eswe a mu chifuchi cha Persia.

⁷ Ha mwaka kumi ni wa muchaali wa kuyula cha mwanangana Ahashueru, ha kakweji mutangu, Nisane, Hamane yalulika kuta chela (mu liji lio ngwo: “purime”) hanga anyingike tangwa ni kakweji yoze maakashiha Ayuda. Yaamona ngwo, ha tangwa lia kumi ni lia muchitatu lia kakweji kumi ni wa muchaali, kakweji wa Adare.

⁸ Hamane yalweza mwanangana ngwenyi: “Vulie mwanangana! Kukuli limwe vungu waze atwama mu wanangana wenu, haanalitande mu yifuchi yeswe. Kaali ni ndako jize jalisa ni ja atu akwo. Chikwo nawa, keeshi kwononokena Shimbi ja mwanangana. Kashika mwanangana, hi chibema ko kulihumikiza ni atu ngwe wano.

⁹ Mwanangana! Nyi chinanuwahila, Senu Shimbi ngwenu, atu wano chatamba kwanongesa. Nyi munuchilinga, yami mungusa mbongo ja prata kuhiana kilo 340,000 mu mushete ja kululika najo milimo ya wanangana.”

¹⁰ Mwanangana yachiza kazeya kenyi, yamuhana kuli Hamane, mwana wa Hamedata, wa ku vungu lia Agage, mwe mukwa kole wa Ayuda.

¹¹ Mwanangana yambila Hamane ngwenyi: “Atu ni je mbongo jo, yeswe yili niye, linga cheswacho unazange.”

¹² Hohene ha tangwa kumi ni lia muchitatu lia kakweji mutangu, Hamane yatambika akwa kusoneka ja mwanangana, yaalweza kusoneka Shimbi yize, ni kuyalumuna mu heswe liji nikulita ni sona ja liji lio, ni kuyituma kuli akwa lutwe ni akwa kuyula eswe. Yaayisoneka mu jina lia mwanangana Ahashueru, yaasa ho nawa chinyingi cha kazeya kenyi.

¹³ Mikanda yize yaayituma mu moko ja tunganda ayitwale mu yifuchi yeswe ya wanangana. Yaasoneka ho ngwo, anongese Ayuda eswe, tushinakaji ni akweze, mapwo ni ana, ha tangwa lumuwika, lia kumi ni lia muchitatu lia kakweji kumi ni wamuchaali, Adare. Chatamba kwashiha, kweevila keke ka, ni kububa ubite wo weswe.

¹⁴ Sango ja mikanda yize chatamba kujambulula kuli atu eswe mu chifuchi cheswe, hanga akalilulike ha tangwa lize.

¹⁵ Nikulita ni liji lia mwanangana, Shimbi yize atu eswe mu limbo lia wanangana mu Shushane yaayinyingika, ni tunganda yaayitwala mu chifuchi cheswe. Mwanangana ni Hamane yaatwama ni kunwa vinyu, alioze atu a mu limbo yaalibikala.