Daniel 5 - Mukanda Wa Zambi 1970

Chiteleka cha mwanangana Belshazare

¹ Limwe tangwa ha ufuku, mwanangana Belshazare yalakenya atu jenyi alemu kanunu ku chiteleka chinene. No yaanwa vinyu hamuwika.

² Muze te ananu, mwe Belshazare yahana Shimbi ande misenge ya oru ni prata ni yenga yize tato Nebukanezore anjile mu zuwo lia Zambi mu Yerusaleme. Mwe mwanangana yahana Shimbi yino hanga anwine mo iye mwene ni e alemu jenyi, ni mwata mwali, ni mapwo jenyi akwo.

³ Hohene yaaneha ye misenge ya oru ni prata, mba yaanwina mo ye vinyu,

⁴ ni kufumanyisa mazambi jo akulinga ni oru, ni prata, ni unengu, ni utale, ni mitondo, ni mawe.

⁵ Susumuku yikusoloka kwoko lia mutu, yilibutuka kusoneka ku mbango ya zuwo lia mwanangana, kuze te kunatemukina ndeya kuhiana. Mwe mwanangana yamona kwoko lize te linasoneka.

⁶ Yalumuka ku meso, yevwa woma unji, yalekumuka mu makungunwa jenyi.

⁷ Hohene mwe mwanangana yakololoka ngwenyi: “Sakenu akwa yipupu ni tahi.” Muze akwa mana waze heeza, yaalweza ngwenyi: “Yoze mahasa kutanga Chisoneko chino ni kungulumbunwina cho, mungumujika mahina a ufungo a wanangana, ni lubambu mulemu wa oru mu kota yenyi. Neye mabwa mu muhela wa muchitatu mu wanangana wami.”

⁸ Akwa kuyula ja mwanangana yaakundama, alioze niumwe wahashile kutanga che Chisoneko ni kulweza mwanangana ulumbunwiso wacho.

⁹ Mwanangana Belshazare, mu kuyambashana chenyi, yabwa lume hongonoo, ni e alemu jenyi hikabwile ko nawa ni nyonga lia chize maalinga.

¹⁰ Mba mwazovu, naye ya mwanangana Belshazare, yevwa zungo lia mwanangana ni e alemu jenyi. Yeza, yanjila kwe ku chiteleka, yamba ngwenyi: “Vulie mwanangana! Twalemba mwane, kanda nulibikala ni kuhongonoka chichize.

¹¹ Mu wanangana we muli umwe lunga yoze uli ni mwiku wa mazambi a linanga. Muze tatenu abwile mwanangana, lunga yoze yasolola yinyingi yenyi ni mana jenyi ngwe ya mazambi. Tatenu, Nebukanezore, yamupwisa mwata wa akwa yipupu ni tahi ni akwa munanyi.

¹² Mutu yoze, Daniel, te mukwa yinyingi ni mana ha kulumbununa yilota, ni yishima, ni yijimbikilo. Kashika ngwami, musake hanga akulweze ulumbunwiso wa yuma yino yeswe.”

Daniel yatanga che Chisoneko, yachilumbununa

¹³ Ha shimbu lizeliene, atu yaatwala Daniel ku meso ja mwanangana. Mba mwe mwanangana yamuhula ngwenyi: “Yena Daniel, wa mu Yuda, yoze tata mwe mwanangana anehene kuno, nyi?

¹⁴ Hinevwa ngwo, yena uli ni mwiku wa mazambi a linanga. Chikwo ngwo, uli lunga wajika, ni malinjekela, ni mana.

¹⁵ Natambikanga akwa kuyula ni akwa yipupu hanga angutangile Chisoneko chino ni kungulweza ulumbunwiso wacho, alioze niumwe kachihashile.

¹⁶ Hinevwa ngwo, yena muuhasa kulumbununa yuma yize yahengama ni yijimbikilo. Nyi ngwe wahasa kutanga Chisoneko chino ni kungulweza ulumbunwiso wacho, kachi mungukujika mahina a ufungo a wanangana, ni lubambu mulemu wa oru mu kota, ni yena muubwa mu muhela wa muchitatu wa wanangana wami.”

¹⁷ Daniel yamukumbulula ngwenyi: “Vulie mwanangana! Zukenu yawana yenu, hanji kuyihana kuli umwe mukwo weka. Ngunanutangila Chisoneko chino ni kunulweza ulumbunwiso wacho.

¹⁸ “Zambi Chitunda yapwisa tatenu Nebukanezore mwanangana munene, yamwaha ulemu ni ulamba.

¹⁹ Neye yabwa munene lume. Kashika atu a ku yifuchi, ni mavungu, ni maliji eswe yaamuvwila woma, yaachikima. Nyi ngwe hazanga kushiha umwe mutu, te kakuchilinga; nyi ngwe hazanga kufunga umwe ni mwono, hindu te kakuchilinga. Yoze te anazange kulemesa, yamulemesa; ni yoze te anazange kulelesa, yamulelesa.

²⁰ Alioze muze mwe tatenu halizata, halengumuka, habwa chitanganyanyi, Zambi yamuchiza ha chitwamo chenyi cha wanangana, neye yatokesa muhela wenyi wa vumbi.

²¹ Atu yaamuhuma mukachi ko, manyonga jenyi yaalumuka ngwe a kashitu. Neye yabwa hamwe ni yimbulu a mu yambu. Yalia mwambu ngwe ngombe, yabomba haze, te keshi ni chimwe Chuma cha kulifuka ha kuchina mume. Hakusula mba yanyingika ngwenyi, kuma Zambi Chitunda kakuyula mawanangana ja atu, ni mahasa kwahana kuli waze matongola iye mwene.

²² “Alioze yenu, mwanenyi, chibwe te nunanyingika yuma yino, hindu kunwalikehesele ko.

²³ Yinulimika ni Mwene Zambi ya Mwilu muze nwanehene misenge ni yenga yize achijile mu zuwo lienyi ku Yerusaleme. Yenu, ni alemu jenu, ni miazovu jenu, ni mapwo akwo yinunwina mo, ni kufumanyisa mazambi jenu akulinga ni oru, ni prata, ni unengu, ni utale, ni mitondo, ni mawe, waze keeshi kuhasa kumona chibwe kubanjika, ni waze kaanyingikine nichimwe. Alioze kunwalemesene ko Zambi yoze wakunubatwila kubwa ni mwono hanji kufwa, ni yoze wakunuyula mu yuma yeswe yize nwakulinga.

²⁴ Kashika mwe Zambi hanutumina kwoko lino ni Chisoneko chino.

²⁵ “Che Chisoneko chili chino: ‘Kwalula, kwalula, kweseka, kuhandununa.’

²⁶ Ulumbunwiso wacho uli uno: kwalula, Zambi halula matangwa ja wanangana wenu, hausulisa;

²⁷ kweseka, Zambi hanweseka mu pezo, hinwalela;

²⁸ kuhandununa, wanangana wenu hauhandununa, hauhana kuli Amedia ni Apersia.”

²⁹ Ha shimbu lizeliene mwanangana Belshazare yahana Shimbi kuli tuvumbi twenyi hanga ajike Daniel mahina a ufungo a wanangana, ni lubambu mulemu wa oru mu kota yenyi. Yamusa mu muhela wa muchitatu wa wanangana wenyi.

³⁰ Ha ufuku uzewene akwa kole yaashiha Belshazare mwanangana wa Babilonia.

³¹ Mba Dariuse, mukwa Media, yatambula we wanangana ni tachi, te habwa ni miaka makumi asambano ni yaali.