Efesu 2 - Mukanda Wa Zambi 1970

Mwono mu kulinunga ni Kristu

¹ Ha miaka ya kunyima yenu nwabwile ngwe afu mu yitela yenu ni mu shili yenu.

² Ha miaka yize te nwakwenda nikulita ni ndako yibi ya uutu ya hano hashi. Yinwononokena mwanangana wa tachi ja mu tetela, mwiku uze wakulinga haliabwila muli atu waze keeshi kwononokena Zambi.

³ Yetu eswe twabwile nawa ngwe ayo, twendele nikulita ni usolo ubi wa uutu wetu, yitumanununa upale wa mijimba yetu ni manyonga jetu. Te Zambi kakututenukina ngwe atu akwo eswe.

⁴ Alioze Zambi watuvwilile keke yinji ni zango linji.

⁵ Chibwe twabwile ngwe afu mu yitela yetu, hanatupwisa ni mwono hamwe ni Kristu. Hanatulamwina ku utu wa Zambi.

⁶ Mu kulinunga chetu ni Kristu Yesu, Zambi hanatuhindwisa ni mwono hamwe ni Kristu, hanatutwamisa hamwe nenyi mwilu.

⁷ Hanachilingi hanga alweze, ku miaka ya kulutwe, kulumbama cha utu wenyi ku zango lize hanatusolwela muli Kristu Yesu.

⁸ Mumu Zambi, ku utu wenyi, hananulamwina, mumu ha ufulielo. Ulamwino uno hi wa kuli yenu ko, kuuli chawana cha Zambi.

⁹ Niumwe mahasa kulisamba, mumu hi ku yitanga ya yenwene ko.

¹⁰ Mumu yetu tuli chitanga cha Zambi mu kulinunga chetu ni Kristu Yesu hanga tukalinge yitanga yibema, yize Zambi atululikilile shimbu kanda, hanga tukayilinge.

Tuli umuwika mu kulinunga ni Kristu

¹¹ Yenu, waze hi Ayuda ko nikulita ni Chisemuko, kaakunuvuluka ngwo: “Yilima” kuli Ayuda. Ayo kaakulivuluka ngwo: “Ngalami” (Ungalami uze wa mijimba).

¹² Yenu, waze hi Ayuda ko, iwulukenu chize nwabwile kusuku ni Kristu. Nwabwile yilambala; kunwabwile ko a ku mbunga yize atongwele Zambi. Kunwabwile ko ni Chihanda ku Usendo uze Zambi alakenyene atu jenyi. Te kunwanyingikine yoze munuhasa kusa mbunge, te kunushi Zambi!

¹³ Alioze haliabwila, mu kulinunga ni Kristu, yenu waze nwabwile kusuku, hananukundamisa mumu ha manyinga ja Kristu.

¹⁴ Mumu Kristu iye mwene hanatwehe uhwimino, muze hachinga Ayuda ni waze hi Ayuda ko abwe vungu limuwika. Ha kukunjika mujimba wenyi yabuzula chikalakala chize chaahandunwine, chize chaapwishile akwa kole,

¹⁵ yahwisa maliji ni ndako ja Shimbi ja Ayuda hanga akachinge mavungu wano aali ha kubwa vungu limuwika mu kulinunga nenyi, Chenacho aawanyishine.

¹⁶ Ku kufwa chenyi ha kulusu, Kristu yashiha kole, yachinga mavungu aali mu mujimba umuwika, ni kwawanyisa ni Zambi.

¹⁷ Chenacho Kristu ejile nikwambujola Sango Jibema ja uhwimino kuli yenu hi Ayuda ko, waze nwabwile kusuku ni Zambi, nawa kuli Ayuda waze abwile hakamwihi nenyi.

¹⁸ Ku tachi ja Kristu yetu eswe, Ayuda ni waze hi Ayuda ko, tunahase kukundama ku meso ja Tata mu kulinunga ni Mwiku wa Linanga uzewene umuwika.

¹⁹ Chenacho yenu waze hi Ayuda ko, hi nuli yilambala nawa ko, chibwe ngeji. Alioze nuli enyaho hamwe ni akwa Kristu ni akwo, nuli a ku mbunga ya Zambi.

²⁰ Ni yenu nawa, nuli ngwe zuwo liakutunga ha fundamentu yize asele tunganda twa Kristu ni akwa munanyi a Zambi. Liwe lia ha mbango lia fundamentu lili Kristu Yesu iye mwene.

²¹ Iye Wakukolesa zuwo heswe ni kulitohwesa kubwa zuwo lia chijila mumu hali iye Mwene Yesu.

²² Mu kulinunga nenyi, yenu nawa haananutungisa hamwe ni akwa Kristu akwo eswe ha kubwa zuwo limuwika mu lize Zambi akutwama ku tachi ja Mwiku wenyi.