Efesu 4 - Mukanda Wa Zambi 1970

Kulivwa cha akwa Kristu

¹ Yami nguli funge mu zuwo ha lamba mumu ha milimo ya Mwene Yesu. Ngunaliumbu kuli yenu ngwami, Twamenu kanawa ngwe chize azangile Zambi muze anutambikile.

² Matangwa eswe likehesenu, bwenu yimbovu ni yihomboloji. Lihumikizenu ni zango.

³ Esekenu kunyongonona mu kulivwa chize akuhana Mwiku wa Linanga, ku sambukila yize yakunununga ni akwenu.

⁴ Kuuli lume mujimba umuwika ni Mwiku wa Linanga umuwika. Chizechene nawa, kuchili lume Chuma chimuwika chize Zambi anulwezele ha kuchisa mbunge.

⁵ Kwali lume Mwene umuwika, ni ufulielo umuwika, ni upapachiso umuwika.

⁶ Kwali lume Zambi umuwika kanda Tata ya atu eswe, yoze uli helu lia eswe, yoze wakulinga ni eswe, yoze watwama muli eswe.

⁷ Mutu mweswe hakachi ketu hanatambula chawana chenyi mwene, nikulita ni chize ahanyine Kristu.

⁸ Ngwe chize Mukanda wa Zambi unambe: “Muze azezukile mwilu, Yatwala funge hamwe nenyi. Yahana yawana kuli atu.”

⁹ Maliji wano, “yazezuka,” kuchi analumbunuka? Kaanalumbunuka ngwo, hatangu yahulumuka kushi lia mavu.

¹⁰ Yoze wahulumukine, mwenawo nawa wazezukile helu lia lilu, hanga akabwe kweswe.

¹¹ Iye wahanyine “yawana kuli atu”: amwe tunganda, akwo akwa munanyi ja Zambi, akwo akwa kwambujola, akwo tulayi, akwo alongeshi.

¹² Hayihana hanga alulike akwa Kristu kulinga milimo ya Zambi mu kutakamisa mujimba wa Kristu.

¹³ Chenacho eswe mutukalinunga hamuwika mu ufulielo wetu ni mu chinyingi chetu cha Mwana Zambi, mba mutukakola ngwe Kristu.

¹⁴ Mba kutuchi kabwa nawa ngwe ana, hanji ngwe atu waze anahungumuka ngwe ulungu ku tachi ja fuji ni miavu ya meya, mumu ha longeso lia akwa mahuza, waze akupiangula akwo ni kwonga cha kutaka.

¹⁵ Alioze nikuhanjika umwenemwene ni zango, chatutamba kutatuka mu yuma yeswe mu kulinunga ni Kristu yoze uli ngwe mutwe.

¹⁶ Ku chiyulo chenyi yihanda yeswe ya mujimba yakusepekenya ni kununga hamuwika, ni mujimba hiunalinungu weswe wamuundu mu makonekeno jawo. Chenacho muze Chihanda cheswe muchilinga ngwe Chinatambe, mujimba weswe muutatuka ni Kulitakamisa ku zango.

Mwono Waha mu kulinunga ni Kristu

¹⁷ Kashika, mu jina lia Mwene Yesu, ngunambe ni ngunashindakenya ngwami, kanda nubwa nawa ngwe waze hi akwa Kristu ko, waze akwete manyonga amokomoko.

¹⁸ Mu kunyonga cho kaali akwa milima. Keeshi ni Chihanda nichimwe ku mwono uze akuhana Zambi, mumu keshi mana, ni mbunge jo jikalu.

¹⁹ Keeshi kwivwa nawa sonyi. Haanalikunjika ku usolo ubi, kaakuhungumuka ni yitanga yeka ni yeka ya luchisa.

²⁰ Alioze kunwalilongesele yuma ngwe yize hakutwala kuli Kristu.

²¹ Hinunevu sango jenyi; alongeshi haananulongesa umwenemwene uze uli muli iye.

²² Kashika zulenu ngwe hina mutu wenu mukulu, yoze te wakunubinjisa hatangu. Mutu yoze mukulu walionwene iye mwene ku usolo wenyi wa kwonga.

²³ Mbunge ni manyonga jenu jibwe jaha lume.

²⁴ Zalenu ngwe hina mutu mwaha, yoze Zambi atangile ni kulifwa chenyi, yoze unalisolola mu mwono wamwenemwene, mwono wa ululi, ni wa kulinanga.

²⁵ Kashika, ehukenu mahuza! Mutu mweswe ahanjike umwenemwene ni mukwo, mumu yetu eswe tuli ngwe yihanda ya mujimba umuwika.

²⁶ Nyi nunevu wuli, talenu kanawa kanda nuvulumuna. Kanda nwivwa wuli ndoo ku kutoka cha tangwa.

²⁷ Kanda nutayiza Sakwonga kunuyula.

²⁸ Mutu yoze te wakwiya, alitwamine kwiya, abutuke kulinga milimo, mba mayukisa mwono wenyi ha kubwa ni yuma yinazuku ya kukwasa nayo yiswale.

²⁹ Kanda nuhanjika liji nilimwe libi. Hanjikenu lume maliji waze analite, waze maatakamisa atu akwo mu ufulielo ngwe Chinatambe, mba munulinga kanawa kuli waze akunwivwa.

³⁰ Kanda nwivwisa chinyengo Mwiku wa Linanga wa Zambi, mumu Mwiku uze uli chinyingi chize chinalweza ngwo, nuli ana ja Zambi. Mwiku uze uli chilakenyo ngwo, Tangwa mulikeza lize Zambi makanutusula liakulu.

³¹ Mbilenu usasu weswe, ni ufwatulo, ni utenu, ni zungo, ni kushililika, ni uhuka weswe.

³² Lilwezenu utu ni kulivwila keke ni akwenu, likonekenenu, ngwe chize Zambi hananukonekena mumu hali Kristu.