Daniel 7 - Mukanda Wa Zambi 1970

Usolwelo Uze Amwene Daniel Usolwelo wa Daniel wa tushitu awana

¹ Ha mwaka utangu wa kuyula cha Belshazare mwanangana mu Babilone, nalotele chilota. Yingumona Usolwelo ha ufuku, yinguusoneka.

² We Usolwelo uno: Fuji yiwana yiivundula kalunga lwiji sali ni sali.

³ Yingumona ngongo anene anene awana kaanatutuka mu meya, eswe kaalisa.

⁴ Mutangu yalifwa ngwe tambwe, alioze yabwa ni mapulwa ngwe tela. Muze te ngunatale, mapulwa yaatukwoka. Mwe ngongo yamwolola, yamana ngwe mutu. Mba yaamwaha manyonga ja utu.

⁵ Ngongo wa muchaali yalifwa ngwe ursu, yamana. Yabwa ni pachi jitatu ku mazo jenyi. Yikwiza liji ngwo: “Yako, ulie yifwo yinji ngwe chize unazange.”

⁶ Muze te ngunatale, yingumona ngongo mukwo. Yalifwa ni kolwama, alioze te kali ni mapulwa awana ngwe a kajila. Yabwa nawa ni mitwe yiwana, yamoneka ngwe umwe mukwa kuyula.

⁷ Muze te ngunatale, yingumona nawa ngongo wa muchiwana. Yabwa ni tachi, kole ni woma. Yapapulula akwa kole jenyi ni mazo jenyi, yaabatwola, yaaliataliata. Kalifwile ko ni ngongo akwo, yabwa ni mbinga kumi.

⁸ Muze ngunashishika kutala je mbinga, yingumona nawa mbinga yikwo yikepe yinasoko mukachi ka jikwo. Yiimakwona mbinga jitatu jize jitangu. Mbinga yiibwa ni meso ngwe a mutu, ni kanwa lize liahanjekele yuma ya kulizelula.

Usolwelo wa umwe yoze wabwile ni mwono chize ku miaka yeswe

⁹ Muze te ngunatale, yaasa yitwamo ya wanangana mu mihela yayo. Mba umwe, yoze wabwile ni mwono chize ku miaka yeswe, yatwama ha chimwe chitwamo. Mahina jenyi yaabwa atoma ngwe chiwe, kambu jenyi yiijibwa ngwe Wanda utoma. Chitwamo chenyi yichisoloka ngwe milengi ya kahia, yichibwa ha yijingo ya kahia kaze kanalengenya,

¹⁰ kahia yikalekwoka kulutwe lienyi. Tununu ni tununu te anamana kulutwe lienyi. Akwa kusopa yaabutuka kusopa, yaabakwola mikanda.

¹¹ Muze te ngunatale, yingwivwavwa maliji a kulizelula a ye mbinga. Mwabwamuze yaashiha ngongo wa muchiwana, yaamunyasa mu kahia, yaamwocha.

¹² Yaachiza chiyulo cha ngongo waze akwo, alioze yaatayiza kutwama ni mwono amwe matangwa.

¹³ Mu Usolwelo wa ufuku uze, yingumona umwe walifwa ni mwana mutu wakujingilika ni malelwa, yangukundama. Mba yaya kuli yoze wabwile ni mwono chize ku miaka yeswe, yaamulakula kuli iye.

¹⁴ Neye yamwaha chiyulo, ni ulemu, ni ndundo ja wanangana, hanga atu a ku yifuchi yeswe, ni mavungu eswe, ni maliji eswe amulingile. Chiyulo chenyi muchilinduluka ndoo ku miaka yeswe, wanangana wenyi kuuchi kubwa ni songo.

Ulumbunwiso wa we Usolwelo

¹⁵ Usolwelo uze namwene yiunguvwisa woma, yiungubikalisa kuhiana.

¹⁶ Mba yingukundama kuli umwe wa kuli waze te anamana ko, yiunguhula ulumbunwiso wa Usolwelo uze, neye yangulumbunwina wo.

¹⁷ Ngwenyi: “Ngongo waze anene anene awana kaali mawanangana awana waze maabwa hano hashi.

¹⁸ Atu ja mwe Zambi Chitunda maakatambula tachi ja wanangana, kumaakabwa najo ndoo ku miaka yeswe ni miaka yeswe.”

¹⁹ Hohene yinguzanga kunyingika kuhiana ngongo wa muchiwana, yoze kalifwile ko ni akwo, yoze wakole ni woma, yoze wapapulwile akwa kole jenyi ni yala yenyi ya unengu ni mazo a utale, mba yaaliataliata.

²⁰ Yinguzanga kunyingika hakutwala ku mbinga kumi ja ha mutwe wenyi ni mbinga yize yasokele mukachi ka mbinga jikwo, mba yiimakwona mbinga jikwo jitatu, mbinga yize yiibwa ni meso ni kanwa, yiihanjika yuma ya kulizelula. Ngongo yoze yabwa wakole ni woma kuhiana akwo eswe.

²¹ Muze te ngunatale, ye mbinga yiiyasa jita ni atu ja Zambi, yiiyaakumba.

²² Mba yoze watwama ni mwono chize ku miaka yeswe yeza, yasambisa atu ja Zambi Chitunda. Te tangwa hiliaheta atu ja Zambi atambule chiyulo cha wanangana.

²³ Uno we ulumbunwiso uze angulwezele ngwo: “Ngongo wa muchiwana kali wanangana wa muchiwana uze muubwa hano hashi, muulisa ni mawanangana akwo eswe. Kumuukapapujola hashi heswe ni kuliataliata ho.

²⁴ Mbinga kumi jili mianangana kumi waze maakayula mu wanangana uze. Mba mwanangana mukwo makasoloka. Neye makalituchika ni mianangana akwo, makakumba mianangana atatu.

²⁵ Makahanjika maliji akulimika ni Zambi Chitunda, makabinjisa atu ja Zambi. Makeseka kwalumuna Shimbi jo ja kuwayila Zambi ni ja yiwanyino yo. Atu ja Zambi maakabwa mu chiyulo chenyi miaka yitatu ni Chipinji.

²⁶ Hohene ngaji ja mwilu maakakunguluka ni kumubatwila, maakachiza chiyulo chenyi ni kumwonona liakulu.

²⁷ Chiyulo ni ndundo ya mawanangana eswe a hashi maakayihana kuli atu ja Zambi Chitunda. Chiyulo cha wanangana wo kuchichi kusula, akwa kuyula eswe a hashi kumaakaalingila ni kwoononokena.”

²⁸ Lino lie songo lia che chikuma. Mba yami Daniel yingwivwa woma kuhiana, yingwalumuka ku meso, alioze yingufunga yuma yino yeswe mu mbunge.