Estere 1 - Mukanda Wa Zambi 1970

Mwazovu Vashti yalituna liji lia mwanangana Ahashueru

^1-2 Mwanangana Ahashueru, ku Shushane, limbo lia wanangana mu chifuchi cha Persia, te kakuyula yifuchi 127, chize ku chifuchi cha India ndoo ni ku chifuchi cha Sudane.

³ Ha mwaka wa muchitatu wa kuyula chenyi, yalinga chiteleka, yakungulula akwa lutwe ni akwa kuyula jenyi eswe. Tujita a mu yifuchi ya Persia ni Media no kwe abwile hamwe ni akwa kuyula akwo ni alemu a mu yifuchi.

⁴ Ha tukweji asambano mwanangana Ahashueru yaalweza upichi ni uhenya ni ulemu wa wanangana wenyi.

⁵ Mba mwanangana yalinga chiteleka chinene mumu hali atu jenyi eswe a mu limbo lia Shushane, pichi ni yiswale. Chiteleka chino achilingile matangwa shimbiali mu yiize ya ku zuwo lia mwanangana.

⁶ Kwe ku yiize yatalilika ko mahina atoma, ni alauluka, a Wanda akukasa ku ngo ja prata ja kusa ku manguji a mawe alemu atoma, yitwamo ya oru ni prata yaakujingilika mu yiize, te haala mo mawe achila, ni atoma, ni achizumwa, ni alauluka.

⁷ Yaanwina mu misenge ya oru yeka ni yeka. Mwanangana yaaha vinyu yinji.

⁸ Kunwa chize kuchabwile ko ni songo; mumu te mwanangana halweza kulu tuvumbi twenyi ngwenyi; mutu ni mutu anwe ngwe chize anazange.

⁹ Ha shimbu lizeliene, mu zuwo lia mwazovu Vashti neye yalingila mapwo chiteleka.

¹⁰ Ha tangwa lia muchishimbiali lia chiteleka mwanangana te hevwa kuwaha ha kunwa chenyi, yatambika Mehumane, ni Bizta, ni Harabona, ni Bigta, ni Abagta, ni Zetare, ni Karkasa, tuvumbi twenyi shimbiali akutunguna.

¹¹ Yaamba ngwenyi: “Yenu nunehe mwazovu Vashti, azale chipangula chenyi cha wanangana.” Mwe Vashti te chileza, mwanangana yazanga kulweza akwa lutwe jenyi ni eswe waze alakenyene ubeme wenyi.

¹² Alioze muze tuvumbi haamulweza liji lia mwanangana, mwe mwazovu yalituna kuya. Mba mwanangana yalikasa wuli.

¹³ Mwanangana te ndako akwete ya kuhula yikuma yakutwala ku Shimbi ni ubatwilo. Mba yatambika akwa mana, waze maanyingika chize chaatamba kulinga.

¹⁴ E akwa mana wano: Karshena, ni Shetare, ni Admata, ni Tarshishi, ni Merese, ni Marsena, ni Memukane, akwa mana shimbiali a ku Persia ni Media, enoo abwile akwa kuyula mu wanangana.

¹⁵ Yambila malunga waze ngwenyi: “Yami, mwanangana Ahashueru, natumanga tuvumbi twami kuli mwazovu Vashti ngwami, eze. Alioze kasolo kwenyi! Shimbi kuchi yinambe hali pwo ngwe yono?”

¹⁶ Mba Memukane yakumbulula mwanangana ni akwa lutwe jenyi ngwenyi: “Vulie mwanangana! Mwazovu Vashti kalelesele ko mwanangana wika, alioze ni akwa lutwe eswe, ni malunga akwo eswe a mu wanangana uno!

¹⁷ Mapwo eswe a mu wanangana maabutuka kulelesa malunga jo muze meevwa chize mwazovu halinga. Maamba ngwo: ‘Mwanangana Ahashueru yatambika mwazovu Vashti ha kwiza kuli iye, alioze yalituna.’

¹⁸ Muze miazovu ja akwa lutwe mu Persia ni Media maachivwa, chibwe musono uno maalweza malunga jo. Ha chino, mapwo kweswe keechi kalemesa nawa malunga jo, malunga no maabwa ni kuvwila mapwo jo wuli.

¹⁹ Mwanangana, nyi nunamono ngwenu chinalite, hanenu Shimbi ngwenu, Vashti kanda aheta nawa ku meso ja mwanangana. Nuyisoneke mu mikanda ya Shimbi ja Persia ni Media, hanga kuyichi kwalumuka nichimwe. Mba amusalakane kuli yoze wamuhiana kubema.

²⁰ Muze Shimbi maayivwa mu chifuchi chenu cheswe, mapwo eswe maakalemesa malunga jo, chibwe pichi hanji yiswale.”

²¹ Mwanangana ni akwa lutwe jenyi yaatayiza nyonga lize. Mba mwanangana yalinga ngwe chize ambile Memukane.

²² Mu yifuchi yeswe ya wanangana yatuma sango jize mu liji lio ene nikulita ni ndako yakusoneka cho. Lunga mweswe chatamba kubwa mwata wa zuwo lienyi, iye mwe mabwa ni liji lia chiyulo.