Daniel 4 - Mukanda Wa Zambi 1970

Chilota cha muchaali cha mwanangana Nebukanezore

¹ Mwanangana Nebukanezore yatuma maliji wano kuli atu a ku yifuchi yeswe, ni mavungu eswe, ni maliji eswe ngwenyi: “Mwoyo wenu!

² Banjikenu sango ja yikomokeso ni yilayi yize mwe Zambi Chitunda hangulweza.

³ “Zambi hatulweza yilayi yinji, yikomokeso ya ndundo! Zambi mabwa mwanangana matangwa eswe; mayula ndoo ku miaka yeswe.

⁴ “Te ngunatwama kwami nee mu zuwo liami lia wanangana ni uwahililo mumu ha yuma yami yinji.

⁵ Alioze yingulota chimwe chilota cha woma unji, yingumona Usolwelo wa mwongo muze te ngunabombo.

⁶ Kashika yingutuma liji ni kutambika akwa kuyula eswe a mu Babilone, hanga angulumbunwine chilota chami.

⁷ Muze tahi, ni akwa yipupu, ni akwa mana eswe heeza, yingwaawila chilota chami, alioze kaahashile ko kungulumbunwina cho.

⁸ Hohene Daniel yanjila. (Kaakumuvuluka nawa ngwo, Belteshazare, nikulita ni jina lia zambi yami.) Muli iye yimubwa mwiku wa mazambi a linanga. Yingumwawila chilota chize ngunakalota. Yingumwamba ngwami,

⁹ Belteshazare, mwata wa tahi, ngunanyingika ngwami, mwiku wa mazambi a linanga uli muli yena, yena Unanyingika yijimbikilo yeswe. Chino che chilota chami. Ngulweze ulumbunwiso wacho.

¹⁰ “Muze te nguli mu tulo, yingumona Usolwelo wa mutondo unene mukachi ka hashi.

¹¹ Yiutatuka ndoo songo liawo yiliheta ndoo kwilu, atu eswe yaaumona.

¹² Mafwo jawo te abema, yiulemenena ni mihuko yinji. Ye mihuko yinazuku ni kulisa akwa hashi eswe. Tushitu yaanamina mu chizulie chawo, tujila yaatunga yaswa yo ku mitango yawo. Akwa mwono eswe yaahaha mihuko yawo.

¹³ “Muze te ngunanyongo hakutwala ku we Usolwelo, yingumona kanganda, mukwa kulimwisa, kanahulumuka mwilu.

¹⁴ Neye yambujola ni liji linene ngwenyi: ‘Nungunenu we mutondo, salulenu mitango yawo, hululenu mafwo jawo, mwangenu mihuko yawo. Hangenu tushitu waze akunamina mushi liawo ni tujila waze atwama ko.

¹⁵ Alioze hichikenu chimbunji chawo, nuchikase ni chimwe chijingo cha utale ni chikwo cha unengu, nuchihichike mu munda mukachi ka yambu. “ ‘Mutu yono akawule ni mume, akabwe hamwe ni tushitu mu yambu.

¹⁶ Ha miaka shimbiali kechi kabwa ni manyonga ja utu, alioze ni manyonga ja ushitu.

¹⁷ Uno we ubatwilo wa tunganda twa mwilu, akwa kulimwisa. Ha chino atu eswe a kuma kweswe anyingike ngwo, Zambi Chitunda kakuyula mawanangana eswe ja atu; nawa ngwo, mahasa kwaahana kuli waze anazange, chibwe atu alelu kuhiana.’ ”

¹⁸ Mwanangana ngwenyi: “Chino che chilota ngunakalota. Haliabwila, yena Belteshazare, ngulweze ulumbunwiso wacho. Niumwe wa kuli akwa kuyula jami Unahase kuchilumbununa. Alioze yena Unahase mumu uli ni mwiku wa mazambi a linanga.”

Daniel yalumbununa che chilota

¹⁹ Ha chino Daniel, yoze te akuvuluka nawa ngwo Belteshazare, yevwa woma unji, te kahashile ko kuhanjika liji nilimwe. Mwanangana yamwamba ngwenyi: “Belteshazare, kanda wivwa woma wa chilota ni we ulumbunwiso wacho.” Belteshazare ngwenyi: “Vulie mwanangana! Kachi che chilota ni we ulumbunwiso wacho yibwe kama kuli akwa kole jenu, hi kuli yenu ko.

²⁰ Mutondo uze waheta ndoo mwilu akwa hashi eswe maahasa kuumona.

²¹ Mafwo jawo te abema, ni ye mihuko yinazuku kulisa akwa hashi eswe. Tushitu a mu yambu te kaakubomba mushi liawo, ni tujila te kaakutunga yaswa yo ku mitango yawo.

²² “Vulie mwanangana! Yenwene nuli mutondo uno. Nunatolomoka, nuli ni tachi. Usuhwe wenu hiwaheta ndoo kwilu, chiyulo chenu hichaya ndoo ku masongo ja hashi.

²³ Vulie mwanangana! Muze te nunatale, umwe kanganda ka mwilu yahulumuka, yamba ngwenyi: ‘Nungunenu we mutondo, nuwonone, alioze hichikenu chimbunji mu mavu. Nuchikase ni chimwe chijingo cha utale ni chikwo cha unengu, nuchihichike mu munda mukachi ka yambu. Mume ukasotokele hali mutu yono, akabwe hamwe ni tushitu a mu yambu miaka shimbiali.’

²⁴ “Vulie mwanangana! Uno we ulumbunwiso wa che chilota. Zambi Chitunda kanambe ngwenyi, che muchikabwa hali yenu.

²⁵ Kumaakanuhuma mukachi ka atu, nukabwe hamwe ni tushitu a mu yambu. Miaka shimbiali munukalia mwambu ngwe ngombe ni kubomba haze, kuze mume muukabwa nikunusotokela. Hohene munukatayiza ngwenu, kuma Zambi Chitunda kakuyula mawanangana eswe ja atu, ni kakwahana kuli waze matongola iye mwene.

²⁶ Tunganda twa mwilu haahana Shimbi ngwo, ahichike chimbunji mu mavu. Chino chinalumbunuka ngwo, kumunukabwa nawa mwanangana muze hinwanyingika ngwenu, kuma Zambi kakuyula hashi heswe.

²⁷ Vulie mwanangana! Banjikenu maliji jami. Litwaminenu kuvulumuna, nulinge yize yinalite, nwivwile yiswale keke, mba tangwa likwo munuwaha.”

²⁸ Yino yeswe ye yabwile hali mwanangana Nebukanezore.

²⁹ Yikubalika lume tukweji kumi ni aali. Mwanangana te kanendangana ha fulumba lia zuwo lienyi lia wanangana mu Babilone

³⁰ nikwamba ngwenyi: “Ayenu, Babilone cho kutohwa! Limbo lino lia wanangana nalitungile hanga ngusolole tachi ni ndundo jami, ni uhenya ni ulamba wami.”

³¹ Muze te machihanjika, mwilu yimwiza liji ngwo: “Mwanangana Nebukanezore, banjika ku maliji jami! Chiyulo cha wanangana we haliabwila hakuchiza cho.

³² Kumaakuhuma mukachi ka atu, ukabwe hamwe ni tushitu, ukalie mwambu ngwe ngombe miaka shimbiali. Mba hanga ukanyingike ngwe, kuma Zambi Chitunda kakwete chiyulo ha mawanangana ja atu, kanahase kwahana kuli waze matongola iye mwene.”

³³ Hazehene maliji waze yaamanunuka. Atu yaahuma mwanangana Nebukanezore mukachi ko. Neye yalia mwambu ngwe ngombe. Mujimba wenyi yiuwula ni mume, kambu jenyi yijisuhwa suhwa ngwe ngona ja tela, yala yiitolomioka ngwe ya tujila.

Mwanangana Nebukanezore yafumanyisa Zambi

³⁴ Mwanangana Nebukanezore yamba ngwenyi: “Muze te miaka shimbiali hiyabalika, yingutala kwilu, mba yingubwa nawa ni mana. Yingufumanyisa mwe Zambi Chitunda, yingulemesa ni kufumanyisa yoze watwama ni mwono ndoo ku miaka yeswe. “Iye makayula ku miaka yeswe; wanangana wenyi muukalinduluka ndoo ku miaka yeswe.

³⁵ Kakutala akwa hashi ngwe Chuma chamokomoko. Tunganda twa mwilu ni akwa hashi eswe kaali mu chiyulo chenyi. Niumwe mahasa kukinda upale wenyi hanji kumuhula chize analingi.

³⁶ “Muze hinabwa nawa ni mana, ulemu ni ulamba wami, ni uhenya wa wanangana wami yanguhilwisa yo. Akwa lutwe ni alemu jami yaangusambilila, yaangwaha nawa chiyulo cha wanangana wami. Yingubwa ni vumbi ni ulemu kuhiana hatangu.

³⁷ “Haliabwila yami, Nebukanezore, ngunachichimieka ni kufumanyisa Mwanangana wa Mwilu. Yuma yeswe yize akulinga yili yamwenemwene ni yinalite. Mahasa kuhetamisa mweswawo wakwenda ni kulengumuka.”