Daniel 9 - Mukanda Wa Zambi 1970

Daniel yalembela Ayuda

¹ Mukwa Media Dariuse, mwana wa Ahashueru, yayula mu wanangana wa Babilonia.

² Ha mwaka utangu wa kuyula chenyi, yami Daniel te nakuhengula mu mikanda ya Zambi ni kushinginyeka hakutwala ku chize Yerusaleme mabwa kwenyeka miaka makumi shimbiali nikulita ni liji lize Mwene Zambi alwezele mukwa munanyi Jeremia.

³ Yinguliumba kuli Mwene Zambi ni chinyengo, nikumulembela, nikulitwamina kulia, nikuzala mwanji, nikulimwangina uto.

⁴ Yingulemba kuli Mwene Zambi ni kushikisa milonga ya atu jami. Yingwamba ngwami: “Mwene Zambi, yena uli munene, twakukulemesa. Uli wamwenemwene hakutwala ku Usendo we. Wakulweza zango lie lize kulishi kuhwa kuli waze akukuzanga ni kufunga Shimbi je.

⁵ “Yetu hitwavulumuna, hitwalinga yibi, hitwabwa yingulungulu, hitwakukatukila, hitwehuka Shimbi je ni yiyulo ye.

⁶ Kutwabanjikile ko kuli tuvumbi twe akwa munanyi, waze ahanjikile mu jina lie kuli mianangana ni akwa kuyula jetu, ni tushakulu twetu, ni vungu lietu Heswe.

⁷ Yena Mwene Zambi, matangwa eswe wakulinga ni ululi, alioze yetu matangwa eswe twakulikokela sonyi. Chenacho twakulinga yetu eswe waze twatwama mu Yuda ni mu Yerusaleme, ni Aisraele eswe waze hiunamwangina mu yifuchi hakamwihi ni kusuku mumu hitunakuvulumuna.

⁸ Mianangana ni akwa kuyula jetu, ni tushakulu twetu hitunalingi yuma ya sonyi, hitunakuvulumuna yena Mwene Zambi.

⁹ Yena wakutuvwila keke, wakutukonekena, chibwe yetu hitunakukatukila.

¹⁰ Aa Mwene Zambi, Zambi yetu, kutwakubanjikile ko muze wahanyine Shimbi kuli tuvumbi twe akwa munanyi hanga atulongese jo.

¹¹ Aisraele eswe yaakolema Shimbi je, yaalituna kubanjika maliji je. Yitukuvulumuna, kashika hiunatunehena mashingo waze anasonewa mu Shimbi ja Mose, kavumbi ke.

¹² Hiunalingi yize wambile kutulinga yetu ni akwa kuyula jetu. Hiwamwesa Yerusaleme lamba kuhiana lize lia membo akwo hano hashi.

¹³ Hiwatumwesa lamba heswe lize linasonewa mu Shimbi ja Mose. Aa Mwene Zambi, Zambi yetu, chibwe haliabwila kutwesekele ko kulinga yize wakuzanga, kutwehukile ko milonga yetu, kutwakawile ko umwenemwene we.

¹⁴ Aa Mwene Zambi, Zambi yetu, yena walulikile kutumwesa lamba. Wachilingile mumu matangwa eswe wakulinga yize yinalite, alioze yetu kutwakubanjikile ko.

¹⁵ “Aa Mwene Zambi, Zambi yetu, wasolwele ndundo je muze watuhwishile atu je mu Egiptu, twakujiwuluka ndoo ni musono. Twavulumwine, twalingile yibi.

¹⁶ Watuhakwilile ku shakulu, kashika kanda uvwila nawa Yerusaleme ufwatulo. Lili limbo lie kanda mulundu we wa chijila. Atu eswe a mu yifuchi yakusulangana kaakulelesa Yerusaleme ni yetu atu je mumu ha yibi yetu ni ungulungulu uze alingile tushakulu twetu.

¹⁷ Aa Zambi, banjika kama kulemba ni kuliumba chami. Tungulula kama zuwo lie lize abuzwile. Litungulule hanga atu eswe anyingike ngwo, yena uli Zambi.

¹⁸ Aa Zambi, tubanjike kama, tutale kama; umone yibikalo yize tuli nayo, ni lamba lia mu limbo lize alukile jina lie. Tunakulembe mumu yena uli mukwa keke, hi mumu ko twakulinga ni ululi.

¹⁹ Mwene, tubanjike kama. Mwene, tukonekene kama. Mwene, twivwe kama, ulinge chimwe Chuma. Kanda ushimbula, hanga atu eswe anyingike ngwo, yena uli Zambi. Limbo lino ni e atu kaali nie.”

Gabriel yalumbununa maliji a munanyi

²⁰ Nanyongonona nikulemba, nikushikisa milonga yami ni ya atu jami Aisraele, nikuliumba kuli Mwene Zambi, Zambi yami, hanga atungulule zuwo lienyi lia chijila.

²¹ Muze te ngunalembe, mwe Gabriel, yoze namwene mu Usolwelo utangu, yahulumuka hashi kuze nabwile. Te ola ya mulambu wa chingoloshi.

²² Yalumbununa ngwenyi: “Daniel, hineza ngukulumbunwine e maliji a munanyi.

²³ Muze wabutukile kuliumba kuli Zambi, yakukumbulula. Kanakuzange, kashika yami hineza ni kukulweza lie kumbululo. Banjika kanawa, ngunakulumbunwina we Usolwelo.

²⁴ “Atu je ni limbo lino lia chijila hanaabatwila miaka makumi shimbiali yisuho shimbiali aatusule ku yibi yo ni ungulungulu wo. Yibi yo makaakonekena yo. Ululi muukalinduluka ku miaka yeswe hanga Usolwelo ni maliji a munanyi yikamanunuke, zuwo lia Zambi lia chijila maakakunjika lio.

²⁵ Sako chinyingi, unyingike kanawa: chize ku tangwa lize ambile lia kutungulula Yerusaleme, ndoo ni ku tangwa lize mukwa lutwe yoze atongwele Zambi makasoloka, miaka shimbiali yisuho shimbiali muyikabalika. Yerusaleme maakamutungulula, ni e majila jamo, ni ye yipanga ya kukoleka. Mba makalinduluka miaka shimbiali yisuho makumi asambano ni yaali, alioze maakabwa matangwa a lamba.

²⁶ Ku songo lia matangwa waze mukwa lutwe yoze Zambi atongwele maakamushiha keshi ni chitela. Limbo ni lie zuwo lia kuwayila kumaakayibuzula kuli umwe mukwa kuyula wa tachi ni tujita twenyi. Songo mulikeza ngwe sanga lia meya, nikuneha jita ni kwonona yize Zambi hanalulika.

²⁷ Mwe mukwa kuyula yoze makakolesa Usendo ni atu anji ha miaka shimbiali. Muze miaka yitatu ni yipinji hiyabalika, mba makasa songo lia yitapo ni milambu. Hohene Chipupu cha Kuvwisa Woma makachisa mu zuwo lia Zambi. Muchikabwa mo ndoo mwe yoze makachisa mo makaheta ku songo lienyi lize Zambi amululikilile.”