Efesu 1 - Mukanda Wa Zambi 1970

Kumeneka

¹ Yami Paulu ngunanusonekena yenu akwa Kristu waze nwatwama mu limbo lia Efesu, akwa kushishika mu kuliendela chenu ni Kristu Yesu. Ku upale wa Zambi nguli kanganda ka Kristu Yesu.

² Zambi Tata yetu ni Mwene Yesu Kristu anulweze utu ni anwehe uhwimino.

Yiwape yize Zambi atuhele mu kulinunga ni Kristu

³ Tusakwililenu Zambi kanda Tato ya Mwene wetu Yesu Kristu! Hanatuwahisa mu kulinunga chetu ni Kristu ni kutwaha yiwape yeswe ya mwilu ya uzambi.

⁴ Muze te kanda achitanga hashi, Zambi watutongwele kulu ha kubwa atu jenyi mu kulinunga ni Kristu, hanga tukabwe akwa kulinanga, kutushi kapalia ku meso jenyi. Mu zango lienyi,

⁵ Zambi hanabatula shimbu kanda, kutupwisa ana jenyi ku tachi ja Yesu Kristu. Yachinyonga mumu te hichinamuwahila.

⁶ Halisenu Zambi mumu ha utu wenyi Wahiana, ni chawana chenyi chakulumbama chize atuhele mu kuliendela ni Mwanenyi.

⁷ Ku manyinga ja Kristu hanatukula, kafwa hanatukonekena milonga yetu nikulita ni utu wenyi Wahiana,

⁸ uze atulwezele wakulumbama! Mu mana ni malinjekela eswe

⁹ Zambi yalinga chize anyongene, yatunyingikisa chijimbikilo chenyi chize te hanabatula kulu kuchimanununa ku ndundo ja Kristu.

¹⁰ Manyonga wano Zambi makaamanununa muze tangwa hiliaheta ha kubalakenya yeswe yize yili mwilu ni yize yili hano hashi mu chiyulo cha Mwene umuwika, iye Kristu.

¹¹ Mu kulinunga chetu ni Kristu, Zambi hanatutongola shimbu kanda ha kubwa atu jenyi nikulita ni manyonga jenyi. Zambi kakulinga yuma yeswe nikulita ni chize abatwile ni chize apalile iye mwene.

¹² Kashika tufumanyisenu uhenya wa Zambi, yetu twaliangile kusa mbunge kuli Kristu!

¹³ Ni yenu nawa, muze nwevwile liji liamwenemwene, Sango Jibema jize janulamwinyine, yinufuliela Kristu. Mba Zambi yanusa chinyingi ha kubwa nienyi, ha kunwaha Mwiku wa Linanga uze alakenyene.

¹⁴ Mwiku uze unalweze ngwo, Zambi makatulamwina. Nawa ngwo, Zambi makakula liakulu yetu atu jenyi. Kashika tufumanyisenu uhenya wa Zambi!

Kulemba cha Paulu

¹⁵ Kashika, butu ku tangwa lize nevwile chize nwakufuliela Mwene Yesu ni chize nwakuzanga akwa Kirstu eswe,

¹⁶ Chishi kulitwamina kusakwila Zambi. Nakunwiwuluka mu yilemba yami.

¹⁷ Nakuliumba kuli Zambi ya Mwene wetu Yesu Kristu, Tata ya uhenya, ngwami, akanwehe Mwiku wa Linanga. Wenawo muukanwaha malinjekela ni kusolola Zambi kuli yenu, hanga nukamunyingike.

¹⁸ Nakuliumba ngwami, anwazulwile manyonga jenu ha kumona Pangu lienyi. Chenacho nunyingike: Chuma chize anutambikilile Zambi ha kuchisa mbunge, ni kulumbama cha yiwape yize akulakenya akwa Kristu,

¹⁹ ni ndundo jenyi jahiana muli yetu akwa kufuliela. Ni ndundo jizejene

²⁰ Zambi ahindwishile najo Kristu ku kufwa ni kumutwamisa ku chindume chenyi mwilu.

²¹ Mwe Kristu kakuyula mawanangana eswe, ni yiyulo yeswe, ni ulemu weswe. Kali helu lia yiyulo yeswe yikwo yize atu maahasa kuvuluka, hi a mwakono wika ko, alioze nawa a mwaka uze muwiza ho.

²² Zambi wazeyesele yuma yeswe kushi lia molu ja Kristu, yamuhana ku Chikungulwila ni kumunangika helu lia yuma yeswe.

²³ Chikungulwila we mujimba wa Kristu. Mu Chikungulwila chize mwatwama Kristu yoze uli kweswe.