Efesu 6 - Mukanda Wa Zambi 1970

Ana ni yisemi

¹ Yenu ana ononokenenu yisemi jenu, mumu ha kuliendela chenu ni Mwene Yesu, mumu chino chinalite.

² “Lemesa tatenu ni noko,” yenayo ye Shimbi yitangu yize yili ni chilakenyo.

³ Che chilakenyo chenachi achi: “hanga ukawahe, ni hanga Ukatwame miaka yinji hano hashi.”

⁴ Nyi yenu atata, kanda nusosomba ana jenu. Alioze alelenu ni kwafumba ni kwakanyamisa.

Ndungo ni miata

⁵ Yenu ndungo, ononokenenu miata jenu a hano hashi, ni woma ni kuchikima. Chilingenu ni mbunge yimuwika, ngwe nunavumbika Kristu.

⁶ Kanda nuchilinga ku meso wika, ha kubemena kuli ayo. Alioze lingenu ngwe chize anazange Zambi, ni mbunge jenu jeswe ngwe ndungo ja Kristu.

⁷ Lingenu milimo yenu ya undungo ni mbunge yimuwika, ngwe nunavumbika Mwene Yesu, hi atu ko.

⁸ Iwulukenu ngwenu, Mwene makahana chawana kuli mutu ni mutu nikulita ni milimo yenyi yibema, chibwe ndungo hanji mwenyaho.

⁹ Ni yenu miata, lingenu nawa chizechene kuli ndungo jenu. Litwaminenu kwevwisa woma. Iwulukenu ngwenu, yenu ni ndungo jenu nuli ni Mwata umwika mwilu, yoze keshi katonde.

Jita ya mukwa Kristu

¹⁰ Hakusula, litakamisenu mu kulinunga chenu ni Mwene Yesu, ni mu tachi ja ndundo jenyi.

¹¹ Lipakatenu yuma ya Zambi yeswe ya jita, hanga nuhase kujikiza ha kulimika ni ukanyame ubi wa Sakwonga.

¹² Mumu kutushi kulimika ni atu, alioze ni mwiku ubi wa tachi jinji, ni akwa kuyula, ni akwa ndundo, ni mianangana a milima a mwakono.

¹³ Kashika, lipakatenu haliabwila yuma ya Zambi yeswe ya jita! Mba muze tangwa libi mulikeza, nukahase kujikiza mu kulimika ni mukwa kole, ni chibwe muze hinwasa jita ndoo ku songo, munukahasa kumana nguu.

¹⁴ Kashika lilulikenu: bwenu ni umwenemwene ngwe chize nwakubwa ni muya mu zalilo jenu; bwenu ni ululi ngwe chize nwakubwa ni chikuto cha jita;

¹⁵ zalenu uwahililo wa kwambujola Sango Jibema ja uhwimino ngwe sapato ku molu jenu;

¹⁶ bwenu ni ufulielo matangwa eswe ngwe lukebwe yoze munuhasa kukinda nenyi mivwi yeswe ya kahia ya mwe Mubi.

¹⁷ Tayizenu ulamwino ngwe chize nwakutayiza kusa chifulu cha jita ku mutwe. Tayizenu Maliji a Zambi ngwe mukwale uze Mwiku wa Linanga unanwehe.

¹⁸ Lembenu matangwa eswe ni kuliumba kuli Zambi. Lembenu hakutwala ku yuma yeswe, nikulita ni kusongwela cha Mwiku wa Linanga. Ha chikuma chino, laulenu, nyongononenu. Lembelenu akwa Kristu eswe.

¹⁹ Ngulembelenu nawa yami, hanga Zambi angwehe maliji analite muze ngunambe kuhanjika. Lembenu hanga nguhase kuhanjika ni hamu nikunyingikisa chijimbikilo cha Sango Jibema.

²⁰ Nguli kanganda ka Sango jino Jibema, chibwe nguli mu zuwo lia lamba haliabwila. Kashika lembenu hanga nguhanjike ni hamu ngwe chinalite.

Kumeneka

²¹ Tichiku, mukwetu mu ufulielo, kanda kavumbi wa kushishika mu milimo ya Mwene Yesu, makanwambulwila sango jeswe jakutwala kuli yami, hanga nunyingike chize nguli.

²² Ngunamutumu anunyingikise chize tuli, ni kutakamisa mbunge jenu.

²³ Zambi Tata ni Mwene Yesu Kristu ahane uhwimino ni zango kuli akwetu eswe, hamwe ni ufulielo.

²⁴ Zambi alweze utu eswe waze akuzanga Mwene wetu Yesu Kristu ni zango lize kulishi kuhwa.