Efesu 5 - Mukanda Wa Zambi 1970

Bwenu akwa pangu

¹ Nuli ana waze Zambi anazange. Kashika, mwimbululenu.

² Bwenu akwa zango, ngwe chize Kristu atuzangile ni yakunjika mwono wenyi hali yetu, ngwe chitapo ni milambu ya vumba libema yize yinawahila Zambi.

³ Nuli akwa Kristu. Ha chino, kuchalitele chibwe kuvuluka hakachi kenu: utanji, ni luchisa, ni lwahu wa mbongo.

⁴ Kuchatelele nichimwe nuhanjike maliji a sonyi, chibwe miselo ya uhepuke, hanji maliji a kutukana. Shinoho kusakwilila Zambi.

⁵ Nyingikenu kanawa ngwenu, chitanji niumwe, chibwe mukwa luchisa, chibwe mukwa lwahu wa mbongo, (mumu lwahu wa mbongo kali ngwe kukombelela mahamba) makanjila mu Wanangana wa Kristu ni wa Zambi.

⁶ Mutu niumwe kanda anwonga ni maliji a uhepuke, mumu ha yuma ngwe yino, Zambi makatenukina waze keeshi kumwononokena.

⁷ Kashika kanda nulikata no.

⁸ Hatangu ni yenu nawa nwabwile mu milima. Alioze haliabwila, mu kulinunga chenu ni Yesu Kristu, nuli mu pangu. Ha chino bwenu ngwe akwa Pangu.

⁹ Mumu pangu kuliakwima mihuko yeka ni yeka yibema, ni ya ululi, ni yamwenemwene.

¹⁰ Esekenu kunyingika chize chinabemena kuli Zambi.

¹¹ Kanda nuliendela ni waze akulinga yitanga yamokomoko ya milima. Shinoho, kuyineha mu pangu.

¹² (Yuma yize atu waze akulinga ku tenga, yikola ni sonyi ha kuyivuluka.)

¹³ Muze yitanga yino yeswe akuyineha mu pangu, ndako yayo yeswe yakusoloka lume zwalala.

¹⁴ Mumu chize cheswe hanachisolola chakwalumuka pangu. Kashika Mukanda wa Zambi unambe ngwo: “Laula yena uli mu tulo, hinduka ku kufwa! Mba Kristu makakutemukina.”

¹⁵ Kashika talenu kanawa ndako yenu. Kanda nubwa ngwe yihepuke, alioze ngwe akwa mana.

¹⁶ Yuma yibema yize nunahase kulinga, haliabwila yilingenu lume, mumu matangwa wano kaali abi.

¹⁷ Kanda nubwa yihepuke, alioze esekenu kunyingika chize Mwene Yesu anazange nulinge.

¹⁸ Kanda nuzengewa ni vinyu. Nyi ka, munuhungumuka ni yibi. Alioze zalenu ni Mwiku wa Linanga.

¹⁹ Nulihanjikise ni maliji a miaso (masamu) yeka ni yeka, yize akuhana Mwiku wa Linanga. Mwimbilenu Mwene Yesu miaso, mufumanyisenu mu mbunge jenu.

²⁰ Sakwilenu Zambi Tata matangwa eswe ha yuma yeswe mu jina lia Mwene wetu Yesu Kristu.

Mapwo ni malunga

²¹ Lizeyelenu ni akwenu, mumu ha vumbi lize nuli nalio kuli Kristu.

²² Yenu mapwo Zeyelenu kuli malunga jenu, ngwe chize nwakuzeyela kuli Mwene Yesu.

²³ Mumu lunga kali ni chiyulo hali pwo lienyi, ngwe Kristu kali ni chiyulo ha Chikungulwila. Kristu iye mwene kali Chilamwina cha Chikungwulwila, chize chili mujimba wenyi.

²⁴ Chenacho mapwo chaatamba kuzeyela kuli malunga jo, ngwe chize Chikungulwila akuzeyela kuli Kristu.

²⁵ Ni yenu malunga zangenu mapwo jenu ngwe chize Kristu azangile Chikungulwila, mba yakunjika mwono wenyi ha chiyo.

²⁶ Yachilinga hanga akunjike Chikungulwila kuli Zambi; yachilinga ni liji lienyi muze hachibemesa ni meya.

²⁷ Mumu yazanga kulikunjika Chikungulwila iye mwene mu uhenya wacho weswe, chibema, kuchishi kapalia, kuchishi chibeka hanji mukanya, hanji Chuma chikwo chalifwa ni yino.

²⁸ Malunga chaatamba kuzanga mapwo jo, ngwe chize akuzanga mijimba yo ene. Yoze wakuzanga pwo lienyi, kakulizanga iye mwene.

²⁹ (Mumu niumwe wakuvutwokela mujimba wenyi mwene. Alioze kakuuhoka ni kuufunga kanawa, ngwe chize Kristu akulinga ku Chikungulwila.

³⁰ Mumu tuli ngwe yihanda ya mujimba wenyi.)

³¹ Ngwe chize Mukanda wa Zambi unambe ngwo: “Ha chino lunga makahichika tato ni naye, akalinunge ni pwo lienyi, mba eswe aali maakabwa mutu umuwika.”

³² Chino chili chijimbikilo chinene. Yami ngunanyongo ngwami, chinahanjika hakutwala kuli Kristu ni Chikungulwila.

³³ Alioze chinalumbunuka nawa hakutwala kuli yenu: lunga mweswe azange mukwo pwo ngwe chize akulizanga iye mwene, ni pwo meswe ase mukwo lunga vumbi.