Daniel 8 - Mukanda Wa Zambi 1970

Usolwelo wa Daniel wa kuji a panga ni kuji a pembe

¹ Ha mwaka wa muchitatu wa kuyula cha mwanangana Belshazare, yami Daniel yingumona Usolwelo wa muchaali.

² Yingumona mu Usolwelo susumuku nguli mu limbo liakukoleka lia Shushane mu chifuchi cha Elame. Te ngunamana ku mbumbulu ya lwiji Ulai.

³ Kwe ku mbumbulu ya lwiji yoze yingumona ko kuji a panga, te uli ni mbinga jaali jisuku jisuku, yimwe yili yaha, yiisuhwa kuhiana yikwo.

⁴ Yingumona mwe kuji a panga kanayi nikububa ku chitokelo, ni ku norde, ni ku sude. Te kukushi kashitu niumwe yoze mahasa kumukwika hanji kumuchina mumu ha tachi jenyi. Yalinga yeswe yize azangile, yabutuka kulengumuka.

⁵ Muze te ngunanyongo hakutwala ku ulumbunwiso wa Usolwelo uze, yingumona kuji a pembe unakatuka fuji ku chitokelo, molu jenyi kaaliachile ko hashi. Neye yabwa ni mbinga yimuwika yinene mukachi ka yikenyikenyi.

⁶ Yeza kuli kuji a panga, yoze namwene te unamana ku mbumbulu ya lwiji, yamulundumukina ni tachi jenyi jeswe.

⁷ Yingumutala te kanabubu kuji a panga ni wuli wenyi unji, yamumakwona je mbinga jaali. Neye kabwile ko nawa ni tachi ja kujikiza. Kuji a pembe yambila kuji a panga hashi, yamuliataliata. Niumwe kabwile ko yoze mahasa kumulamwina.

⁸ Mwe kuji a pembe yabutuka kulengumuka kuhiana, alioze muze habwa ni tachi kuhiana, mbinga yenyi yiimakuka. Mba ha chituwa chize yihasoka mbinga jeka jiwana, yijitalikisa ku kanda jeswe.

⁹ Ku yimwe mbinga yikusoka yikwo yikepe. Mba tachi jayo yiitanda ku sude, ni ku chivumbuko, yiitalikisa ku chifuchi cha Chilakenyo.

¹⁰ Yiilikoleza kuhiana, yiiyasa jita ni tujita twa mwilu, chibwe ni matongonoshi, yiimbila amwe hashi ni kwaliataliata.

¹¹ Yiilimika chibwe ni mwe mwanangana wa tujita twa mwilu, yiikanjisa atu kumulambula milambu ya tangwa ha tangwa, yiibihisa zuwo lia Zambi.

¹² Atu yaavulumuna homa haze chatamba kulambwila milambu. Ye mbinga yiibihisa uwayilo wamwenemwene wa Zambi, yiikumba mu yuma yeswe yize alingile.

¹³ Mba yingwivwa umwe kanganda ka mwilu kanahula mukwo ngwenyi: “Yuma yino ya mu Usolwelo muyibwa lume ndoo tangwa lika? Yibi yibwahaha muyisalakana milambu ya tangwa ha tangwa ndoo matangwa angahi? Tujita twa mwilu ni zuwo lia Zambi maakayiliataliata ndoo mwiji muka?”

¹⁴ Yingwivwa kanganda mukwo kanakumbulula ngwenyi: “Muyikalinduluka matangwa 1,150. Ha matangwa waze eswe, atu keechi kalambula milambu ya chichamene ni chingoloshi. Hohene maabemesa zuwo lia Zambi.”

Gabriel, kanganda ka mwilu yalumbununa we Usolwelo

¹⁵ Yingweseka kusa chinyingi cha Usolwelo uno, mba susumuku umwe mutu te unamana kulutwe liami.

¹⁶ Yingwivwa liji linene linahanjika muze musali lia lwiji Ulai ngwenyi: “Gabriel lumbunwina Daniel yuma yize amona.”

¹⁷ Mwe Gabriel yeza, yamana hehi ni yami kikilii. Yingwivwa woma, yingulimbukila hashi. Neye yangwamba ngwenyi: “Mwana mutu, banjika ulumbunwiso. Usolwelo uno unalumbununa yuma yize muyikeza ha miaka yakusula.”

¹⁸ Muze te anahanjika, yingulimbuka hashi, manyonga yaangutoka. Alioze Gabriel yangukwata, yangukatwisa,

¹⁹ yangwamba ngwenyi: “Ngunakulweze chize Zambi makalinga ni utenu wenyi. Usolwelo unalumbununa yuma yize muyikeza ha miaka yakusula.

²⁰ “Kuji a panga ni mbinga jaali yoze wamona kanalumbununa wanangana wa Media ni Persia.

²¹ Kuji a pembe kanalumbununa wanangana wa Gresia. Mbinga yenyi yinene ya mukachi ka yikenyikenyi yinalumbununa mwanangana wo mutangu.

²² Mbinga jiwana jize jasokele muze yitangu hiyamakuka jinalumbununa ngwo, wanangana utangu muukahandunuka mu mawanangana awana. No keechi kabwa ni tachi ngwe uze utangu.

²³ “Ku songo mawanangana waze maakabwa abi kuhiana. Kashika chatamba kwamwesa lamba. Mukukabwa mwanangana mukalu, mukwa shili kanda mukwa kwonga.

²⁴ Makabwa ni tachi, alioze hi tachi ja iye mwene ko. Kumakonona atu ni ye yuma yo kumuwika. Kumakayuka mu yuma yeswe yize makalinga. Kumakonona yitakame ni e atu ja Zambi.

²⁵ Kumakakumba mumu ha ukanyame wenyi ni kwonga chenyi. Makalengumuka, makashiha atu anji ni kwatungumuna. Makakatukila chibwe Mwanangana munene Wahiana. Mba Zambi makamushiha, alioze hi ni tachi ja mutu ko.

²⁶ Usolwelo uno hakutwala ku milambu ya chichamene ni chingoloshi, uze hakulumbunwina, muukamanunuka. Alioze haliabwila achiusweke, mumu matangwa anji maakabalika ndoo kumanunuka chawo.”

²⁷ Yingulekumuka, yinguyiza amwe matangwa. Mba yingujikiza, yinguhiluka ku milimo yize angukunjikile mwanangana, alioze yingulishimwoka hakutwala ku we Usolwelo, kuwangulumbunukinyine ko.