Efesu 3 - Mukanda Wa Zambi 1970

Milimo ya Paulu mukachi ka waze hi Ayuda ko

¹ Kashika, ngunaliumbu kuli Zambi, yami Paulu, funge ya Yesu Kristu mumu hali yenu hi Ayuda ko.

² Nwevwile kulu ngwo, Zambi, mu utu wenyi, hanangwehe milimo yino mumu hali yenu.

³ Zambi hanangusolwela chijimbikilo chenyi ha kungunyingikisa cho. (Hingunasoneka amwe maliji hakutwala ku chikuma chino.

⁴ Ni muze munwatanga, munuhasa kunyingika chinyingi chami hakutwala ku chijimbikilo cha Kristu.)

⁵ Ku shakulu chijimbikilo chino kachinyingikishine ko kuli atu. Alioze haliabwila Zambi hanachisolola ku tachi ja Mwiku wa Linanga kuli tunganda twenyi a kulinanga ni akwa munanyi jenyi.

⁶ Chino che chijimbikilo: ku Sango Jibema, waze hi Ayuda ko haanahingi yiwape ya Zambi hamwe ni Ayuda. Eswe aali kaali yihanda ya mujimba umuwika. Ayo nawa kaali ni chilakenyo chimuwika chize Zambi hanalakenya mu kulinunga ni Kristu.

⁷ Hanangupwisa kavumbi ka Sango Jibema ku chawana chize Zambi anguhele ku utu wenyi ni ku ndundo jenyi.

⁸ Yami nguli mukepe Wahiana akwa Kristu eswe. Chibwe chocho, Zambi hanangukunjika utu uno wa kwambujola kuli waze hi Ayuda ko Sango Jibema ja yiwape yahiana ya Kristu,

⁹ ni kunyingikisa atu eswe ngwe chize mamanununa chijimbikilo chenyi. Zambi, yoze watangile yuma yeswe, wachihengekele ku shakulu,

¹⁰ hanga haliabwila, ku kushindakenya cha Chikungulwila, akwa kuyula ni tachi ja mwilu maahasa kunyingika mana ja Zambi hakutwala ku yuma yeswe.

¹¹ Zambi hanalingi chino nikulita ni upale wenyi wa miaka yeswe, uze amanunwine ku tachi ja Yesu Kristu, Mwene wetu.

¹² Mu kulinunga nenyi ni ha kumufuliela, tunahase kuheta ku meso ja Zambi ni hamu.

¹³ Ha chikuma chino, ngunaliumbu kuli yenu, kanda nutokesa hamu lienu ha lamba liami, mumu yuma yino yeswe muyinuyukisa.

Zango lia Kristu

¹⁴ Kashika, nakusa makungunwa hashi ku meso ja Tata.

¹⁵ Vungu lieswe lia mwilu ni hashi liakutambula kuli iye jina lialio liamwenemwene.

¹⁶ Ngunaliumbu kuli Zambi, nikulita ni kulumbama cha uhenya wenyi, anutakamise ni ndundo ja Mwiku wenyi mu mbunge jenu.

¹⁷ Nakuliumba nawa hanga Kristu, ku ufulielo wenu, akatwame mu mbunge jenu, nawa hanga nutande ngwe miji mu zango ni kujikiza.

¹⁸ Ngunaliumbu kuli iye nawa, hanga yenu, hamwe ni akwa Kristu eswe, munuhasa kunyingika zango lia Kristu, utohwe walio, ni Usuhwe walio, ni Usuhwe walio wa kwilu, ni ushuwe walio wa kushi.

¹⁹ Ewa, ngunazange nunyingike zango lienyi—lize mutu niumwe mahasa kulinyingika heswe. Ha kunyingika zango lino, munuzala ni kulumbama cheswe cha Zambi.

²⁰ Zambi mahasa kulinga kuhiana yeswe yize tunechi hanji tunanyongo! Machilinga ni ndundo jize jakulinga muli yetu.

²¹ Uhenya wa Zambi usoloke mu Chikungulwila ni muli Kristu Yesu ku miaka yeswe ni miaka yeswe. Chibwe kama Chenacho.