Daniel 6 - Mukanda Wa Zambi 1970

Mwanangana Dariuse yambila Daniel mu wina wa tambwe

¹ Mwanangana Dariuse yatongola akwa kuyula kulakaji ni makumi aali mu wanangana wenyi.

² Chikwo nawa, yatongola Daniel ni malunga aali akwo hanga abwe miata ja akwa kuyula, ni hanga atale yuma ya mwanangana.

³ Shimbu likepe milimo ya Daniel yiisoloka yibema kuhiana milimo ya akwo waze aali ni ya e akwa kuyula. Mwanangana yanyonga kumupwisa mwata wa wanangana wenyi weswe mumu ha milimo yenyi yibema.

⁴ Kashika miata waze akwo ni akwa kuyula yaafupila Daniel mulonga ku milimo yenyi ya wanangana, alioze kaauwanyine ko, mumu Daniel wabwile mukwa ululi. Kalingile ko chibi nichimwe, hanji chimwe Chuma cha uhenge.

⁵ Yaalihanjikisa ngwo: “Kutuchi kuwana Chuma nichimwe cha kumusumina mulonga, shina lume tumusume mulonga wa kuwayila Zambi yenyi.”

⁶ Mba yaaya maha mwanangana ni kumulweza ngwo: “Vulie mwanangana Dariuse!

⁷ Yetu akwa lutwe eswe a mu wanangana: miata a tujita, ni akwa kuyula yifuchi, ni milopo jo, ni akwo eswe, hitwanyonga ngwetu, chipema yenu mwanangana nuse Shimbi ya tachi ngwenu, mutu mumwe mahasa kwita chimwe Chuma kuli umwe zambi chibwe umwe mutu shina kuli yenu ha matangwa makumi atatu. Mweswawo matangula Shimbi yino chatamba kumumbila mu wina wa tambwe.

⁸ Chinalite yenu mwanangana nuse chinyingi ku Shimbi yino hanga yibwe ya tachi, ngwe chize jakubwa Shimbi ja Amedia ni Apersia, jize kujishi kuhasa kwalumuka.”

⁹ Chenacho mwanangana Dariuse asonekene jina lienyi mu mukanda wa Shimbi.

¹⁰ Muze Daniel hevwa ngwo, mwanangana hasoneka jina lienyi mu mukanda wa Shimbi, yaya ku mahienyi. Mu chibatulo cha zuwo lienyi cha kwilu yimubwa tupenda waze te atala ku Yerusaleme. Kwenako asele makungunwa hashi ni kulemba Mwene Zambi yisuho yitatu tangwa ha tangwa, nikulita ni ndako yenyi.

¹¹ Muze akwa kole jenyi haamona chize te analembe Zambi,

¹² yaaya ni kwambulula Daniel kuli mwanangana, yaamba ngwo: “Vulie mwanangana! Nunakasoneka jina lienu mu mukanda wa Shimbi ngwenu, ha matangwa makumi atatu mutu niumwe mahasa kwita chimwe Chuma kuli umwe zambi chibwe umwe mutu shina kuli yenu mwanangana. Yoze machilinga chatamba kumumbila mu wina wa tambwe.” Mwanangana yakumbulula ngwenyi: “Ewa, Chenacho ngunakakolesa ye Shimbi, ni Shimbi ya Amedia ni Apersia kuyahashile kwalumuka.”

¹³ Mba yaalweza mwanangana ngwo: “Daniel, umwe funge wa ku Yuda, kasolo kunulemesa yenu mwanangana. Keshi kufunga Shimbi yize nwasele. Tangwa ha tangwa kakulemba yisuho yitatu kuli Zambi yenyi.”

¹⁴ Muze mwanangana hevwa chino, yalekumuka, yafupa mana akulamwina Daniel, yeseka ndoo kutoka cha tangwa.

¹⁵ Mba e malunga yaahiluka kuli mwanangana, yaamwamba ngwo: “Vulie mwanangana! Yenwene nunanyingika ngwenu, yimwe Shimbi ya Amedia ni Apersia yize mwanangana hakolesa kuyahashile kwalumuka.”

¹⁶ Mba mwanangana yahana Shimbi hanga akwate Daniel, yamwamba ngwenyi: “Zambi ye, yoze wakulingila ni mbunge yibema, akulamwine kama.” Hohene atu yaamumbila mu wina wa tambwe.

¹⁷ Yaafuka liwe ku we wina. Mba mwanangana yasaho chinyingi cha wanangana ni chinyingi cha akwa lutwe he ha liwe, hanga niumwe mahasa kulamwina Daniel.

¹⁸ Mba mwanangana yahiluka ku zuwo lienyi, yanongama ufuku weswe, kalile ko nichimwe, chibwe yisaji kaamunehenene yo.

¹⁹ Muze hikwacha, mwanangana yanyangumuka, yaya fuji ku wina.

²⁰ Muze haheta ko, yatambika ni kunenganyana ngwenyi: “Daniel, kavumbi ka Zambi ya mwono! Zambi yoze wakulingila matangwa eswe ni mbunge yimuwika hakulamwina kama kuli tambwe, nyi?”

²¹ Daniel yamukumbulula ngwenyi: “Vulie mwanangana wami!

²² Zambi yami katumanga kanganda kenyi wa mwilu hanga abakike makanwa ja tambwe achine kungulemeka. Kalinganga chino mumu kananyingika ngwenyi, nguli mukwa kusamba ni mumu chanuvulumwine ko yenu mwanangana.”

²³ Mwanangana yawahilila kuhiana, yahana Shimbi ngwenyi: “Chizenu Daniel mu wina.” No yaamuchiza mo, yaamona mujimba wenyi walambulambu weswe, tambwe kaamulemekene nichimwe, mumu Daniel yajikijila hali Zambi.

²⁴ Mba mwanangana yahana Shimbi ngwenyi, akwate eswe waze anakeza ni kwambulula Daniel. Atu yaambila mu wina wa tambwe hamwe ni mapwo jo ni ana jo. Shimbu te kanda achiheta ha mashima ja wina, tambwe yookela mu tetela, yaabatwola yifwaha yo yipinji yipinji.

²⁵ Hohene mwanangana Dariuse yasoneka kuli atu a ku yifuchi yeswe, ni mavungu eswe, ni maliji eswe ngwenyi: “Mwoyo wenu!

²⁶ Ngunase Shimbi ngwami, mu wanangana wami weswe atu eswe evwe woma, alemese Zambi ya Daniel. “Iye kali Zambi ya mwono, mayula ndoo ku miaka yeswe. Wanangana wenyi kuuchi kasula, ndundo jenyi kujichi kahwa nichimwe.

²⁷ Kakulamwina, kakupulula; kakulinga yipupu ni yilayi lilu ni hano hashi. Halamwina Daniel kuli tambwe.”

²⁸ Chenacho Daniel ayukile ha matangwa eswe a kuyula cha Dariuse ni Siruse mukwa Persia.