Estere 2 - Mukanda Wa Zambi 1970

Mwanangana yapwisa Estere mwazovu

¹ Muze ufwatulo wa mwanangana hiwatuluka, mba yewuluka yize alingile mwazovu Vashti ni sango jize iye mwanangana amwangine ha chikuma chize.

² Mba amwe a kuli akwa kuyula ja mwanangana waze abwile hamwe nenyi yaamwamba ngwo: “Vulie mwanangana! Mumu yika kunusolo kuzanga anufupile amwe ana mapwo yileza?

³ Nutongole akwa lutwe, mwasula yifuchi yeswe ya wanangana, akungulule ana mapwo eswe yileza, eze muno mu Shushane, limbo lia wanangana. Aakunjike mu moko ja Hegai, kavumbi kenu wakutunguna yoze wakufunga mapwo jenu, akaahe yuma ya kulibemesa nayo.

⁴ Mba munutongola mwana pwo yoze munuzanga, numupwise mwazovu, asalakane Vashti.” Mwanangana yamona ngwenyi, wano kaali mana abema, yachilinga.

⁵ Mba mu Shushane te kumwatwama umwe Kayuda, Mordekai, mwana wa Jaire, wa ku vungu lia Benjamine, ku jimo lia Kishi ni Shimei.

⁶ Muze mwanangana Nebukanezore wa Babilone akwachile Jehoakine, mwanangana wa Yuda mu Yerusaleme, ni kuya nenyi mu undungo hamwe ni mbunga ya funge, Mordekai te kali mukachi ko.

⁷ Mordekai te kali ni musonyenyi wa pwo, Estere, mu hebreu ngwo, Hadasa. Muze yisemi jenyi haafwa, Mordekai yamwanda, yamulela ngwe mwanenyi. Estere te umwe mwana pwo chileza.

⁸ Muze mwanangana hamwanga sango jize, ana mapwo anji ejile ku Shushane. Estere neye yabwa mukachi ko, yaamusa mu chipanga cha mwanangana mu moko ja Hegai, yoze te wakufunga mapwo ja mwanangana.

⁹ Hegai yazanga Estere, yamuvwila vumbi. Yalipupwisa kumwaha yuma yibema ya kulibemesa nayo ni yakulia yibema. Yamutongwela chibatulo chibema chahiana mu zuwo, yamwaha ana a mapwo shimbiali a mu zuwo lia mwanangana amulingile.

¹⁰ Estere kalwezele ko atu ngwenyi: nguli Kayuda, mumu Mordekai te hanamukanjisa ngwenyi: “Kanda usolola vungu lie.”

¹¹ Tangwa ha tangwa Mordekai te kakwendela ku chipanga cha ana a mapwo ni kwivwa chize Estere anatwama ni yize muyimuwana.

¹² Kubemesa cha ana mapwo chabwile cha mwaka wa muwundu, kuwaya maji a mira tukweji asambano, ni kuwaya maji akwo a vumba libema tukweji asambano nawa. Mba maatwala e ana mapwo ku zuwo lia mwanangana Ahashueru umuwika umuwika.

¹³ Muze mwe mwana pwo maya ku zuwo lia mwanangana, mahasa kuzala ngwe chize anazange.

¹⁴ Chamutamba kuya ku zuwo lia mwanangana ha chingoloshi. Muze mukucha maamutwala ku zuwo likwo lia mapwo ni kumukunjika mu moko ja Shashgaze, umwe mutu wakutunguna, kafunga ka mapwo ja mwanangana. Mwe mwana pwo kechi kuhiluka nawa ku zuwo lia mwanangana, shina mwe mwanangana makamutambika.

¹⁵ Tangwa yiliheta lize Estere maya ku zuwo lia mwanangana. Estere yono, mwana wa Abihaile, musonyi wa Mordekai, mwe yoze wamulelele. Estere te kaakumuchichimieka kuli eswe waze te akumumona. Muze tangwa lienyi hiliaheta, yazala lume yize amuhele kuli Hegai.

¹⁶ Chenacho ha mwaka wa muchishimbiali wa kuyula cha Ahashueru, ha kakweji wa muchikumi (Tebete), yaamutwalila Estere.

¹⁷ Mwanangana yazanga Estere kuhiana ana mapwo akwo, yamuvwila vumbi liahiana. Yamujika chipangula cha wanangana, yamupwisa mwazovu hanga asalakane Vashti.

¹⁸ Henaho mwanangana yalingila Estere chiteleka chinene hanga amulemese, yatambika akwa lutwe ni akwa kuyula jenyi eswe. Yechesa atu kufweta lijimu, yaaha yawana nikulita ni ndako ya mianangana.

Mordekai yalamwina mwanangana

¹⁹ Mwabwamuze mwanangana yapwisa Mordekai mukwa kuyula.

²⁰ Estere kanda te achilisolola ngwenyi, nguli Kayuda, ngwe chize amulwezele kuli Mordekai. Mumu te kakwononokena kuli Mordekai ngwe chize alingile mu wanuke wenyi.

²¹ Ha matangwa waze, muze te Mordekai anatwama ku chikolo cha zuwo lia mwanangana, atu aali a mwanangana akutunguna, Bigtana ni Tereshe, akwa kufunga chikolo, yeevwila mwanangana wuli, yaazanga kumushiha.

²² Chuma chino Mordekai yachinyingika, yachilweza Estere mwazovu wa mwanangana. Estere neye yachilweza mwanangana mu jina lia Mordekai.

²³ Muze haasopa we mulonga, yaamona ngwo, kuma chamwenemwene. Kashika aasukikile eswe aali. Sango yaajisoneka mu mukanda wa sango ja mianangana.